Aptobus weqeliri xitayni sarasimge salmaqta

21 - Iyul, düshenbe küni, künming shehiridiki aptobus partlash weqesi neq meydanidin bir körünüsh.

 Tünügün yene oxshash waqitta béyjingdiki 436 ‏ - yolida qatnaydighan bir bolkiwayda, yalghan bomba weqesi yüz bérip saqchilar sarasimge chüshken. Bu ikki weqening künmingdiki aptobus partlitish weqesi téxi bir terep qilinmay turup yüz bérishi xitayning bixeterlik weziyitini közetküchilerning diqqitini tartmaqta.

Shangxeydiki aptobus partlash weqesi we béyjingdiki yalghan bomba weqesi chet'eldiki xitay öktichilirining axbarat wastiliridin biri bolghan boshün torida élan qilindi. Xewerde weqe mundaq teswirlinidu: etigen sa'et 10 mezgili, shangxeyning yen'en yolida kétiwatqan aptobus wuyi yoli doqmushigha kelgende, aptobusqa ushtumtut ot kétidu, aptobus 10 métir yüksekliktiki qoyuq is - tütekning ichide qalidu, arqisidin qattiq partlash awazi chiqidu. Etrapta qatnash patparaqchiliqi peyda bolidu.

Xewerde béyjingdiki yalghan bomba weqesi mundaq bayan qilinidu : 436 ‏ - yoldiki shopur bolkiwayda bir mustehkem oralghan yeshikni köridu, yeshik shopurda guman tughduridu, shopur saqchigha ehwalni melum qilidu. Etrapni térrorgha qarshi jeng hawasi qaplaydu. Xewerde bayan qilinishiche, saqchilar, bolkiway etrapida cheklen'gen rayon peyda qilip, 1 sa'ettin artuq jiddiy we éhtiyatliq tekshürüshtin kéyin, yeshikning bir qeghez yeshik ikenlikini, peqet wehime peyda qilish üchün bomba sheklide ténglighanliqini bayqighan. Tünügün yüz bergen bu ikki weqe heqqide xitay da'iriliri we axbarati héchqandaq ipade bildürmidi.

Emma, shinxu'a agéntliqining bügünki xewiride shangxey saqchilirining bir térrorluq guruppisini pash qilghanliqini xewer qildi. Emma bu guruppining qachan, qeyerde, qandaq weqe bilen qanche kishi qolgha élin'ghanliqi xewerde bildürülmidi. Shinxu'a agéntliqi bu xewerni béyjing olimpik komitéti shangxey shöbisining bixeterlik ishliri mes'uli Cheng Jiulong bergen melumatqa asasen xewer qilghan. Cheng Jiulong Sözide, " biz bir guruppa térrorchilarni tutqun qilduq hem bésiqturduq. Olimpik meydanlirimiz nöwette bixeter halette" dégen arqidin térrorluq tehditining yenila mewjut ikenlikini eskertken. Béyjing olimpikining 12 meydan putbol musabiqisi shangxeyde ötküzilidu. Shunga xitay, bixeterlik ishlirida shangxeyge alahide köngül bölmekte.

Shangxeyde aldinqi aydimu bir qétim aptobus partlash weqesi yüz bergen. U chaghda saqchi da'iriliri weqeni partlitish emes ot kétish weqesi dep körsetken hem weqe peyda qilghuchining nérwisidin adashqan kishi ikenlikini bildürgen idi.

Nöwette, xitayni bixeterlik ishlirida eng sarasimge séliwatqini aptobus weqeliridur. Kunmingda aptobus partlatqanlar heqqide yip uchigha érishelmigen saqchilar deslep pash qilghuchilargha 100 ming som mukapat béridighanliqini bildürgen idi, bu sommini da'iriler aldinqi küni 300 ming somgha chiqarghan. Ötken hepte Uyghur rayonluq kocha saqchi idarisimu térrorchilarni pash qilghanlargha 250 ming yüen mukapat béridighanliqini élan qilghan.

Ürümchide taksigha chiqquchilargha somka axturush ötkili qoyulghan.Shangxey dölet bixeterlik idarisining mes'uli Hu Shunkang, olimpik putbol meydani etrapidin ötidighan ammiwiy aptobuslargha 1500 közitish apparati orunlashturghanliqini bildürgen.

Xitay da'iriliri nöwette,, aptobus we ayropilan weqelirini eng xeterlik heriket dep qarimaqta. Bu xil heriketlerni bir qisim közetküchiler, xitaygha qarshi küchler talliwalghan yol emes, belki mejburlan'ghan yol dep körsetmekte.