19 - Awghust aqsu partlash weqesidin kéyin Uyghur rayonida bixeterlik tedbirliri kücheytildi

Mushu ayning 19 - küni, aqsuda charlash saqchilirigha qarita élip bérilghan partlitish xaraktérlik hujum qilish weqesidin kéyin, Uyghur élining her qaysi jaylirida bixeterlik tedbirliri yenimu kücheytilgen. Mehellilerde amanliq saqlash xadimliri köpeytilgen.
Muxbirimiz mihriban
2010-08-30
Share
Aqsuda-partlash-uch-chaqliq-motoskilit-305 Süret, uyghur diyarining melum yézisidiki ikki déhqan yashning aqsuda yüz bergen partlitish weqeside ishlitilgenge oxshash uch chaqliq motsiklitqa minip turghan körünüshi.
http://articles.latimes.com Din élindi.

Radi'omiz Uyghur élining qeshqer we ili qatarliq jayliridin igiligen uchurlardin melum bolushiche, aqsuda weqe yüz bérip uzun ötmey, jaylarda qatnash qorali bar puqralarning shopurluq kinishkisi qaytidin tizimgha élinip, yézilardin sheherlerge kirgen yoluchilarning kimliki qattiq tekshürülüshke bashlighan.

Qeshqer tewesidin ziyaritimizni qobul qilghan bir xanimning bildürüshiche, hazir ularning yézisida yashlar eger kimliki bolmisa héch yerge baralmaydiken. Bolupmu 19 - awghust aqsuda yüz bergen partlash weqesidin kéyin, herqaysi qatnash tügünliride yoluchilarning kimliki we nerse -kérekliri qattiq tekshürülüshke bashlighan.

Bu xanim yene, yézilargha orunlashturulghan bixeterlik xadimliri we ularning wezipisi heqqide toxtaldi. Uning bildürüshiche, ularning yézisida her bir mehellige birdin charlash xadimi qoyulup, ulardin mehellidiki gumanliq kishilerni yuqirigha melum qilish telep qilinmaqta iken.

Radi'omiz, ili tewesidiki yézilargha téléfon qilish arqiliq, ili rayonidimu bixeterlik tedbirliri köpeytiliwatqanliqi heqqidiki inkaslarni igiliduq. Ghulja nahiyisidiki bir déhqanning bildürüshiche, hazir nahiyidin sheherge kirmekchi bolghan kishilerning kimliki yoldiki charlash saqchiliri teripidin bir tutash yighiwélinip tekshürülgendin kéyin, andin ularning sheherge kirishige yol qoyulidiken.

Bu déhqan yene, ularning yézisigha hazir mexsus bixeterlikni saqlash üchün yuqiridin kadirlarning kelgenlikini, ularning asasen yézigha sirttin kelgen méhmanlarning ehwalini öy - öyge kirip tekshürüp turush hem yézidiki gumanliq ehwallarni yuqirigha melum qilishqa mes'ul ikenlikini bildürdi.

Dunya Uyghur qurultiyi bayanatchisi dilshat rishitning bildürüshiche, sherqiy türkistanda dawamlishiwatqan, Uyghurlargha qaritilghan bu xil qattiq tekshürüsh "19 - awghust aqsu weqesi" din kéyinla yolgha qoyuluwatqan bolmastin, belki bultur "5 - iyul ürümchi weqesi"din bashlapla Uyghurlargha qaritilghan omumyüzlük ehwal iken.

Dilshat rishit sözide, xitay hökümiti Uyghurlargha qaratqan bu xil qattiq tekshürüshning emeliyette xitay özi qol qoyghan xelq'ara kishilik hoquq ehdinamisige xilap ikenlikini, buning Uyghurlarning heq - hoquqlirigha qilin'ghan haqaret ikenlikini ilgiri sürüp, xitay hökümitini eyiblidi.

Uyghur éli weziyitini közetküchilerning qarishiche, bultur "5 - iyul ürümchi weqesi"din kéyin, xitay hökümet da'iriliri dunya jama'etchilikige "Uyghur aptonom rayonida weziyet eslige keldi, iqtisadni tereqqiy qildurush arqiliq rayonda uzun muddetlik eminlikke kapaletlik qilimiz" dep jakarlighan bolsimu, lékin 19 - awghust aqsuda yüz bergen hujum qilish weqesi Uyghur éli weziyitining yenila tinchsiz ikenlikini körsitidiken.

Yuqiridiki awaz ulinishidin, bu heqtiki melumatimizning tepsilatini anglaysiler.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet