Amérika démokratliri öz partiyisidin prézidént we mu'awin prézidént namzatini békitti

Obama bilen muawin prézidént namzati jo baydin, démokiratlar qurultiyida bir - birini qutluqlashmaqta.

 Xilariy klinton öz qollighuchilirini obamani qollashqa chaqirdi

Ilgiri perez qilin'ghinigha oxshash, barak obama we jo baydin ayrim - ayrim halda prézidént we mu'awin prézidént namzati qilip békitildi we resmiy jakarlandi.

Qarimaqqa ilgiri barak obama bilen öz partiyisidin prézidéntliq namzatliqi riqabitige chüshken, hemde bu jeryanda 17 milyondin artuq qollighuchigha érishken küchlük namzat we palata ezasi xilariy klinton xanim, mezkur wekiller qurultiyining bélet tashlash usulining öz partiyisi ichide bölgünchilik keltürüp chiqirishidin ensirigendek qilatti.

Xilariy klinton xanim bélet tashlash usulini bikar qilip barak obamani resmiy namzat qilip jakarlashni telep qildi.

Prézidént namzatini békitish murasimigha amérika döletlik awam palata re'isi, démokratlar döletlik wekiller qurultiyining menggülük re'isi nensiy pélosi xanim riyasetchilik qildi. U yighin qatnashquchiliridin " eger barak obamaning namzatliqigha qoshulsanglar qoshulimiz dep jawab béringlar" dep sorighanda yighin ehlining hemmisi dégüdek qoshulidighanliqini bildürüshti. Shuning bilen barak obama we jo baydinlarning prézidént we mu'awin prézidéntliq namzatliqi resimi jakarlandi.

Klinton : " barak obama amérikining dunyadiki ornini tikleshke teyyarlandi "

Bügün bu murasim bekmu hayajanliq ichide ötken bolup, beziler köz yéshini toxtitalmidi . Shu küni kechqurun sabiq prézidént bil klinton nutuq sözlep barak obamaning hayat tejribisi we jo baydindek aqil kishini mu'awin prézidént namzati qilip tallighanliqigha yuqiri baha berdi we : " démokrat qérindashlar, silerge shuni éytimenki barak obama dölitimizni yétekleshke we amérikining dunyadiki ornini tikleshke teyyarlandi" dédi.

Sabiq prézidént klinton yene mundaq dédi: " barak obama qesem bérip amérikining qanunini saqlash we uni qoghdashqa teyyar boldi. Barak obama amérika qoshma shtatlirining prézidénti bolushqa teyyarlandi".

Mu'awin prézidént namzati jo baydin obamaning diplomatiye ishliridiki heqiqiy toluqlighuchisi

Shu küni kechqurun, mu'awin prézidéntliq namzati jo baydin özining bu namzatliqini resmiy qobul qilghanliqini jakarlidi. Jo baydin mundaq dédi: " shundaq, shundaq, men silerning méni amérikining kéler nöwetlik prézidénti barak obama bilen bille xizmet qilishqa namzat qilip tallighininglarni qobul qildim"

U yene jemiyetke wede bérip, mu'awin prézidént ishxanisining her zaman ular üchün ochuq ikenlikini bildürdi.
Barak obama déliwéyr shtati wekili, amérika palata ezasi jo baydinni mu'awin prézidéntliq namzati qilip tallighan. Ular 23 - awghust shenbe küni ilini'oy shitatining spring fiyild rayonida tunji qétim jama'et bilen körüshken idi.

Jo baydinning mu'awin prézidéntliq namzati qilip tallan'ghanliqi we bügün resmiy békitilgenlikige qarita pikir bayan qilghan masachusts shtati démokratlar partiyisi wekili ralf jordin, jo baydinning tashqi ishlar we chet'eller bilen bolghan diplomatiye munasiwetliride intayin tejribilik ikenlikini, uning bu jehetlerde barak obamaning heqiqiy toluqlighuchisi bolup kételeydighanliqini, shunglashqa jo baydinni mu'awin prézidént qilip tallashning intayin aqilanilik ikenlikini we saylamda bularning utup chiqishida intayin muhim ehmiyetke ige ikenlikini ilgiri sürdi.