Qeshqerde bir Uyghur 6 neper xitayni pichaq bilen yarilandurdi

Shinxu'a agéntliqi seyshenbe künidiki xewerliride qeshqerde bir kishining 6 kishini pichaq bilen yarilandurghanliqi, weqe sadir qilghuchining saqchilar uni tutush üchün qorshap kelgende özining gélige pichaq sürüp ölüwalghanliqidek bir weqening meydan'gha kelgenlikini xewer qildi. Emma xewerde weqeni sadir qilghuchi we yarilan'ghanlarning kimliki heqqide héchqandaq melumat bermigen.

Bu weqe derhal birleshme agéntliqi, bbs we fransiye agéntliqigha oxshash xelq'araliq uchur agéntliqliri teripidin tarqitildi.

Biz weqe heqqide tepsiliy melumat élish üchün qeshqerdiki melum bir dukan'gha téléfon qilduq. Téléfonimizni alghan bir xitay oqughuchi bizning so'allirimizgha jawab bérip, weqening qeshqer shehiridiki gherbiy rayon meydanida sadir bolghanliqini, öyge qaytqanda shu yoldin mangidighan bir qanche sawaqdishining weqeni körgenlikini bayan qilip berdi.

Uning éytishiche, weqeni sadir qilghuchi Uyghur bolup, weqede yarilan'ghanlar hemmisi xitay iken. Bu xitay oqughuchi yene, yarilan'ghanlarning arisida bir oqughuchi, bir yashan'ghan boway we bir ayal kishi barliqini bilidighanliqini, ularning doxturxanida dawaliniwatqanliqini éytip berdi.

Biz arqidin qeshqer da'iriliridin ehwal igilep béqish üchün qeshqerdiki yarbagh saqchixanisigha téléfon qilduq.

U saqchi bizge weqe sadir qilghuchining Uyghurluqini, emma uning néme üchün weqeni sadir qilghanliqigha da'ir tepsilatni bilmeydighanliqini, bu heqte özlirige melumat bérilmigenlikini bayan qildi.

Yuqiriqi saqchi weqening arqa körünüshi heqqide bir nerse déyishtin özini qachurup, buni peqet “Bir uqushmasliqtin kélip chiqqan jédel” dep körsitishke tirishti. Hetta shinxu'a agéntliqimu weqening xaraktéri hem weqege chétishliq milliy terkibler heqqide uchur bérishtinmu éhtiyat qildi.

Biraq, xelq'ara axbarat wasitiliri hemmisi dégüdek weqeni Uyghur rayonida yürgüzülüwatqan éghir bésim siyasiti we xitay köchmenlirining Uyghur rayonigha toxtimay kirip, Uyghurlarning xizmet we yashash imkanlirini igiliwélishi bilen baghlap chüshendürgen.

Bu weqe heqqide chet'ellerdiki Uyghur teshkilatlirimu éniq köz qarash we bahagha igidur.

Amérika Uyghur birleshmisining mes'ulliridin biri alim séytof ependi bu heqte ziyaritimizni qobul qilip, buning adettiki bir majira bolush éhtimalining intayin kichiklikini, hazir xitay hökümitining Uyghur rayonida künsayin éship bériwatqan bésim siyasiti netijiside künsayin éghirlishiwatqan milliy mesile bilen zich baghlinishliq ikenlikini ilgiri sürdi.