Amérika dölet mejliside xitay bilen bolghan soda heqqidiki qanunlarni özgertish teyyarliqi élip bérilmaqta

Amérika dölet mejlisi seyshenbe küni, künséri köpiyiwatqan amérika bilen xitay otturisidiki sodidiki tengsizlikke qarshi hökümetning tedbir élishini asanlashturush üchün heriketke ötüp, bu meqset bilen mewjut qanunlargha özgirish kirgüzüsh üchün teyyarliqqa bashlighan.

Xewerlerge qarighanda, amérika dölet mejlisi hökümetning xitaygha qarshi chare-tedbir qollinishni asanlashturush üchün mewjut qanunlarni özgertish herikitini, maliye ministirliqining yéqinda xitay bilen soda munasiwetliri toghrisida dölet mejlisige sun'ghan doklatidin kéyin téximu tézleshtürgen.

Amérika maliye ministirliqi teripidin dölet mejlisige sunulghan doklatta, xitay bilen amérika ottursidiki sodida mewjut tengsizlikning asasen xitay hökümitining xitay pulining qimmitini meqsetlik halda töwen tutqanliqidin kélip chiqqanliqi, gerche amérika hökümiti xitaydin xitay pulining qimmitini sün'iy halda töwen tutup turushni toxtitip, özining teb'iy qimmitige érishishige yol qoyushini telep qilip kelgen bolsimu, emma xitay hökümitining buninggha pisent qilmighanliqi tekitlen'gen. Amérika maliye ministirliqining bildürüshiche, amérika bilen xitay arisida yüz bériwatqan sodidiki tengsizlik kündin kün'ge jiddiylishiwatqan bolup, yilda 200 milyard dollargha yetken. Yeni xitay amérikigha her yili qimmiti 200 milyard dollardin oshuq tawar éksport qilidiken.

Siyasiy mulahizichilerning éytishiche, prézidént bush hökümiti amérika dölet mejlisi teripidin teyyarlan'ghan qanun layihisini derhal qobul qilishi mumkin. Chünki démokratlar nöwette, prézidént bush hökümitini soda ixtilapida xitaygha qarshi qattiq tedbir qollanmidi dep eyiblimekte, hemde ötken ay amérikida ötküzülgen dölet mejlisi saylimda prézidént bushni tenqid qilish üchün bu mesilidin paydilan'ghan.

Amérika dölet mejlisi kéngesh palatasi maliye ishliri komitétining re'islik wezipisini üstige élish aldida turghan démokratchil sénator maks bawkos " xitay hökümiti xitay pulining qimmitini islah qilishi kérek. Hemmimizge ayanki, bu mesilide islahat élip bérishni texir qilish, hem xitay iqtisadigha hem amérikigha hemde xitay amérika munasiwetlirige ziyanliq" dédi.

U mewjut qanunlarning bashqa döletler bilen dölet pulining qimmiti mesilside mewjut ixtlaplarni birterep qilishqa jawab birelmeydighan ehwalda ikenlikini bildürdi.

Xewerlerge qarighanda, amérika dölet mejlisi kéngesh palatasi yéngi qanun layihisi chiqrishtin burun aldimizdiki yilda amérika-xitay munasiwetliri heqqide guwahliqtin ötüsh yéghinliri uyushturup, maliye ministirliqi xadimlirini guwahliqtin ötüsh üchün teklip qilidiken. (Qanat)