Xoten nahiyilik hökümet shert bilen abduweli we rozinisaxanning dawalinish chiqimini kötürüshke bashlighan

Süret, aq qan késilige giriptar bolghan 8 yashliq abduwelining balilargha xas omaq külkisi gewdilengen doxturxanidiki süriti.

Shundin kéyin, dunyaning herqaysi jayliridiki Uyghurlar bu ana - balining késilini dawalitishqa i'ane toplap, öz xeyrixahliqini yetküzgen idi. Igilishimizche, hazir xoten nahiyilik hökümet chet'ellerdiki Uyghur teshkilatlirining yardimini qobul qilmasliq sherti bilen, bu ana - balining dawalinishigha yardem bermekte iken.

Biz bügün, abduweli we uning anisi rozinisaxandin ehwal sorash hemde abduweli qatarliq balilarning balilar bayrimini tebriklesh meqsitide, rozinisaxanning xotendiki a'ilisige téléfon qilduq. Melum boldiki, abduweli doxturxanida iken. Ziyaritimizni qobul qilghan rozinisaxanning xotendiki tughqanliri, hazir rozinisaxanningmu oghli abduweli bilen bille ürümchide dawaliniwatqanliqini bildürdi.

Ularning bildürüshiche, rozinisaxanlar a'ilisi herqaysi jaylardiki Uyghurlar i'ane qilghan pullarni tapshuruwalghandin kéyin, yéza bashliqi ularning öyige kélip, chet'ellerdiki Uyghurlarning yardem ehwalini sürüshtürgen. Yéza bashliqi yene, bundin kéyin ularning jem'iyettin yardem sorimasliqini tewsiye qilghan we ana - bala ikkiylenning dawalinish xirajitini nahiyilik hökümet üstige alidighanliqini wede qilghan.

Abduweli yatqan aptonom rayonluq xelq doxturxanisigha téléfon qilghinimizda, téléfonimizni alghan rozinisaxanning inisi toxti yüsüp, özliri torda muraji'etname élan qilghandin kéyin, abduweli we uning anisi rozinisaxanning dawalash chiqimini xoten nahiyilik hökümet kötürüwatqanliqini bildürdi.

Toxti yüsüp bizge, xoten nahiyilik hökümetning ulargha xelqtin kélidighan i'ane pulgha qoyghan cheklimiside, chet'ellerdiki teshkilatlarning yardimini qobul qilmasliqni telep qilghanliqini, emma xelqtin qobul qilinidighan i'anige hazirche cheklime qoyulmighanliqini ilgiri sürdi.

Söhbet jeryanida toxti yüsüp, abduweli yatqan késelxanida abduwelidin bashqa yene abdusalam we muzepper isimlik ikki bala barliqi, bu balilarning öz xirajiti bilen dawaliniwatqanliqini bildürdi.

Rozinisaxan bilen söhbetlishish imkaniyiti bar - yoqluqini sorighinimizda, toxti yüsüp, hazir rozinisaxanning yénida téléfon yoqluqini bildürdi. Emma u, késelxanidiki balilarning ziyaritimizni qobul qilalaydighanliqini bildürüp, téléfonni balilargha berdi.

Balilardin abduweli hem abdusalam ziyaritimizni qobul qilip, özlirining balilar bayrimini qandaq ötküzüsh pilanlirini bayan qildi.

Toxti yüsüp yene, muzepperning éghizi etrapida yara bolghini üchün, ziyaritimizni qobul qilalmaydighanliqini bildürdi.

Yuqiridiki awaz ulinishidin, bu heqtiki melumatimizning tepsilatini anglaysiler.