Méyip yash abdushükür qurban döletni parchilash gumani bilen tutqun qilin'ghan

Xitayning muqimliq endishisi bilen élip bériwatqan xalighanche tutqun qilish heriketliri olimpiktin kéyin izchil dawamlashmaqta. Ghulja shehirining penjim yézisidiki méyip yash abdushükür qurbanning 21 - noyabir küni kechte tutqun qilinish ehwali weziyetning jiddilikidin bisharet bermekte.
Muxbirimiz shöhret hoshur
2008.11.26
Qashqer-saqchi-305 Uyghur élining herqaysi jaylirida siyasiy bésim kücheymekte. Sürette, qeshqer kochilirida charlash élip bériwatqan xitay qoraliq saqchiliri.
AFP Photo

Xitay qanunliri buyiche, tutqunning tutulush sewebi, tutulup turuwatqan orni qatarliq melumatlar tutqunning a'ilisige deslepki 24 sa'et ichide bildürülüshi kérek. Emma, abdushükürning a'ilisi, uning tutqun qilin'ghanliqini shu küni bilgen bolsimu, yéngi hayat türmisige qamalghanliqini 5 kündin kéyin uqqan.

Igiligen melumatlirimizda, abdushükür qurbanning, Uyghur rayonida yüz bergen melum bir siyasiy délogha chétishliq dep qarilip tutqun qilin'ghanliqi؛ soraq jeryanida abdushükürning saqchilarning gumanini inkar qilghanliqi, saqchilar gumanini ispatlash üchün abdushükür bilen shérik dep qaralghan ikkinchi bir gumandarni izdewatqanliqi melum.

Bu heqte tepsiliy melumatqa érishish üchün ghulja sheherlik saqchi idarisining siyasiy bölümige téléfon qilduq. Saqchi xadimi sözliri arqiliq abdushükür chétishliq déloning siyasi délo ikenlikini ashkarilisa, yene bir tereptin déloning siyasilikini yoshurmaqta. Emma, abdushükür a'ilisi tünügün tapshuruwalghan uqturushta, déloning siyasiy délo ikenliki ochuq bayan qilin'ghan.

Abdushükür qurban 1995 ‏ - yili bir qétim qatnash weqesige yoluqup jismaniy jehettin éghir zexmilen'gen we hökümet tereptin 2 ‏ - derijlik méyip dep tizimlan'ghan. Shunga uning a'ilisi abdushükürning ehwalidin jiddiy endishe qilmaqta.

Abdushükürning yéqinliri, abdushükürning salametlik ehwali we a'ile qiyinchiliqini bayan qilip, uni képillikke qoyup bérishni telep qilghan؛ telep ret qilin'ghan. Biz bayiqi saqchi xadimidin, abdushükürning méyipliqi seweblik soraq we solaqxanida perqliq mu'amilige érisheleydighan yaki érishelmeydighanliqini soriduq.

Hörmetlik oqurmenler, birleshken döletler teshkilatining méyip heqliri kélishimide, méyiplarning siyasiy, iqtisadiy we ijtima'iy hayatta normal kishiler ige bolghan heq ‏ - hoquqlardin bashqa yene, ularning jem'iyet teripidin qoghdilishi, asrilishi we étibargha érishishi kérekliki belgilen'gen.

Biz buningdin kéyinki programmilirimizda abdushükür qurbanning ehwali heqqide dawamliq melumat yetküzüshke tirishimiz.


Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.