Вашингтондики уйғурлар 5-июл вәқәсини хатириләп намайиш өткүзди

Бүгүн 5-июл вәқәсиниң икки йиллиқ хатирә күни. Икки йилниң алдидики мушу күндә 1000дин артуқ уйғур яш, үрүмчидики хәлқ мәйданиға топлинип, 26‏-июн шавгүән вәқәси һәққидә һөкүмәттин мәлумат тәләп қилған.
Мухбиримиз шөһрәт һошур
2011-07-05
Share
amerika-namayish-5-iyul-305.jpg Вашингтондики уйғурлар 5-июл вәқәсини хатириләп намайиш өткүзди. 2011-Йили 5-июл.
RFA

Һөкүмәт тәрәп бурунқиға охшашла, намайишчиларниң йоллуқ тәләплирини җавабсиз қалдурған. Җавабсиз қалдурғанла әмәс, бәлки, урған,дөшкәлигән, тутқун қилған, һәтта оқ чиқарған. Һөкүмәт тәрәп намайишчиларни пүтүнләй чарисиз дәп ойлиған; уларниң арқисида милйонлиған уйғур хәлқиниң ирадиси вә һимайиси барлиқини унтуған; қериндашлириниң урулуп-соқулуватқинини, һәтта оққа тутулуватқинини көргән, үрүмчи кочилиридики уйғур яшлири түркүм-түткүмләп намайишчилар сепигә қетилған. Хитай сақчилириниң зораванлиқлири чәктин ашқандин кейин, бир түркүм уйғур яшлириму җанлирини алиқиниға елип, өлгән, яриланған қериндашлири үчүн қанға-қан, җанға- җан дәп һесаб елишқа атланған. Нәтиҗидә тинчлиқ билән башланған намайиш тоқунушқа айлинип, үрүмчиниң бирқанчә муһим кочилирини, җәсәтләр, яридарлар, көйдүрүлгән аптомобиллар, янған биналар вә ис-түтәләр қаплиған. Һөкүмәт тәрәпниң мәлуматида шу күни өлгәнләрниң сани 197 нәпәр болуп, буниң мутләқ көп қисми хитай пуқралири, әмма муһаҗирәттики уйғур тәшкилатлириниң мәлуматлирида көрситилишичә, шу күни оққа тутулған вә из-дерәсиз йоқалған намайишчиларниң сани бир қанчә миң вә буларниң һәммиси дегүдәк уйғур.

amerika-namayish-5-iyul-385.jpg
Вашингтондики уйғурлар 5-июл вәқәсини хатириләп намайиш өткүзди. 2011-Йили 5-июл.
RFA

Муһаҗирәттики уйғурлар, 5-июл күнини, өзлириниң тәшкиллиниш иқтидарини, миллий уюшқақлиқини, зораванлардин қорқмайдиғанлиқини испатлиған, йәни бир қәһриманлиқ дастанини яратқан күн дәп иптихар билән хатирилисә, йәнә бир тәрәптин өлгән, тутулған қериндашларниң саниниң көплүки, йолуққан қийин-қистақлириниң еғирлиқи сәвәблик, уйғур тарихидики паҗиәлик күнләрниң бири сүпитидә ечиниш билән әслимәктә.

Мана бүгүн вашингтонниң дупон мәркизи мәйдани дәп атилидиған қайнақ мәркәзлиридин биригә топланған уйғурлар, җараңлиқ шоарлири вә тәсирлик нутуқлири билән, 5-июл тинчлиқ намайишини қанлиқ бастурған хитай һөкүмитигә наразилиқини билдүрмәктә. Буниң билән бирликтә йәнә 5-июл вәқәсидә һаятидин айрилған, шу вәқә сәвәблик бүгүн түрмиләрдә йетиватқан қәһриман оғул-қизлириға вә уларниң аилә-тавабатлириға һөрмәт билдүрмәктә.

Уйғур миллий һәрикитиниң рәһбири рабийә ханим, дуня җамаәтчиликини, 5-июл вәқәсини унтуп қалмаслиққа, 5-июлда тутулғанларниң түрмиләрдә тартиватқан азаблириға көз юмувалмаслиққа, 5-июлда өлгән вә тутулғанларниң йиға-зариға, аһ-пәрядиға қулақ йопурувалмаслиққа дәвәт қилмақта.

Намайишта сөз қилған рабийә ханим, 5-июл намайишчилириниң, уйғурлар үчүн өгиниш өлгиси икәнликини, 5-июл вә униңдин кейинки вәқәләрдә өлгән уйғурларниң қениниң йәрдә қалмайдиғанлиқини, уйғур хәлқи төләватқан бу бәдәлләрниң ахири мевә беридиғанлиқини, йәни өз вәтиниигә өзи игә болидиған, өз ишлириға өзлири хоҗа болидиған, һүр, әркин заманларға чоқум еришидиғанлиқини йәнә бир қетим тәкитлиди.

Мушу тапта намайишта товлиниватқан шоарлар, вашингтон кочилирини башқичә җанландурмақта. Сәп-сәп болуп тизилип меңиватқан намайишчиларниң қолидики ай-юлтузлуқ көкбайрақ вашингитонлиқларниң диққитини тартмақта. Намайишчилар болса, әнә шу 5-июлдики намайишчиларниң җәңгиварлиқлирини әсләш, йолуққан зорванлиқлириға ечиниш туйғулири ичидә намайишни давамлаштурмақта. Төвәндә бир түркүм намайишчиларниң намайиш тәсиратлирини, мушу минутлардики ой вә һессиятлирини диққитиңларға сунимиз.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт