Almata shehirining dostluq yézisida mektep püttürüsh murasimi ötküzüldi

Mezkur tentenige jemiyetlik birleshmiler, aliy oqush orunliri, ammiwiy axbarat wasitiliri wekilliri, ziyaliylar, ata - anilar we köp sanda ustaz we oqughuchilar qatnashti. Éytmaqchi, ötkenki programmilirimizning biride biz radi'o anglighuchilarni almata shehiri türksib nahiyisining mesim yaqupof namidiki 101 - mektep - gimnaziyisining bir tutash milliy émtihanda yetken utuqliridin xewerdar qilghan iduq. Yéqinda bu émtihanning axiriqi yeküni chiqip, buningdin tashqiri shawket ömerof mudirliq qiliwatqan 153 - mektep - gimnaziyisi uchumkarliridin yene üch balining, shu jümlidin nuraxun hakimof, ilmira asimjanowa we zulfiye buralqiyéwalarning, shundaqla almata wilayiti yerkent nahiyisige qarashliq penjim yézisining a.Rozibaqiyéf namidiki ottura mektipining uchumkari muhebbet turdiyéwa hem talghir nahiyisi tuzdibastaw yézisining 31 - ottura mektipi uchumkari saniyem abdumasarowalarningmu “Altun belge” sahibi atalghanliqi éniqlandi. Melum bolushiche, qazaqistan boyiche “Altun belge”ge namzat 5761 uchumkarning peqet 1401i émtihan yeküni boyiche özlirining heqiqetenmu elachi ikenlikini delilligen. Uyghur tilida bilim béridighan mekteplerni bu yili 1202 bala tamamlighan bolsa, shularning ichidin sekkiz uchumkar “Altun belge” ge ige bolghan.

Dostluq mehelliside ötken tentenide sözge chiqqanlar Uyghur tilida bilim béridighan mekteplerning érishken utuqlirini alahide tekitlidi. Bu heqiqetenmu peqet bir mektepningla emes, belki pütkül qazaqistanliq Uyghurlarning toyi, cheksiz xoshalliqi boldi. Mezkur murasimda jumhuriyetlik Uyghur étno - medeniyet merkizining re'isi sheymerdan nurumof, merkezning ma'arip kéngishi re'isi yéméliyan ushurof we sheherlik bash yigit béshi inemjan xudayberdiyéflar we bashqilar yaxshi tileklirini éytip, özlirining “Altun belge” sahiblirigha atighan maddiy soghilirini tapshurdi. Uningda shundaqla dilmurat quziyéf rehberlikidiki “Bént aksi'onérliq jem'iyiti”ning maddiy soghilirimu tapshuruldi. Tentenide “Irade” milliy sen'et ömikining we gimnaziye oqughuchilirining teyyarlighan konsért programmisi tamasha qilindi.

Radi'omiz ziyaritini qobul qilghan jumhuriyetlik Uyghur étno - medeniyet merkizining ma'arip kéngishi re'isi, pédagogika penlirining namzati yéméliyan ushurof bu heqte öz qarashlirini izhar qildi.