Абдуреһим һаҗим төгә вә униң иш - излири

Ана вәтәндин айрилип, мусапирлиқ дәрдидә дуняниң һәр қайси җайлириға берип панаһланған уйғурларниң сәргүзәштилири һәр хил болуп, сәуди әрәбистаниға келип йәрлишип қалған уйғурларниң қизиқарлиқ сәргүзәштилири бардур. Абдуреһим һаҗим төгиму шуларниң қатаридин иди.
Мухбиримиз өмәрҗан тохти
2010.06.03

Сәуди әрәбистаниниң мәккә мукәррәмә шәһиридә турушлуқ әһмәд мөмин әпәнди бу һәқтики сөһбитимизни қобул қилған иди.

Әһмәд мөмин әпәнди билән сөһбәт

Әһмәд мөмин әпәнди абдуреһим һаҗим төгини тонуштуруп мундақ деди: "абдуреһим һаҗим төгә 1949 - йили ана вәтәндин қечип чиқип, 1950 - йиллири сәуди әрәбистаниға келип йәрлишип қалған икән. Мән бу адәмни 1980 - йили тунҗи қетим киргинимдә 60 яшлар чамисида көргән идим. Хош сөһбәтлик, чиқишқақ вә кичик пеил киши болуп, бешидин өткәнлири вә уйғурлар һәққидә ибрәтлик қиссиләрни сөзләп берәтти."

Абдуреһим һаҗим төгиниң сәуди әрәбистандики һаяти

Әһмәд мөмин әпәнди абдуреһим һаҗим төгиниң сәуди әрәбистандики һаяти һәққидә тохтилип мундақ деди: " абдуреһим һаҗим төгә сәуди әрәбистандики көп санлиқ уйғурларға нисбәтән оқумушлуқ, аңлиқ вә сәвийилик кишиләрниң бири иди. Өзи китаб хумар болуп, башқиларда тепилмиған уйғурчә китабларниң толиси бу кишиниң өйидики китабханисидин тепилар иди. Һәтта вәтәндә әмди нәшрдин чиққан йеңи китабларму бу адәмниң китабханисидин тепилатти. Бу киши сәуди әрәбистаниниң таиф шәһиригә йәрлишип қалған болуп, шәһәр мәркизидә дукан ачатти."

Абдуреһим һаҗим төгиниң вәтәнпәрвәрлики

Әһмәд мөмин әпәндиниң ейтишичә, абдуреһим һаҗим төгә худди муһаҗирәттики башқа уйғурларға охшаш һәмишә ана вәтәнниң ғемини йәйдиған, уйғурлардин ярдәмгә муһтаҗларға ярдәм қилидиған, йетимларниң бешини силайдиған, хәйр  - сахавәтлик кишиләрдин бири икән. У кишини билидиғанлар һәмишә униң яхшилиқлирини сөзләйдикән вә иш - излирини махтайдикән.

Абдуреһим һаҗим төгиниң вапати

Әһмәд мөмин әпәндиниң ейтишичә, абдуреһим һаҗим төгә сәуди әрәбистандики һаяти өмриниң ахириғичә өз вақтида уйғурлар әң көп йәрләшкән район таиф шәһиридә өткүзүп 1993 - йили шуҗайда вапат болған икән.

Юқиридики аваз улинишидин, бу һәқтики мәлуматимизниң тәпсилатини аңлайсиләр.


Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.