Мейип яш абдушүкүр қурбан дөләтни парчилаш гумани билән тутқун қилинған

Уйғур елиниң һәрқайси җайлирида сийасий бесим күчәймәктә. Сүрәттә, қәшқәр кочилирида чарлаш елип бериватқан хитай қоралиқ сақчилири.

Хитай қанунлири буйичә, тутқунниң тутулуш сәвәби, тутулуп туруватқан орни қатарлиқ мәлуматлар тутқунниң аилисигә дәсләпки 24 саәт ичидә билдүрүлүши керәк. Әмма, абдушүкүрниң аилиси, униң тутқун қилинғанлиқини шу күни билгән болсиму, йеңи һаят түрмисигә қамалғанлиқини 5 күндин кейин уққан.

Игилигән мәлуматлиримизда, абдушүкүр қурбанниң, уйғур районида йүз бәргән мәлум бир сиясий делоға четишлиқ дәп қарилип тутқун қилинғанлиқи; сорақ җәрянида абдушүкүрниң сақчиларниң гуманини инкар қилғанлиқи, сақчилар гуманини испатлаш үчүн абдушүкүр билән шерик дәп қаралған иккинчи бир гумандарни издәватқанлиқи мәлум.

Бу һәқтә тәпсилий мәлуматқа еришиш үчүн ғулҗа шәһәрлик сақчи идарисиниң сиясий бөлүмигә телефон қилдуқ. Сақчи хадими сөзлири арқилиқ абдушүкүр четишлиқ делониң сияси дело икәнликини ашкарилиса, йәнә бир тәрәптин делониң сиясиликини йошурмақта. Әмма, абдушүкүр аилиси түнүгүн тапшурувалған уқтурушта, делониң сиясий дело икәнлики очуқ баян қилинған.

Абдушүкүр қурбан 1995 ‏ - йили бир қетим қатнаш вәқәсигә йолуқуп җисманий җәһәттин еғир зәхмиләнгән вә һөкүмәт тәрәптин 2 ‏ - дәриҗлик мейип дәп тизимланған. Шуңа униң аилиси абдушүкүрниң әһвалидин җиддий әндишә қилмақта.

Абдушүкүрниң йеқинлири, абдушүкүрниң саламәтлик әһвали вә аилә қийинчилиқини баян қилип, уни кепилликкә қоюп беришни тәләп қилған; тәләп рәт қилинған. Биз байиқи сақчи хадимидин, абдушүкүрниң мейиплиқи сәвәблик сорақ вә солақханида пәрқлиқ муамилигә еришәләйдиған яки еришәлмәйдиғанлиқини соридуқ.

Һөрмәтлик оқурмәнләр, бирләшкән дөләтләр тәшкилатиниң мейип һәқлири келишимидә, мейипларниң сиясий, иқтисадий вә иҗтимаий һаятта нормал кишиләр игә болған һәқ ‏ - һоқуқлардин башқа йәнә, уларниң җәмийәт тәрипидин қоғдилиши, асрилиши вә етибарға еришиши керәклики бәлгиләнгән.

Биз буниңдин кейинки программилиримизда абдушүкүр қурбанниң әһвали һәққидә давамлиқ мәлумат йәткүзүшкә тиришимиз.