Amérika Uyghur birleshmisi xitayning shawgu'en weqesini yenggil bir terep qiliwatqinigha naraziliq bildürdi

Xitay axbarati charshenbe küni, shawgu'en da'irilirining shawgu'en weqesini peyda qilghuchilardin 11 kishini sotqa tartqanliqi heqqide xewer bergen idi. Bügün amérika Uyghur birleshmisi bayanat élan qilip, xitay da'irilirining shawgu'en weqesini yenggil bir terep qiliwatqanliqini bildürdi we buni xitay qanun organlirining Uyghurlar bilen xitaylargha ikki xil ölchem qolliniwatqanliqining ispati dep körsetti.
Muxbirimiz shohret hoshur
2009.09.28
UAA-bayanati-Xitayning-Shawguan-qatillirigha-jazasi-yenik-305.jpg Süret, amérika uyghur birleshmisi öz tor bétide 23 - séntebir élan qilghan, shawguen dairilirining shawguen weqesini peyda qilghuchilardin 11 kishini sotqa tartqanliqi heqqidiki xewirige jawaben qilghan bayanatining tordiki körünüshi.
www.Uyghuramerican.org Din élindi.

Xitay shawgu'en weqeside ikki Uyghurning ölgenlikini, 118 kishining yarilan'ghanliqini, yarilan'ghuchilar ichide 82 kishining Uyghur ikenlikini bildürgen idi. Shinxu'a agéntliqining xewer qilishiche, shawgu'en teptish mehkimisi 5 neper xitay gumandarni, qesten adem yarilandurush jinayiti bilen؛ yene 6 neper xitay gumandarni topliship jédel chiqirish jinayiti bilen sotqa tartqan.

Amérika Uyghur birleshmisi mezkur sotta sotqa tartilghuchilar sanining az bolghanliqini, uning üstige jinayet xaraktérining tégishliktin nahayiti köp yenggil békitilgenlikini bildürmekte.

Amérika Uyghur birleshmisining qarishiche, shawgu'en weqeside ölgen Uyghurning sani az dégende 30, jinayet sadir qilghan xitaylarning sani birqanche ming. Mana mushundaq bir zor kölemlik kolléktip qatilliq weqesini, topliship jédel chiqirish jinayiti dep békitish؛ aran 11 kishini jawabkarliqqa tartish jinayetchilerni jasaretlendürüshtin bashqa nerse emes.

Tünügün amérika awazi radi'osi shawgu'en sheherlik hökümetke téléfon qilip, mezkur sot heqqide melumat sorighan. Da'iriler shawgu'en weqesining sezgür bir mesile ikenlikini bildürüp, shinxu'a agéntliqining xewiridin paydilinishni tewsiye qilghan we bashqa melumat bérishtin özini qachurghan.

Muxbir bir adwokattin ehwal igiliginide, shawgu'en weqesining jeryani we tekshürülüsh netijisi heqqide axbarat wasitiliride köp uchur yoqluqini, özining, sot orunliridin bu heqte melumat sorighan chéghida ret qilishqa uchrighanliqini bildürgen.

Amérika Uyghur birleshmisi bügünki bayanatida, 5 - iyul ürümchi weqeside Uyghur yashlirining tinchliq bilen namayishqa chiqqanliqini, shawgu'en weqesi heqqide yolluq telep otturigha qoyghanliqini, hetta namayishta besh yultuzluq qizil bayraq kötürüp, döletke sadaqetmenlik bildürgenlikini, shundaq halda yene bölgünchilik bilen eyiblen'genlikini, emma ürümchide qollirida kaltek kötürgen xitay namayishchilarning héchqandaq eyiblenmigenlikini؛ 5 ‏- iyul weqeside 4000 din artuq kishining qolgha élin'ghanliqini, 7 - iyul we 3 ‏- séntebir weqeliride héch bir xitayning qolgha élinmighanliqini sélishturma qilip körsetti.

Amérika Uyghur birleshmisi bayanatida yene, Uyghurlar bilen xitaylar arisida shawgu'en weqesi bilen bashlan'ghan zenjirsiman weqelerde, xitay qanuni izchil halda qosh ölchem qollan'ghini üchün, xitay puqralirining jasaretlinip, Uyghurlargha üzlüksiz halda hujum qiliwatqanliqini tekitlidi. Amérika Uyghur birleshmisi bayanatining axirida, xelq'ara jama'ettin, jümlidin amérika qoshma shtatliri we yawropa ittipaqidin, xitaydiki qanun organlirining qosh ölchem qollinish ehwalini sürüshte qilishni telep qildi.

Xongkong metbu'atliri bügün, shawgu'en weqesining gumandarlirining sotlinish ehwali üstide toxtilip, mezkur sotning normal qanuniy tertip boyiche emes, belki, siyasiy éhtiyaj boyiche, yeni xitay dölet bayrimida, Uyghurlarning ghezipini bésish üchün échilghanliqini otturigha qoyghan.
 
Shawgu'en da'iriliri 26 - iyun weqesining jawabkarlirini buningdin kéyin yene dawamliq halda sotlaydighanliqini bildürgen. Emma jem'iy qanche kishining jawabkarliqqa tartilidighanliqini bildürmigen.

Tunji qétimliq sotta weqening xaraktérining yenggil békitilishi, shawgu'en weqesidiki gumandarlarning tégishlik derijide qattiq jazagha uchrimaydighanliqini körsetmekte.

 
Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.