Amérika bilen pakistan dostmu yaki düshmenmu?

Roytrs agéntliqining muxbirliri islam'abadtin we washin'gtondin yollighan xewerlerde bayan qilinishiche, amérika herbiy qisimlirining shtab bashliqi adéméral mayk mullén washin'gtonda, pakistanni ochuq-ashkara eyiblep, afghanistanda yüz bergen amérikigha qarshi hujumlargha islam'abad arilashqan, dep jakarlidi. Pakistan bash ministiri gilani karachida amérikigha agahlandurush bérip, hazir pakistan bilen amérika munasiwiti qéyin ehwalgha duch keldi, amérika hazir pakistan bilen hemkarliship ish qilmaywatidu, emma amérikining bu rayonda pakistansiz mewjut bolup turalishi mumkin emes, dep jakarlidi.

Amérika awazining bayan qilishiche, amérika herbiy qisimlirining shtab bashliqi adéméral mullén bilen amérika dölet mudapi'e minisitri panétta peyshenbe küni amérika kéngesh palatasida ötküzülgen ispatliq bérish yighinida, afghanistanda yüz bergen kabuldiki amérika elchixanisigha hujum qilish weqesinimu, 11‏-séntebir küni afghanistanning wardaq ölkiside yüz bergen natoning qisimlirining qarargahigha aptomobil bilen partlitish hujumi qozghap, 50 eskerni öltürgen, 77 eskerni yarilandurghan weqenimu, “Heqqaniy guruhi” dep atalghan elqa'ide teshkilati pilanlighan, pakistan bixeterlik orgini bu teshkilatqa yardemleshken, “Heqqaniy” dep atalghan elqa'ide teshkilati hazirgha qeder afghanistan bilen pakistan chégrisidiki weziristan rayonida panahlinip turmaqta, dep körsetken.

Xitayning jangshi xewer torida bayan qilinishiche, afghanistanning wardaq ölilkisidiki séyi'abad rayonigha jaylashqan nato qarargahi bar jayda 9‏-ayning 10‏-künidin 11‏-küni etigen sa'et 11 giche bolghan waqita ichide tinchliq buzulghan. Talibanlar bu jayda 9 tonna partlatquch qachilighan bir aptomobilni partlatqan. Amérikining yaridar toshuydighan tik uchar ayropilani bu jaygha 16 qétim qatnighan. Natoning bu qarargahida amérika we türkiye eskerliri turatti. Afghanistan da'iriliri 50 esker ölgenlikini jakarlidi, emma bu eskerlerning dölet tewelikini éytmidi. Emeliyette bu weqede yarilan'ghan esker 77 din artuq, weqede ölgen we yarilan'ghan bigunah yerlik xelqning sani nahayiti köp.

N b s téléwiziye xewerliride bayan qilinishiche, pakistan tashqi ishlar ministiri hina rebbani xar xanim tünügün kechte pakistandiki bir shexsiy téléwiziye qanilida qilghan sözide, amérikining pakistanni eyibligenlikige rediye bérip, amérika emdi pakistan hökümiti we pakistan xelqi bilen munasiwetni yéraqlashtursa, buning höddisisdin chiqmiqi teske toxtaydu, pakistan bilen yéraqlashqanliqi üchün éghir bedel töleydu, dep jakarlighan.

Birleshme agéntliqi, maliye waqit géziti, télégraf géziti, b b s qatarliq uchur wasitiliri bügün keyni-keynidin xewer élan qilip, amérika bilen pakistan munasiwitide yüz bergen jiddiylikning tepsilatini tonushturdi. Bu uchur wasitiliri bu heqtiki bayanlirida, amérika bu rayonda pakistansiz mewjut bolup turalmaydu, amérika emdi ittipaqdéshidin ayrilip qélishi mumkin dégen sözlerni qosh tirnaq ichige élip xewer qildi.

Xitayning uchur wasitiliri bügün amérika-pakistan munasiwitide yüz bergen jiddiylik heqqidiki bayanlirida, pakistan bügün amérikigha agahlandurush berdi dégen nuqtini gewdilendürdi. Xitayning “Xelq'ara közetküchi” dégendek herbiy ishlargha munasiwetlik tor betliride bolsa, amérika emdi pakistanni yene bir afghanistan'gha aylanduramdu dégen témida munazire bashlandi.