Albaniyidiki Uyghurlar: weten azadliqi üchün bir kishilik hesse qoshsaq dep oylaymiz
2012.10.08

Bundin alte yil ilgiri gu'entanamo türmisidin azad qilinip albaniyige yerleshken Uyghurlardin töt nepiri hazirmu albaniye paytexti tiranada yashawatqan bolup, ular öylük-ochaqliq bolup perzent yüzi kördi. Xitay hökümitining ularni qayturup kétish pilanliri emelge ashmidi.
Xelq'ara kishilik hoquq teshkilatliri we axbarat wasitilirining gu'entanamo türmisidin qoyup bérilgen bu Uyghurlargha bolghan qiziqishi téxi tügimidi. Töt a'ilidin teshkil tapqan bu kichik Uyghur jem'iyiti özlirige nésip bolghan imkanlardin toluq paydilinip, albaniyide turup Uyghurlar mesilisini xelq'aragha anglitishta qolidin kélishiche tirishchanliq körsetmekte.
7-Öktebir küni biz, tiranadiki Uyghurlardin ababekri qatarliq qérindashlirimizni ziyaret qilduq. Ababekri ependining bildürüshiche, ular albaniyining muhitigha özleshken bolup, goya weten tupraqlirida yashawatqandek xatirjem bir turmushqa ige bolghan. Kanadadiki melum bir filim shirkitige hemrah bolup albaniyige kelgen amérikidiki Uyghur ziyaliysi roshen abbas xanim albaniyide yashawatqan bu Uyghurlarning hazirqi halitidin memnun bolghanliqini bildürdi. U sözide, bu shirket ishlimekchi bolghan bu höjjetlik filimning Uyghurlar mesilisini tonutushni meqset qilghanliqini tilgha aldi.
Uzun mezgil gu'entanamo türmiside riyazet chekken bu kishiler, hazirmu gu'entanamoda qamilip turuwatqan axirqi üch neper qérindishining kelgüsige köngül bölüwatqanliqini we ularning tézrek erkinlikke érishishige tilekdash ikenlikini bildürdi. Gu'entanamo Uyghurlirining mesilisige köngül bölüp kelgen roshen abbas xanimmu ularning teqdirige köngül bölüwatqanliqini ipade qildi. Hazirmu albaniye axbarat wasitiliri we dunyaning herqaysi jayliridin kelgen muxbirlarning ziyaretlirini qobul qilip, Uyghurlar mesilisini dunyagha anglitishqa tirishiwatqan albaniyidiki Uyghurlardin ababekri ependi, özini Uyghur sanaydighan herqandaq kishining weten azadliqi üchün qolidin kélishiche xizmet qilishi lazimliqini tekitlidi we özliriningmu nésip bolghan imkanlardin ünümlük paydilinip, wijdani burchini ada qiliwatqanliqini tilgha aldi.