Түркийә җумһурийити рәиси абдуллаһ гүл уйғур дияриға бармақчи

Түркийиниң әң чоң гезитлиридин бири болған "сабаһ" гезитиниң 6 - айниң 15 - күнидики санида, "дөләт рәиси абдуллаһ гүл 6 - айниң 23 - күни хитайға бариду" мавзулуқ хәвәр елан қилинди.
Мухбиримиз әркин тарим
2009.06.16
TRT-Awaz-qanaliri-Abdulla-Gul-305 Түркийә радйо телевизйә идариси йеңидин тәсис қилған `трт аваз қанили` 3 - айниң 21 - күнидин башлап, оттура асйа түркий җумһурийәтлири, сабиқ йүгославийидин айрилип чиққан җумһурийәтләр вә кавказийигә қаритилған суни һәмра тарқитишини башлиған болуп, түркийә рәис җумһури абдуллаһ гүл қаналниң ечилиш мурасимида.
RFA Photo / Erkin Tarim

Хәвәрдә түркийә җумһурийити рәиси абдуллаһ гүлниң 6 - айниң 23 - күнидин 29 - күнигичә көп кишидин тәркип тапқан бир һәйәт билән хитайда рәсмий зиярәт елип баридиғанлиқи, бу қетимқи зиярәттә икки дөләт оттурисида түзүлгән иқтисадий һәмкарлиқ тохтамнамисиға қол қоюлидиғанлиқи йезилған.

Хәвәрдә түркийә рәиси абдуллаһ гүлниң хитайға елип баридиған зияритиниң бейҗиңдин башлап, шинҗяң уйғур аптоном районида ахирлишидиғанлиқи йезилған.  

"Сабаһ" гезитидә 6 - айниң 15 - күни елан қилинған хәвәрдә йәнә, түркийиниң хитайға пирсәнтлик зайом сетишни ойлаватқанлиқи, шуңа түркийә җумһурийити рәиси абдуллаһ гүлниң хитайға елип бармақчи болған бу зияритиниң интайин муһим икәнлики илгири сүрүлгән. Шуңа абдулла гүлниң бу қетимқи зияритигә иқтисадқа мәсул дөләт министири вә ташқи тиҗарәткә мәсул алий рәһбәрләрму қатнишидиғанлиқи йезилған.

Бу, тунҗи қетим бир түркийә җумһурийити рәисиниң уйғур дияриға елип барған зиярити болиду. Ишәнчилик мәнбәләрдин алған мәлуматларға қариғанда, сабиқ рәис җумһури турғут өзал вә сулайман демирәлләр хитайға елип барған зиярити җәрянида уйғур дияриға беришни тәләп қилған болсиму, хитайлар қобул қилмиған икән.

Биз бу зиярәт һәққидә көз қаришини елиш үчүн түркийә әгә университети оқутқучиси профессор доктор алимҗан инайәт вә түркийә - хитай мунасивити мутәхәссиси түркийә аднан мәндәрәс университети оқутқучиси доктор сәлчуқ чолақоғлу билән сөһбәт елип бардуқ.

Юқиридики аваз улинишидин, бу сөһбәт хатирисиниң тәпсилатини аңлайсиләр.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.