Әйдиздин сақлинишниң чариси зинадин йирақ туруштур

Әйдиз кесили һазирқи әсирниң елип кәлгән бәхтсизликлиридин әң ямини болуп, нурғун кишиләрниң һаяти бу иплас ағриқ билән набут болмақта.
Ихтияри мухбиримиз өмәрҗан
2011.12.16
uyghur-elide-eydiz-305.jpg Намәлум әйдиз чекәрмәнлириниң көрүнүши чүшүрүлгән сүрәт.
RFA Аңлиғучиси тәминлигән.

Дуня сәһийә тәшкилати тәрипидин кишиләрни әйдиз кесилиниң хәтиридин агаһландуруш мәқсити билән һәр йили әйдиздин ибарәт бу иплас ағриқниң хәтирини баян қилиш вә униңдин сақлиниш чарилирини оттуриға қоюш ишлири давам қилмақта.

Әйдиз ағриқи үчинчи дуня әллиридә көп


Әйдиздин сақлиниш вә униң хәтиридин агаһландуруш программисиниң оттура шәрқ бойичә тонулған мутәхәссиси профессор хәдиҗә муәлли 2011 - йиллиқ әйдиз доклатида мундақ дәп язған:“өзигә әйдиз вирусини юқтурувалғанларниң сани шималий африқа билән оттура шәрқ дөләтлиридә интайин көп болуп, 2007 - йилдики рәсмий статистикиға асасланғанда, әйдиз кесилигә гриптар болғанларниң сани 380миң адәмгә йәткән. Бирләшкән дөләтләр тәшкилатиниң әйдизниң алдини елиш программиси тәрипидин елан қилинған статистикиға асасланғанда, шималий африқа вә оттура шәрқ дөләтлиридә әйдиз кеслигә муптила болғанлардин аран йүздә 5 пирсәнтила давалиниш имканийитигә игә болалайдикән. Қалғанлири өлүмгә мәһкум икән. Әрәб дөләтлиридә әйдиз вирусиға йолуққан кишиләрдин йүздә 90 пирсәнтиниң буни һес қилалмай келиватқанлиқи бәкму ечинишлиқ иш.”

Әйдиз вируси зинадин келиду


Дунядики барчә динлар әң аввал инсанларниң бәхт саадитини вә хатирҗәм, дәрт - әләмсиз һаят кәчүрүшини арзу қилиду. Хусусән самави динларниң пәқәт инсанларниң бәхт - саадити үчүн кәлгәнликидә қилчә шәк йоқ. Дуняда һәр қандақ бир дин алди билән кишиләрни зинадин тосиду. Зинани мәни қилмайдиған бирму дин йоқ дуняда. Чүнки зина аилини парчилайдиған, адәмни ағриқчан қилидиған, балиларни йетим қилидиған, муһәббәтни нәпрәткә, җәннәт кәби аилини дозаққа аяландуруп қойидиған яман қилмиштур.

Ислам өлималири әйдиз кесилиниң пәйғәмбәр әләйһиссалам һәдистә агаһландурған хәтәрлик ағриқ икәнликини сөзлимәктә. Пәйғәмбәр әләйһиссалам мундин 1400йил илгири кишиләрни зинаниң хәтиридин агаһландуруп:“қандақла бир милләттә зина - паһишә көп болидикән, уларға илгирикилиригә келип бақмиған кесәллик йетиду” дегән. Һәдистә көздә тутулған“кесәллик”ниң әйдиз икәнликини ислам өлималири сөзлимәктә.

Ислам өлималириға көрә, инсанлар аллаһниң көрсәтмиси бойичә һаят кәчүрүп, өзлирини һарам ишлардин йирақ тутса, улар мундақ иплас ағрилардин вә түрлүк бәхтсизликләрдин әлвәттә аман қалиду.
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.