Amérika iqtisadi yaxshilinishqa yüzlenmekte

Charshenbe küni élan qilin'ghan amérikidiki iqtisadi uchur menbelirining sanliq melumatliridin melum bolushiche, 2010 - yili amérika iqtisadi örlesh basquchigha kirgen.
Muxbirimiz mihriban
2010-01-07
Share
Amerika-pay-chek-baziri-kochisi-305.jpg Süret, amérikining nyoyork shehridiki wall stirit köchisigha jaylashqan baychék baziri binasidin bir körünüsh.
www.ocregister.com Din élindi.

Iqtisadi uchur menbelirining ashkarilishiche, bu melumat, 2007 - yildin bashlap üzlüksiz örlewatqan amérikidiki ishsizliq nisbitining 2009 - yili 12 - aygha kelgende körünerlik derijide töwenleshke yüzlinip, istémal bazirida örlesh ipadiliniwatqan sanliq melumatlargha asasen yekünlen'gen iken.

Amérika awazi radi'o istansisining tünügünki xewiridin melum bolushiche, charshenbe küni amérikidiki a d p namidiki shirketlerge xizmetchi tonushturush mulazimet shirkitining 2009 - yili 12 - aydiki ish ornidin qaldurulghan xizmetchiler sani élan qilin'ghan bolup, melumatta körsitilishiche 2009 - yili 12 - ay ichide shexsiy shirketler qisqartqan xizmetchilerning sani 84 ming neperge yetken. Bu san 2009 - yili 11 - ay mezgilide ish ornidin qaldurulghan 145 minggha sélishturulghanda körünerlik azayghan. Mutexessislerning qarishiche bu sanliq melumat shirketler xizmetchilerni qisqartishni bashlighan 2008 - yili 3 - aydin buyanqi eng töwen nisbet iken.

Amérika emgek mulazimet ministirlikining sanliq melumati bolsa ishqa orunlashqanlar sanini asas qilghan bolup, amérika emgek baziri istratégiye meslihetchisi tommy lé'é ependi amérika awazi radi'o istansisining ziyaritini qobul qilghinida, amérikida ishqa orunlishish pursitining köpiyiwatqanliqi heqqide toxtilip, "2009 - yili 12 - ay mezgilide emgek bazirida 40 ming kishige ishqa orunlishish pursiti boldi , waqitliq ishqa orunlashqanlar sani hem xizmetchilerning ish waqti köpeytildi, bu ay ichide ishsizliq sughurtisigha iltimas qilghanlar sanimu körünerlik azaydi. Emeliyet shuni ispatlidiki biz adette tekitlewatqan emgek baziridiki yaxshilinishta ipadilinidighan alametlerning hemmisi 12 - ayliq sanliq melumatta eks etti," dep körsetken.

Kespi mulazimet shirkiti s g s ning tekshürüsh doklatidimu amérikining emgek bazirida yaxshilinish bolghanliqi eks ettürülgen bolup, bultur 12 - ay mezgilide amérika shirketliri ishtin boshatqan xizmetchiler sani 45 ming 94 neper bolghan bolup, bu bultur 11 - mezgilidin 10% azayghan. Bu, 2007 - yili 12 - aydin buyanqi iqtisad chékinishke bashlighan mezgil ichidiki eng töwen san hésablinidiken.

Bulardin bashqa yene amérika istémal bazirida bultur 12 - ay mezgilide mal sétiwalghuchilar sani körünerlik ashqan bolup, mal sétiwélish nisbiti 17.7% Ashqan, bu amérika puqralirining yillardiki oxshash mezgildiki sétiwélish nisbitidin 2% ashqan. Xewerlerdin melum bolushiche ötken charshenbe küni köp xil amillarning türtkisi astida amérika pay chéki baziridimu omumiy yüzlük örlesh bolghan.

Amérika dölet bayliqi bankisining iqtisadi meslihetchisi adam yorkning bildürüshiche, amérika istémal baziridiki bu örlesh ötken 6 aydin buyanqi eng yuqiri melumat bolup, bu amérika iqtisadining yaxshilinishqa qarap yüzliniwatqanliqining béshariti iken.

Charshenbe küni amérikining ammiwi mulazimet baziridinmu amérika iqtisadining yaxshilinishqa qarap yüzliniwatqanliqi heqqidiki sanliq melumatlar kélishke bashlighan bolup, iqtisadiy mulazimet jem'iyiti i s m ning doklatida körsitilishiche, magizinlarning mal kirgüzüsh nisbiti bultur 11 - aydiki 48.7% Nisbettin din 50.1% Nisbetke örligen bolup, mal kirgüzüsh nisbitining 50 tin yuqiri bolushi iqtisadning örligenlikining bishariti iken.

Yéngidin bashqa mulazimet saheliride ishqa orunlishish nisbiti 41.6% Tin 44% ke yetken. 2008 - Yili 5 - aydin bashlap mulazimet saheliridiki ishqa orunlishish nisbiti 50% tin töwen bolup kéliwatqan bolup, hazir bu nisbet örleshke qarap yüzliniwétiptu.

Amérika dölet bayliqi bankisining iqtisadi meslihetchisi adam york bu yilliq iqtisadqa baha bérip, 2009 - yilning 4 - peslide amérika iqtisadining 4% tin 5% kiche örligenlikini, mushu boyiche mölcherligende 2010 yili amérika iqtisadida 2% etrapida örlesh bolishi mumkinlikini , buning bilen emgek bazirida ishqa orunlishish nisbitiningmu örleydighanliqini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet