Xu jintawning ürümchi pa'aliyiti we xu jintaw heqqidiki bir obzor

Xitay merkizi komitétining zuwani bolghan 'shinxu'a agéntliqi' xitay re'isi xu jintawning 8‏ - ayning 22‏ - künidin bashlap shinjangda tekshürüsh élip barghanliqini bügün 25 ‏- chisla küni kech sa'et 8 din kéyin ( üch kündin kéyin, yeni xu jintaw qaytip ketkende ) xewer qildi.
Muxbirimiz weli
2009-08-25
Share
Xu-jintaw-Urumchide-305.jpg Süret, xu jintawning ürümchidiki xitay qoralliq küchlirini közdin köchürgende söz qiliwatqan körünüshi.
news.sina.com.cn Din élindi.

Mushu bir nechche kün ichide, chet'ellerde tarqilidighan xitayche 'boshün tor géziti' mu xujintaw heqqide bir obzor élan qildi. Emma xitayning shinjang Uyghur aptonom rayonining zuwani bolghan 'shinjang xewer tori' xitay re'isi xu jintawning shinjanggha kélip tekshürüsh élip barghanliqini ta hazirgha qeder ( bügün ürümchi waqti kech sa'et 12gha qeder) téxiche xewer qilmidi.

'Shinxu'a agéntliqi' ning 25‏ - awghust küni kech sa'et 8 din ötkende ürümchidin xewer qilishiche, xitay re'isi xu jintaw 8‏ - ayning 22‏ - künidin bashlap shinjangda tekshürüsh élip barghan. Xu jintaw mushu künlerde wang léchu'en, nur bekrilerning hemrahliqida aqsu, sanji, qaramay, shixenze, ürümchi qatarliq jaylarda, xitay qoralliq saqchi qisimliridin, 5‏ - iyol weqesidiki qehrimani jawgangning xutunidin hal sorighan, 39 yildin buyan azadliq armiyini süygenliki heqqide 1000 parchidin artuq xatire yazghan 75 yashliq qadir baqi bilen, 5‏ - iyol weqeside xeterge uchrash éhtimali bolghan 15 xitayni yushurup qoyghan xemit exmet bilen we weqede xizmet körsetken diniy zatlar bilen körüshken.

Xu jintaw bu qétimqi tekshürüsh pa'aliyitide yene, shinjang herbiy rayonining aqsuda turushluq melum bir polkini we xitay néfit shirkitining maytagh we shixenzilerdiki shöbilirini közdin küchürüp, ulargha ilham bergen.

Xewerde bayan qilinishiche, xu jintaw bügün 8‏ - ayning 25 ‏- küni ürümchide échilghan kadirlar yighinida söz qilip, sözide 'dölet ichi we sirtidiki üch xil küchler 5‏ - iyol küni ürümchide urush, chéqish, bulash, köydürüsh weqesini peyda qildi, aptonom rayonluq hökümet, herbiy qisimlar we bingtu'en partiye merkizi komitétining rehberlikide birdek heriketke kélip, ürümchining muqimliqini eslige keltürdi' dep baha bergen. Shundaqla yene pütün kadirlarni shinjangda sotsiyalizmni tereqqi qildurushqa, bölgünchilerni meghlup qilip, xelq turmushini yaxshilashqa chaqirghan.

Xu jintawning bu qétim ürümchige kelgenliki heqqide chet'el uchur wastiliridin fransiye agéntliqimu xewer élan qildi. Uningda bayan qilishiche, xu jnintaw bügün ürümchide qilghan sözide asasen ' ürümchide ötken ayda toraqsizliq peyda qilghan bölgünchi küchlerni chuqum meghlup qilimiz' dep xitap qilghan.

Xu jintaw ürümchi qatarliq jaylarni közdin köchürüwatqan mushu künlerde, chet'ellerde tarqitilidighan boshun tor gézitide xu jintaw heqqide bir obzor élan qilindi. Uningda bayan qilishiche, xu jintaw wezipe öteshke bashlighan haman xitayda bayliq menbelirining israp qiliniwatqanliqini sézip, buninggha qarita pen - téxnikini tereqqi qildurush shu'arini otturigha qoyghan idi. Emma hazirgha qeder, xu jintawning wezipe ötesh mudditining üchten ikki qismi tügep bolghandimu, téxiche bu tedbirining ünümi körülmidi. Belki ishsizliq köpeydi, xelq turmushi töwenlidi, otturahal mülük égiliri azlidi, pikir erkinliki téximu cheklendi, dölet ichidiki ziddiyetler barghansiri keskinleshti, jaylarda qarshiliq heriketler köpeydi. Bundaq ehwalda xu jintawning hökümetni idare qilish iqtidari ajizlap, peqet qoralliq qisimlargha we saqchi qisimlargha tayinip xelqni basturushqa yüzlendi.
 
'Boshün tor géziti'de élan qilghan xu jintaw heqqidiki bu obzorda, xu jintawning siyaset chiqirip mat bolghanliqigha da'ir birnechche mésal tepsiliy bayan qilin'ghan. Uningda éytilishiche, xu jintaw bultur qishta enxuygha barghanda 'yerni ötünüp bérish' siyasitini otturigha qoyup, buni yéngi islahatning yol belgisi dep teshwiq qilghan idi. Uningdin kéyinla, wén jyabaw bu siyasetni derhal cheklep, yézilarda chong qalaymiqanchiliq peyda bolushning aldini aldi, dep teshwiq qilin'ghanda, xu jintaw yene bir qétim mat boldi.

Bu yil, xu jintaw yashlargha qarita 'sériq' qa zerbe bérish siyasitini otturigha qoyup, kompyutérlargha 'yéshil tosma' ornitishni teshebbus qildi. Buninggha 40 milyon yu'en serp qilin'ghan idi. Netijide xu jintaw bu yumshaq détalning patént hoquqi bar amérikidiki bir shirket aldida yene mat boldi. Buningdin bir yil burunmu, xu jintaw awstraliyidiki bir shirketchi xitay bilen béyjingdiki xelq sariyida körüshken idi.

Bir nechche ay ötkendin kéyin, bu zeherlik chékimlik etkeschisi awstraliyide qolgha élinip, xu jintaw taza mat bolghan idi. Yéqinda yene xu jintawning oghli xu xeyféng 'xelq'araliq iqtisadiy ötüshme qurush' dégen nam bilen her qaysi tamozhnilargha x nuri eswaplirini ornatquzup, bu jeryanda 12 milyon 280 ming amérika dolliri tapan heqqi alghanliqi pash qilinip, bu délodimu xu jintaw mat boldi.

Mushu bir nechche kün ichide kishilerni téximu heyran qalduruwatqan bir mesile shuki, gerche xu jintawning 8‏ - ayning 22 ‏ - künidin 25‏ - künigiche bolghan bir nechche kün ichide, ürümchi qatarliq jaylarni tekshürgenliki, ürümchide kadirlar yighinida söz qilip xizmet tapshurghanliqi heqqide, xitay merkizi komitétining zuwani bolghan 'shinxu'a agéntliqi' tekrar - tekrar xewer élan qilghan bolsimu, emma wang léchu'enning kontrolluqidiki shinjang Uyghur aptonom rayonining zuwani bolghan 'shinjang xewer tori' bu heqte téxiche héchqandaq bir tepsiliy xewer élan qilmidila emes, hetta xu jintawning shinjanggha kelgenlikinimu xewer qilmidi.
 
Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet