Amérikida qolliniliwatqan térrorchiliqtin saqlinish tedbirliri dunyagha kéngiyiwatidu

Süret, 2009‏- yili 25‏- dékabir küni, amérikida kristimis bayrimi küni ayrupilan partlitishqa urunup tutulup qalghan négiriyilik bir er ‏-‏-‏- 23 yashliq umar faruq abdulmutallap toghrisidiki xewerlerdin biri.

Umar faruq abdulmutallap, négiriyidin ayrupilan'gha chiqip, amustérdamda amérikining gherbiy shimal hawa qatnishi shirkitining ayrupilanigha almashti. Ayrupilan amérikining détroy ayrodromigha qonushqa yérim sa'et qalghanda, u ich tambiligha qachilighanPETN belgilik ötkür partlighuch dorisigha okul yingnisi bilen suyuqluq kirgüzüwatqanda, is chiqishqa bashlidi. Uning etrapidiki yoluchilar özi köyüp yarilan'ghan bu jinayet gumandarini derhal qorshiwaldi. Ayrupilan xizmetchiliri yéniwatqan otni öchürüwaldi. Shuning bilen ayrupilandiki 278 neper yuluchining hayati yüz bergüsi ayrupilan qazasidin saqlap qélindi.

Weqe yüz bergendin kéyin, hununulu arallirida dem éliwatqan amérika prézidénti omaba, bu weqeni derhal tekshöröp éniqlash toghrisida buyruq chüshürdi.

Négiriyilik abdulmutallap ayrupilan partlitishni el qa'idichilerning tapshuruqi bilen qilghan

Xewerde bayan qilinishiche yene, jinayet gumandari négiriyilik er saqchilar soraq qilghanda, bu ishni el qa'idichilerning tapshuruqi bilen qilghanliqini iqrar qildi.

Obama 'bu weqening keynidiki qara qol ‏-‏-‏- el qa'idichiler' dep jakarlidi

Merkizi agéntliqining bayan qilishiche, amérika prézidénti obama yéngi yil nutqida, bu qétim yüz bergen négiriyilik bir erning ayrupilan partlitishqa orunush weqesi, amérikining dölet ichi bixeterlik idarisigha 11‏ - séntebir térrorluq weqesidin kéyin bérilgen yene bir qétimliq agahlandurush ségnali, bu weqening keynidiki qara qol --- el qa'idichiler, dep jakarlidi.  

Amérika, en'giliye, fransiyiler bügün yemendiki elchixanisini taqidi

Amérika awazining bayan qilishiche, amérika we en'giliye bügün yene yemendiki elchixanisini taqidi. Fransiyimu bügün yemendiki elchixanisini taqaydighanliqini jakarlidi.

Amérika CBS téléwiziye istansisining muxbirliri aqsarayda  'bu, emdi yemenning térrochiliqqa qarshi urushning yéngi sépi bolup qalidighanliqidin dérek béremdu? dep soralghanda, obamaning bixeterlik meslihetchisi ulargha 'yemen xélidin buyan dunya jiddiy közütüwatqan rayon idi' dep jawab berdi.

Amérika, en'giliye hazir yemenning herbiy qisimlirini terbiyileshke bashlidi

B b s ning bayan qilishiche, amérika, en'giliye hazir meblegh ajritip, yemenning térrorchiliqqa qarshi turush qisimlirini terbiyileshke bashlidi.

Yemen tashqi ishlar ministirliqi bügün 'térrorchiliq pütün insaniyetning ortaq düshmini' dep jakarlidi

Shinxu'a agéntliqining bayan qilishiche, yemen tashqi ishlar ministirliqi bügün, térrorchiliq pütün insaniyetning ortaq düshmini, biz chuqum uni yéltizidin yoqitishimiz kérek, xuddi fransiyining sabiq prézidénti shirak éytqandek, térrorchiliqqa qarshi turushta hemkarliship birlikte heriket qilishimiz kérek, dep jakarlidi.

Yemendiki qoralliq shi'echiler , se'udi erebistanining urushchi ayrupilanliri yemen chégrisidiki rayonlargha hujum qildi, dep jakarlidi

Amérika awazining bayan qilishiche, yemendiki qoralliq shi'echiler bügün, se'udi erebistanining urushchi ayrupilanliri yemen - se'udi chégrisiki rayonlargha hujum qilip 16 puqrani öltürdi, buningdin ikki kün burun 10 ademni öltürgen idi, dep jakarlidi.

Amérika hazir yemen qatarliq 14 dölettin kélidighan yoluchilargha qarita, pütün bedinining sheklini chüshürüp tekshürüsh tedbirini qollanmaqta

S n n ning bayan qilishiche, amérika qatnash bixeterliki idarisi tünügün, amérikigha kélidighan yoluchilar buningdin kéyin, pütün bedinining sheklini chüshürüp tekshüridighan ilghar eswaplar bilen tekshürülidighanlidighanliqini jakarlighan idi. Bu tedbir bügündin bashlap amérikidiki her qaysi ayrodromlarda qollinilishqa bashlidi. Bashqa döletlerning ayrodromlirimu hazir, bundaq ilghar eswaplarni qollinishni telep qilmaqta.

Roytrs agéntliqining ashkarilishiche, amérika tünügün négiriye, yemen, pakistan, se'udi erebistani, afghanistan, aljiriye, iraq, liwan, liwiye, somali qatarliq döletlerdin amérikigha kélidighan yoluchilarni, chégirida pütün bedinining sheklini chüshürüp, yük-taqlirini axturup tepsiliy tekshürüsh tedbirini qollinidighanliqini belgiligen. Kuba, iran, sodan, süriyilerni 'térrorchilarni teminlewatqan dölet ' tizimlikige kirgüzgen.

Xitaymu 'térrorchiliqqa qarshi turush' dégen nam bilen Uyghurlarni basturushni dawamlashturush üchün nézam tüzdi

Xitaymu hazir 'térrorchiliqqa qarshi turush' dégen nam bilen Uyghurlarni basturushni dawamlashturush üchün, xitayning Uyghur aptonom rayonluq xelq qurultéyi arqiliq herxil namdiki qanunlarni tüzüp chiqti.

Shinxu'a agéntliqining shinjang xewer torida bayan qilinishiche, yéngi yil harpisida, yeni 2009‏ - yil 12 ‏- ayning 29‏- küni maqullan'ghan "aptonom rayonning jem'iyet amanliqini tüzesh nézami"da, xitayning dölet puqraliri qanun'gha xilap jinayi qilmishlargha qarshi köresh qilip ölse, uninggha 'inqilabiy qurban' unwani bérilidu, ularning a'ile teweliri nepiqige ige bolidu؛ qanun'gha xilap jinayi qilmishlargha qarshi köresh qilip ish waqtigha dexl yetken bolsa, ishligen, dep hésablinip ish heqqi bérilidu؛ yarilan'ghan bolsa, her qandaq dawalash orgini ularni shertsiz dawalaydu, uning chiqimini, hökümet mes'ul bolup, qanun'gha xilap jinayi sadir qilghuchidin tülitip alidu, dep belgilen'gen.