Türkiye dölet ishliri ministiri ali babajan ürümchi bilen turpanni ziyaret qildi

Shundaqla xitay bash ministiri wén jabaw bilen körüshken. Ürümchi yermenkisige qatnashqan bashqa dölet rehberlirige oxshashla bir échilish nutqi qilghan türkiye dölet ministiri ali babajan bu yermenkige qatnishiwatqan 6 türk shirkitining bölmisini ziyaret qilghan. Arqidin türk ministir üzüm we qoghunliri dunyagha meshhur turpanni ziyaret qilghan. Uyghur diyarini tunji qétim ziyaret qilghan ali babajan, échilish murasimida qilghan sözide munularni dégen:
“Mesilining négizi, Uyghur rayoni bilen türkiye jumhuriyiti ortaq kültür we ortaq tarixqa ige. Mana bu oxshashliq bu ikki rayonining iqtisadi alaqisi üchün zémin hazirlaydu. Bizning bu rayon bilen zich bir iqtisadiy alaqe ornitalaydighanliqimizgha ishinimen. Pütkül Uyghur rayonida, bolupmu ürümchide buni emelge ashurimiz. Uyghur rayoni heqiqeten zich nopusi, yéza igiliki we tebi'iy bayliqliri bilen muhim iqtisadiy ewzelliklerge ige bolghan bir rayon. Kéyinki basquchlarning téximu muweppeqiyetlik bolidighanliqini oylawatimen.”

RFA/Erkin Tarim

Soda yermenkisige qatnashqan babajan xitay metbu'atlirigha bergen bayanatida yene munularni tekitligen:
“Türkiye bilen junggoning siyasiy we iqtisadiy alaqisi barghanche qoyuqlashmaqta. Tijaritimizning hejmi zoraymaqta. Emma Uyghur rayoni bilen bolghan alaqige qaraydighan bolsaq, iqtisadiy reqemlirimizning éghizgha alghuchiliki yoq. Türkiyini chiqish qilghinimizda, bu soda yermenkisining Uyghur rayoni bilen türkiye jumhuriyiti otturisidiki iqtisadiy alaqining küchiyishige hesse qoshalishigha ishinimen.”

Türkiyining dölet ministiri ali babajan ependi muxbirlargha bergen bayanatida türkiye bilen Uyghur diyari otturisidiki munasiwettin ümidwar ikenlikini bayan qilip mundaq dégen:
“Hemmeylenning qarishiche, türkiye bilen Uyghur rayonining munasiwitining qoyuqlishishi bir qizghin keypiyat hasil qilalaydu. Eger heqiqeten bu rayonda türk meblegh salghuchilargha xas türkiye sana'et rayoni namida ayrim bir rayon qurulidighanla bolsa, biz pütün küchimiz bilen türkiyidiki meblegh salghuchi karxanichilarni bu rayon'gha meblegh sélishqa qiziqturimiz. Türk karxanilirining bu rayonda ishlepchiqirish élip bérishini qollaymiz. Shuning bilen birge kéyinki qedemlirimizde ikki rayonning soda alaqisi üchün alahide töhpe qoshushqa tirishimiz”.

Rastinila türkiye dölet ministiri ali babajan dégendek türkiye bilen Uyghurlar otturisidiki ortaq medeniyet ortaq tarix ikki dölet otturisidiki iqtisadiy munasiwetning tereqqiy qilishigha ortaq zémin hazirlap bérelemdu? tataristan bilen türkiye otturisidiki iqtisadiy munasiwetke oxshash bir munasiwet ornitish mumkinmu? xitayning türk shirketlirining Uyghur diyarigha meblegh sélishini ching könglidin xalamdu? dégen'ge oxshash so'allargha jawab tépish üchün türkiye istratégiyilik tetqiqat merkizi mutexessisi dr erkin ekrem ependige mikrofonimizni uzattuq.