Америка президент сайлими әң җиддий болидиған ахирқи бир һәптә

Америкида президент сайлими бу йил 2 ‏ - айдила башланған иди. 8 ‏ - Айда, демократлар партийиси билән җумһурийәтчиләр партийисидин ибарәт икки партийә қурултайлирини ечип, сайлам риқабитигә қатнашқанлар ичидин бирдин президент вә муавин президент намзатини таллап чиқти.
Мухбиримиз вәли
2008-10-28
Share
Obama-Mekkeyin-Saylam-305.jpg Демократлар партийиси билән җумһурийәтчиләр партийисидин ибарәт бу икки партийә кандидатлири миккейин билән обаманиң муназирә көрүнүшлириниң бири.
AFP Photo

Шуниңдин кейин иккинчи басқучлуқ сайлам башланди. Сайламниң ахирқи беләт ташлаш күни 11‏ - айниң 4 ‏ - күни. Қайси партийиниң президент намзати ғәлибә қилғанлиқи мәлум болидиған бу ахирқи күнгә йәнә бир һәптә қалди.

Икки намзат һазир сайламға муһим тәсир көрситәләйдиған шитатларда риқабәтлишиватиду

Америка авазиниң баян қилишичә, президент сайлиминиң әң ахирқи һәптисидә, барак обама билән җоһн миккейин һазир, һәр қетимлиқ президент сайлимида муһим тәсир көрситип келиватқан охайо штати қатарлиқ бир нәччә шитатта әң ахирқи сайлам риқабитигә чүшти. Улар нуқтилиқ мәсилиләрдә йәнила өз - ара һуҗум қозғимақта.

Барак обама 'сайлам нутқида, әгәр президент болуп сайланса, дөләт ичидә икки партийини иттипақлаштуруп иқтисадий риқабәткә, хәлқарада болса бихәтәрлик риқабитигә тақабил туридиғанлиқини җакарлиди. Шундақла у йәнә җоһн маккейнни президент бушниң сиясәтлириниң вариси дейиш арқилиқ униңға һуҗум қилишни тохтатмиди.

Җоһн маккейнму сайлам нутқида, барак обаманиң баҗ ислаһати тоғрисидики пиланида мәсилә бар, у байлиқ яритишни әмәс, бәлки байлиқларни контрол қилишни мәқсәт қилиду, һәммә америкилиқ үчүн хизмәт вә байлиқ пурсәтлири яритиш әмәс, бәлки байлиқни тәқсим қиливетишни мәқсәт қилиду, дәп һуҗум қилишни тохтатмиди.

Һазирға қәдәр ташланған беләт санидин қариғанда, җоһн миккейин еришкән беләт сани, сайлам башланғандин буян үстүнлүкни игиләп келиватқан барак обамаға йетишивелишқа йәнә йәттә точка қалди. Җоһн миккейин бу бошлуқни толдуруш үчүн тиришиватиду. Обама болса қоллиғучилирини һазирқи үстүнлүкни сақлап қелиш үчүн бихәстилик қилмаслиққа чақириватиду.

Америкини инавәтлик қәрз кризисидин қутулдуруш үчүн бир чоң малийә пилани керәк

Иқтисадшунасларниң қаришичә, җорҗ буш һөкүмити мәзгилидики ирақ уруши сәвәбидин америкиниң чиқими ешип кәтти, дөләт ичидә инавәтлик қәрз кризиси пәйда болди.

Америкини бу кризистин қутулдуруш үчүн иқтисадни гүлләндүрүшкә түрткә болидиған бир чоң малийә пилани болуш керәк. Америка хәлқи һазир икки намзатниң иқтисадни гүлләндүрүш пиланлириниң қайси мувапиқ икәнликини талливелиш үчүн баш қатуруватиду.

Барак обамаға қәст қилишни пиланлиған икки ақ тәнлик ирқчи қолға елинди

Шинхуа агентлиқиниң бүгүн хәвәр қилишичә, демократлар партийисиниң президент кандидати барак обама өзиниң аваз үстүнлүкини сақлаш үчүн, җумһурийәтчиләр партийисиниң президент намзати җоһн миккейин болса өзиниң ғәлибә қазиниши үчүн тиришиватқан җиддий пәйттә, ақ тәнлик ирқчи даниял ковард )йигирмә яш( билән павл шлессилман )он сәккиз яш( иккиләйлән барак обамани өлтүрүшни пиланлиғанлиқи үчүн тәннаси шитатиниң федерал тәптишлири тәрипидин қолға елинди.

Африқилиқлар обамани алқишлимақта

Мәркизи агентлиқиниң йоһәннис бургтин хәвәр қилишичә, уганда, кенийә, җәнубий африқа қатарлиқ африқа дөләтлиридә, кишиләр америка президенти болуп сайлиниши мумкин болған африқа нәслидики барак обамаға алқиш яғдурмақта. Уларниң қаришичә, әгәр обама америкиниң 46‏ - қетимлиқ президенти болса, ирақта вә башқа дөләтләрдә уруш тохтайду.

Хәвәрдә ейтилишичә йәнә, африқа дөләтлиридә әзәлдин америкиға қизиқмайдиған қиз - оғул яшлар ичидиму һазир обамани өзиниң үлгиси, ғайиси дәп қарап, обама сүрәтлик майка кийиш мода болди. Обаманиң ата юрти кенийидә болса, америкидики сайлам учурлиридин хәвәр тепиш үчүн кишиләр TV дин көз үзмәй, һаяҗанлинип муназирә қилишмақта вә америкидики җумһурийәтчиләр партийисиниң кандидати җоһн маккейнниң қоллиғучилири обамани 'сотсиялизимчи' дегәнликигә наразилиқ билдүрмәктә.

Битәрәпләрму барак обама билән қәһриман маккейнниң қайсисиға беләт ташлашни җиддий ойлашмақта

Бу қетимқи президент сайлимида, битәрәпләрниң кимгә беләт ташлайдиғанлиқини бәлгиливалғандин кейин қошулидиған беләт саниғиму сәл қариғили болмайду. Америка университетиниң тәһлилчиси ричниң қаришичә, америкида битәрәп һаләттә туруватқан сайлам әһлиму, һазир зирәк обама билән қәһриман маккейнниң қайсисиға беләт ташлашни җиддий ойлашмақта.

Аялларниң туғушни таллаш һоқуқи мәсилисидә вә охшаш җинслиқларниң той қилишни қанунлаштуруш мәсилисидә, уларниң маккейнгә беләт ташлайдиғанлиқи ениқ. Әмма иқтисадий мәсилә вә депломатийә мәсилиси җәһәттә, қайси кандидатқа беләт ташлашни талливелиши һазир гәрчә қийиндәк көрүнсиму, әмма келәр сәйшәнбә күни чуқум бирсигә беләт ташлайдиғанлиқи ениқ.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт