Америкиниң учқучисиз айропилани иран қисимлири тәрипидин етип чүшүрүлгәнлики растму?

Дуняниң бүгүнки учур сәһипилиридә, иран даирилириниң “америкиниң учқучисиз айропилани иран қисимлири тәрипидин етип чүшүрүлди” дегән хәвириниң раст-ялғанлиқи һәққидики баянлар әң йеңи хәвәр болуп қалди.
Мухбиримиз вәли
2011.12.05
rq-170-uchquchisiz-ademsiz-ademsiz-jasusluq-ayropilan-305.jpg Иран һәрбий қисимлири тәрипидин етип чүшүрүлди дейилгән америкиниң RQ-170 бәлгилик учқучисиз җасуслуқ айропилани. 2011-Йили 5-декабир.
AFP

Йәкшәнбә күни иранниң “әл-әләм” телевизийиси, америкиниң рқ-170 бәлгилик учқучисиз җасуслуқ айропилани иран һәрбий қисимлири тәрипидин етип чүшүрүлди дәп хәвәр қилған иди. Бу хәвәрни русийиниң р т телевизийиси, хитайниң с с телевизийиси әйнән көчүрүп тарқатти. Әмма бу учур васитилириниң һечқайси иранниң “фарси агентлиқи” әң бурун бу һәқтә хәвәр елан қилғанда тәсвирлигән тәпсилий баянларни тилға алмиди. Иранниң “фарси агентлиқи” әң бурун елан қилған хәвәрдә, иранниң шәрқ тәрәптики һава территорийисигә һуҗум қилған америкиниң учқучисиз җасуслуқ айропилани һазир иран инқилаби қисимлириниң қолида, бу айропилан анчә зәхимләнмигән, русийә мутәхәссислири бу айропиланни көрүшни тәләп қиливатиду, дәп баян қилинған иди.

Ройтрс агентлиқиниң баян қилишичә, гәрчә иран учур васитилири америкиниң учқучисиз разведчик айропиланини “етип чүшүрүлди” дегән болсиму, әмма бу айропиланниң иранда “етип чүшүрүлгәнлики”ни билдүридиған һечқандақ аламәт йоқ. Иранму дегән гепигә пакит көрситәлмиди. Исмини аташни халимиған бир америка әмәлдариниң баян қилишичә, иран буниңдин бурунму 1‏-айда бир қетим, 7‏-айда йәнә бир қетим, америкиниң учқучисиз җасуслуқ айропиланидин иккини етип чүшүрдуқ, бирини парс қолтуқида, йәнә бирини иранниң форду ядро базисида дәп ялған хәвәр елан қилған иди.

Натониң қоманданлиқидики хәлқара бихәтәрлик ярдәм қисимлириниң баян қилишичә, иранниң хәвиридә ейтилған бу хил айропилан, пәқәт разведка үчүнла қоллинилидиған қоралсиз айропилан, бу хил айропилан өзини йошуралайдиған иқтидарға игә, нато қисимлири бу хил айропиланларни афғанистанда әлқаидичиләрни разведка қилишта қоллинип келиватиду.

Натониң баян қилишичә йәнә, иранниң хәвиридә ейтилған бу айропилан, әйни вақитта афғанистанниң ғәрб тәрипидә разведка вәзиписини иҗра қиливатқанда контрол қилидиған орун билән болған алақиси үзүлүп қалған икән. Нато қисимлири һазирға қәдәр бу айропилан билән алақилишишкә теришиватиду.

Америкиниң с н н телевизийиси, лос анҗилис вақит гезити, вол стрит гезити қатарлиқ учур васитилириму бүгүн иранниң хәвиригә охшимайдиған хәвәр елан қилди вә иранниң хәвиригә охшимайдиған учурларни көпрәк баян қилишқа теришти.

Әмма хитай учур васитилири бүгүн иран елан қилған “америкиниң учқучисиз айропилани етип чүшүрүлди” дегән учурға техиму көп тәсвир қошуп елан қилди. “шинхуа тори”, “хәлқ тори” бүгүн бу һәқтә елан қилған хәвәрләргә, америкиниң учқучисиз җасуслуқ айропилани иранниң һава территорийисигә таҗавуз қилған, иран америкиниң учқучисиз җасуслуқ айропиланини етип чүшүрүп өч алди, бу вәқә бизгә йәнә, иран билән америка оттурисида давамлишиватқан мәхпий урушниң сирини ашкарилап бәрди дегән сөзләрни қошти.

Хитай учур васитилири бүгүнки хәвәрлиридә йәнә, америкиниң һазир пакистандики шәмси һава армийә базисидин чекинип чиқишқа башлиғанлиқини, пакистан натоға тәминат йәткүзидиған йолларни мәңгүлүк тақиғанлиқи үчүн, америка һазир афғанистандики нато қисимлириға шимал тәрәптин тәминат йәткүзидиған йеңи йол ечишқа мәҗбур болғанлиқини, һәтта бүгүн йүзгә йеқин дөләт германийиниң бон шәһиридә афғанистан мәсилиси һәққидә ечишқа башлиған йиғинни пакистан байқот қилғанлиқи үчүн, бу йиғинниң нәтиҗиси яхши болмаслиқи мумкин дегәндәк пәрәзлириниму учқучисиз айропилан вәқәсигә четивалди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.