Үчәй ракиға гириптар болған ана ақ қан кесили билән ағриған оғли абдувәлини қутқузувелишни мураҗиәт қилди

Сүрәт, ақ қан кесилигә гириптар болған 8 йашлиқ абдувәлиниң балиларға хас омақ күлкиси гәвдиләнгән дохтурханидики сүрити.

Бүгүн үчәй ракиға гириптар болған болсиму, оғлини қутқузуш үчүн давалинишни рәт қилған розинисахан ханим вә униң уруқ - туғқанлири, радиомиз уйғур бөлүминиң зияритини қобул қилип, дуняниң һәр қайси җайлиридики уйғур қериндашлиридин нарәсидә абдувәлиниң кесилини давалашқа сахавәт қолини сунушни мураҗиәт қилди.

Тәңритағ тор бетидә елан қилинған ақ қан кесилигә гириптар болған 8 яшлиқ абдувәлигә аит хәвәрдики Чачлири чүшүрүветилип, химийилик давалашни қобул қиливатқан абдувәлиниң, балиларға хас сәби омақ күлкиси билән, тикилип турған рәсимини көргән кишиләр бу аилиниң бешиға шу қәдәр еғир күлпәтләрниң кәлгинини тәсәввур қилалмиса керәк.

Тәңритағ тор бетиниң мухбири ниҗат нияз тәрипидин йезилған бу хәвәрдә дейилишичә, һазир уйғур аптоном районлуқ хәлқ дохтурханиси универсал балнист бөлүми йәттинчи қәвәт балилар бөлүми 37 - каривитида, ақ қан кесилигә гириптар болғини үчүн, химийилик давалинишни қобул қиливатқан 8 яшлиқ абдувәлиниң дадиси 2008 - йили йүрәк кесили билән қаза қилған, аниси рузиниса ханимму 2008 - йили 11 - айда түз үчәй ракиға гириптар болуп, үчийи оператсийә қилинған. Иқтисади начар болған розинисахан уруқ ‏ - туғқанлириниң ярдимидә кесилини давалитиватқан мәзгилдә, 2010 - йили 1 - айда оғли абдувәлиниң қан ракиға гириптар болғанлиқини билгән. Еғир кесәл азабини тартиватқан розинисахан оғли абдувәлини қутқузуш үчүн өз кесилини давалитиштин ваз кечип, оғлини қутқузушқа иқтисад топлаш үчүн юртиға кәткән.

Биз тор бетидә қалдурулған адрес вә телефон номурлири бойичә, абдувәли давалиниватқан кесәлхана һәм рузиниса ханимниң хотәндики аилисигә телефон қилиш арқилиқ, абдувәлиниң кесилини давалитиш үчүн дохтурханида җийәнигә қараватқан, рузиниса ханимниң иниси тохти йүсүп, кесәлханидики бимарлар, хотәндә оғли үчүн пул топлаватқан розинисахан һәм униң сиңлиси қатарлиқлар билән сөһбәтлишиш пурситигә игә болдуқ.

Абдувәли давалиниватқан балнистниң телефонини урғинимизда, телефонимизни дәл абдувәлигә қараватқан тохти йүсүп өзи алди. Тохти йүсүп мухбирниң телефонни америкидин әркин асия радио истансисидин уруватқанлиқини билгинидин кейин, зияритимизни қобул қилидиғанлиқини билдүрүп, нөвәттә өзлириниң ачиси һәм униң оғли абдувәлиниң кесилини давалитиш үчүн уруқ ‏ - туғқанларниң ярдимидә пүтүн иқтисадини топлап дохтурханиға кәлгәнликини сөзләп бәрди.

Тохти йүсүп, абдувәлиниң кесилини давалитиш үчүн һәр қетимлиқ химийилик давалашқа 5000 йүәндин һесаблиғанда, тәхминән 200 миңдин 300 миң йүәнгичә хәлқ пули кетидиғанлиқини, һазир җәмийәттин ианә қилинған пулниң 10 миң йүән хәлқ пулиға йәткәнликини баян қилди.

Зияритимизни қобул қилған рузиниса ханим өзиниң 26 яшқа киргәнликини, бу икки йил илгири әмдила 28 яшқа киргән ериниң йүрәк клапани кеңийип кәткәнлик сәвәбидин, давалаш үнүм бәрмәй өлүп кәткинини, арқидин өзиниң түз үчәй ракиға гириптар болуп, туғқанлириниң ярдимидә кесәл давалитиватқан мәзгилдә, оғлиниң бу кесәлгә гириптар болғинини билгинидин кейин, һазир өзиниң пул топлаш учун юртиға кәлгәнликини, һазирғичә 3600 йүән хәлқ пули йиғилғанлиқини баян қилди.

Оғлини қутқузуш үчүн өз кесилини давалитиштин ваз кәчкәнликини билдүргән рузиниса ханим, өзиниң ери өлүп кәткәндин кейин, икки оғли билән һаятлиқ үчүн тирмишиватқанлиқини, һазир өзиниң пәқәт ашу нарәсидә оғли абдувәлини қутқузувелиш арзусиниңла барлиқини, шуңа яхши нийәтлик кишиләрниң ярдәм қулини сунушини үмид қилидиғанлиқини мураҗиәт қилди.

Рузиниса ханимниң сиңлиси зияритимизни қобул қилғинида, ачисиниң вә униң оғлиниң кесилини давалитиш үчүн бу аилиниң барлиқ иқтисадий қудритидин айрилғанлиқини, нөвәттә пәқәт җәмийәттин келиватқан ианигила тайинип қеливатқанлиқини билдүрди.

Рузиниса ханимниң сиңлисиниң билдүрүшичә, һазир уларға ярдәм қолини сунғучилар йәнила ашу авам уйғур қериндашлар икәнликини, нөвәттә өзлириниң наһийә тәвәсидики мунасивәтлик һөкүмәт идарилириға, ачиси вә униң оғлини қутқузувелишқа иқтисадий ярдәм тәләп қилип, хәт язған болсиму, лекин мейиплар идариси қатарлиқ җайлардин пәқәт турмуш мәсилисини һәл қилишқа ярдәм бәргәнликини, башқа җайлардин һелиғичә хәвәр кәлмигәнликини баян қилди. Мухбир униңдин аптоном район дәриҗилик идариләрдин ярдәм сорап хәт язған яки язмиғанлиқини сориғинида, у һазирчә техи улардин ярдәм сорап хәт язмиғанлиқини билдүрди.

Қәдирлик оқурмән достлар, төвәндикиси абдувәлиниң аниси рузиниса ханимниң адреси, мунасивәтлик телефон номури һәм банка һесабат номури, ярдәм қилғучиларниң абдувәлиниң туғқанлири билән биваситә алақилишишини үмид қилимиз.
 
Абдувәли ятқан балнистниң телефон номури: 011 - 86 - 991 - 8521894
Абдувәли ятқан балнистниң адреси: үрүмчи уйғур аптоном районлуқ хәлқ дохтурханиси универсал балнист бөлүми 7 - қәвәт балилар бөлүми 37 - кариват ( тохти йүсүп арқилиқ алақилишиң).

Абдувәлиниң аниси рузиниса ханимниң хотәндики өйиниң телефон номури : 011 - 86 - 903 - 2960702
Абдувәлиниң аниси рузиниса ханимниң хотәндики өйиниң адреси: хотән наһийә сеғизкөл йеза мияңхоҗа кәнт тохти сәйпуң аилиси.

Тәңритағ уйғур ториниң абдувәлигә вакалитән тәсис қилған почта аманәт банкисиниң карта номури: 6210988810000034808

Юқиридики аваз улинишидин, бу һәқтики мәлуматимизниң тәпсилатини аңлайсиләр.