Әрздар абдуреһим молләк ака йәр мәсилиси билән 12 ‏-қетим йәнә бейҗиңда

Йеңи мәйдан башлиқи униң йәр мәсилисини бир тәрәп қилиш җәрянида, пәқәт униң 4 оғлиниң җайлиқ йери вә 70 мо терилғу йерини һәл қилип бәргән. Әслидә абдуреһим акиниң қолидин тартивелинған йәрниң омуми көлими 220 мо болуп, абдуреһим ака мәсилиниң бу хил һәл болушидин рази болмиған. У қолидин кәткән йерини толуқ қайтурувелиш мәқситидә өткән һәптә бейҗиңға 12-қетим сәпәр қилип, әрзини қайтидин башлиған.

Абдуреһим ака боз йәр ечип терилғу йәр көлимини 220 моға йәткүзүш җәрянида, 20 йилға йеқин вақит сәрп қилған. Банкидин көп миқдарда қәрз елип, дәсмайә салған. 1998 ‏-Йили униң терилғу йәрлири қолидин тартивелинип, гәнсудин кәлгән хитай көчмәнлиригә бериветилгәндә, у 5 оғли билән бирликтә җай-макансиз вә йәрсиз қалған. У униңдин кейинки һаятини әрз ишлири билән өткүзүп йәнә көплигән қәрзләргә боғулған. Биз абдуреһим ака билән бир айниң алдида сөзләшкинимиздә, 220 мо йери толуқ қолиға қайтип кәлмәй туруп, өзи вә пәрзәнтлириниң вәйранчилиқтин қутулалмайдиғанлиқини билдүргән.

Абдуреһим ака 12 ‏-қетимлиқ әрз сәпири үчүн йолға чиққанда, йәрлик даириләр уни йолидин тосушқа йәнә урунуп баққан, әмма у, йәрлик даириләрниң алдаш вә қаймуқтурушлирини байқивелип, йолидин янмиған вә өткән һәптә бейҗиңға йетип кәлгән.

Абдуреһим акиниң бейҗиңда униңға һәмраһ болуп туруватқан оғлиниң билдүрүшичә, мәйдан башлиқи хән җяменниң зораванлиқлири уларниң аилисини иқтисадий җәһәттин вәйранчилиққа учритипла қалмай, абдуреһим акини роһий җәһәттинму қаттиқ азаблиған. Гәрчә, хән җямен вәзиписидин елип ташланған болсиму, абдуреһим ака хән җямендин тартқан азаб вә хорлуқлирини техичә есидин чиқиралмиған.