Boks térinéri ablikim abduréshit Uyghur xelqining ghururi idi

Ablikim abduréshit bala waqitliridin bashlap bokschiliqni yaqturatti. Tashlinip qéliwatqan Uyghur tenterbiye ma'aripini güllendürüshni arzu qilatti. Uyghurlarning beden süpitining töwenlep kétiwatqanliqi, jismaniy beden tereqqiyatining rohi saghlamliqni yoqitiwatqanliqi uni azablaytti. U 1994-yili nurghun qiyinchiliqlarni yéngip ming bir japa-musheqqette hazirqi bokschilarni terbiyilesh etritini qurup chiqti. 20 Yilliq japaliq tirishish netijiside 20 din artuq yétishken boks tenheriketchisini terbiyilep yétishtürdi. Uning terbiyiligen shagirtliri ilgiri-axir bolup besh qétim sidnéy, aténa we béyjing qatarliq sheherlerdiki olimpik musabiqilirige qatnashqan bolup, uning boks etriti xitay dölitide we dunyadiki bashqa herqaysi döletlerde bolup jem'iy 60 tin artuq boks altun médaligha érishken.

Ablikim abduréshit, bir telepchan ustaz, millet söyer merd ezimet, belki köyümchan dada bolupla qalmay, Uyghur boks cholpanlirining hem kesip, hem hayattiki yolini yorutqan, ularning millet üchün ghurur we sherep qazinishi, cholpan bolushidiki tüwrük idi. Ablikim abduréshitning shagirtliridin, Uyghur boks cholpini abdushükür mijit merhumning hayati heqqide toxtilip, bashqilar 40 yilda basidighan yolni ustazining bashchiliqida, Uyghur boks etritining 20 yilda basqanliqini éytip, merhumning hayat töhpilirige yuqiri baha berdi.

Uyghur tenterbiye ma'aripini güllendürgen, Uyghurlarning tenterbiye ma'aripini xelq'ara sehnige élip chiqqan, milletning shan-sheripi üchün kéche‏-kündüz özini untup, barliqini béghishlap ishligen, Uyghur yashlirining jismaniy jehettiki yoshurun küchini qézip chiqip, ularni özige ishench, gheyret we jasaret turghuzushqa bashlighan söyümlük ustaz ablikim abduréshitning waqitsiz wapati Uyghur xelqini qattiq échindurdi. Merhumning méyit namizigha qatnashqan bir Uyghur, Uyghur xelqining, milletning ghururi we shan sheripini tiklesh üchün pidakarliq körsetken ezimetlerni hergiz untumaydighanliqini we ular üchün du'a qilidighanliqini bildürdi.