Америка, хәлқ пулиниң курси вә хитайниң америка бихәтәрликигә салидиған тәһдити һәққидә агаһландурулди

Америка -хитай иқтисади бихәтәрлик көзитиш комитети чаршәнбә күни доклат елан қилип, америка -хитай мунасивитидә дуч келиватқан бәзи ачқучлуқ мәсилиләр һәққидә америка һөкүмити вә дөләт мәҗлисигә бәзи тәвисийиләрни бәрди. 316 Бәтлик доклат сода -иқтисад, бихәтәрлик, ениргийә муһит, учур алақә қатарлиқ саһәләргә четилған.
Мухбиримиз әркин
2010-11-18
Share
Amerika-kongres-binasi-1-305 Америка парламент бинасиниң сиртқи көрүнүши.
www.house.gov Дин елинди.

Доклатта америка - хитай мунасивитидики ачқучлуқ мәсилиләрдин содики қизил рәқәм, хитай хәлқ пулиниң курси, хитай һәрбий тәрәққиятиниң америка бихәтәрлик мәнпәәтигә салидиған тәһдити қатарлиқ җәһәтләрдә америка һөкүмитини вә дөләт мәҗлисини агаһландурған.

Америка - хитай иқтисади бихәтәрлик көзитиш комитети чаршәнбә күни елан қилған бу йиллиқ доклатида оттуриға қоюлған әң муһим мәсилиләрдин бири сода - иқтисад , хәлқ пулиниң курси вә хитайниң америка бихәтәрлик мәнпәәтигә салидиған тәһдитидур. Доклатта хитайниң давамлиқ хәлқ пули курсини контрол қилип, адаләтсиз содидин пайда тепиватқанлиқи илгири сүрулгән.

Доклатта, хитай һөкүмитиниң 2000‏ - йили дуня сода тәшкилатиға әза болуп кириштин бурун бәргән нурғун вәдилирини иҗира қилмиғанлиқини әскәртип, експортни таянч қилған хитай иқтисади хәлқ пулиниң курсини контрол қилиш, мәмликәт ичидики карханиларни һәқсиз йәр, әрзан әслиһә вә өсөмсиз қәрз қатарлиқ вастиләр, баҗ қайтуруш қатарлиқ усуллар арқилиқ мәмликәт ичидики карханиларға қошумчә ярдәм бериватқанлиқини, буниң дуня сода тәшкилати қаидисигә хилап икәнликини тәкитлигән.

Доклатта әскәртилишичә, 2010‏ - йили америкиниң хитай билән болған сода қизил рәқими давамлиқ чоңайған болуп, бу йилниң дәсләпки 8 ейида хитай америкиға 229 милярд 200 милйон долларлиқ тавар експорт қилған. Лекин америка охшаш мәзгилдә хитайға 55 милярд 800 милйон долларлиқ мал сатқан.

Америкиниң бу мәзгилдики сода қизил рәқими 173 милярд 400 милйон долларға йетип, өткән йилқидин 6.20 Пирсәнт көпәйгән. Доклатта йәр шари иқтисади кризисиға қаримай, хитай експорт содисиниң давамлиқ ешип барғанлиқини әскәртип, буниңда хитайниң чәтәл карханилирини йәкләп, өз карханилириға бир тәрәплимилик ян бесиши, хәлқ пулиниң курсини контрол қилиши қатарлиқ амилларниң роли барлиқини, америкиниң хитай билән болған содидики қизил рәқими америка иқтисадиниң тәрәққиятиға зор тосалғу пәйда қиливатқанлиқини тәкитлигән. ‏

Америка - хитай иқтисади бихәтәрлик көзитиш комитетиниң рәиси даниал слейн, чаршәнбә күни доклат елан қилиш мунасивити билән елан қилған баянатида "хитайниң хәлқ пули курсини контрол қилиши америка карханилириға вә хизмәт базириға зиян селиватқанлиқи"ни әскәртип, " нөвәттики вәзийәттин қариғанда хитайниң хәлқ пули курсини базар арқилиқ тәңшәш нийити йоқлуқи"ни билдүргән.

Даниал слейн радиомизға сөһбәт елан қилип, хитай һөкүмитиниң ички базирини америка карханилириға ечиветиш нийити барлиқидин гуманлинидиғанлиқи, әгәр бундақ кетивәрсә америка карханилирини дөләт ичигә қайтуруп келип, ишқа орунлишишни күчәйтиштин башқа йол қалмайдиғанлиқини илгири сүрди. У, "мениң шәхси қаришимчә, хитай һөкүмитиниң ғәризидә чәтәл карханилириниң җүмлидин аммибап матор вә аммибап електир санаити қатарлиқ америка карханилириниң хитай базириға кирип риқабәт қилишиға йол қоюш мәйли йоқ. Улар пәқәт хитай - чәтәл шерикчиликидики карханиларниң техникисини хитайлар игиләп болғандин кейин, андин чәтәл ширкәтлиригә базирини ечиветишни ойлаватқан болуши мумкин. Буниң ахирқи һәл қилиш чариси пәқәт америка карханилирини америкиниң мәмликәт ичигә қайтуруп келиш болуп қалиду. Шундақ қилғандила америкилиқларға хизмәт тепип бәргили болиду. Америка һөкүмити чоқум баҗ җәһәттә қолайлиқ яритиш қатарлиқ усуллар арқилиқ америка карханилириниң америка земинида ишләпчиқириш билән шуғуллинишиға илһам бериши керәк" дәп көрсәтти.

Даниал слейнниң әскәртишичә, хитай һөкүмити өзиниң мәмликәт ичидики карханилириға етибар берип, чәтәл карханилирини йәкләш сиясити йүргүзүп, чәтәл карханилириниң мәркәз, өлкә вә йәрлик һөкүмәтләр билән сода тохтами түзүшини пүтүнләй тосашқа тиришмақтикән. Америка - хитай иқтисади бихәтәрлик көзитиш комитети 2000‏ - йили хитай дуня сода тәшкилатиға әза болуп кириштин сәл бурун қурулған дөләт мәҗлисиниң мәслиһәт бериш органи болуп, бу комитетниң хизмити америка - хитай сода иқтисад мунасивити вә бу мунасивәтниң америка бихәтәрлик мәнпәәтигә йәткүзидиған тәсири қатарлиқ мәсилиләрдә доклат һазирлап, дөләт мәҗлисигә йоллаштур.

Мәзкур комитетниң бу йиллиқ доклатида йәнә, хитайниң америка бихәтәрлик мәнпәәтигә салидиған тәһдити оттуриға қоюлуп, хитай һава вә башқурулидиған бомба қисимлириниң заманивейлишиш қәдими тезләшкәнликини, америкиниң райондики базилириға вә һәрбий орунлаштурушиға тәһдит селиш күчи ашқанлиқини тәкитлигән.

Доклатта, "әгәр хәлқ азадлиқ армийисиниң райондики америка базилириға қаратқан һәр қандақ һава вә башқурулидиған бомба һуҗуми муппәқийәт қазанса, райондики америка базилириниң вақитлиқ тақилиши мумкинлики вә америка армийисиниң шәрқий асиядики һәрбий һәрикити оңушсизлиққа учрайдиғанлиқи"ни илгири сүргән.

Америка - хитай иқтисади бихәтәрлик көзитиш комитетиниң муавин рәиси каролин бартомолио, чаршәнбә күни чақирилған ахбарат елан қилиш йиғинида хитай һава вә башқурулидиған күчиниң заманивейлишишиға йеқиндин диққәт қиливатқанлиқини әскәртип, хитай һәрбий күчиниң америка һәрбий күчи вә һәрбий базилириға тәһдит селиш иқтидари ашқанлиқини әскәртти. Комитет рәиси даниал слейн болса хитайниң тәйвән боғузида уруш партлиса, америка қисимлириниң тәйвән боғузиға киришини тосиялайдиған қудрәтлик деңиз армийә күчи бәрпа қиливатқанлиқини билдүргән. У мундақ дәйду" : хитай һәрбий заманивийлаштуруш қәдимини пүтүн күчи билән алға сүрүватиду. Һава армийиси җәһәттә 4‏ - әвлад күрәшчи айропиланлирини көпәйтти. Хитай йәнә тәйвән боғузида уруш партлап қалса, америкиниң тинч окян районидики деңиз армийисиниң тәйвән боғузиға киришини тосалайдиған қудрәтлик деңиз армийә күчи бәрпа қилмақта. Буниңдин сирт йәнә , хитай җасуслири америкиниң мәхпийәтликини көпләп оғрилап, бейҗиңниң һәрбий вә иқтисади күчини күчәйтишкә ишләтмәкчи болуватиду. Хитайниң америкиға қаратқан җасуслуқ һәрикити вә тор һуҗуми мәйли көләм җәһәттин, күчлүклүк дәриҗиси җәһәттин вә яки тәҗрибә җәһәттин болсун зор дәриҗидә юқири көтүрүлди."

Юқиридики аваз улинишидин, бу һәқтики мәлуматимизниң тәпсилатини аңлайсиләр.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.