Йәнә икки гумандар ақсудики партлитиш вәқәсигә четилип тутулди

Мухбиримизниң ақсудики йәрлик аһалә вә сақчи органлиридин игилишичә, түнүгүн хитайниң ақсу шәһәрлик сақчи идариси разветка бөлүми 19 ‏- авғуст күни йүз бәргән ақсудики партлитиш һуҗумиға четишлиқ дәп қаралған йәнә икки гумандарни тутқун қилған.
Мухбиримиз шоһрәт һошур
2010.08.23
Aqsuda-partlash-uch-chaqliq-motoskilit-305 Сүрәт, уйғур дийариниң мәлум йезисидики икки деһқан йашниң ақсуда йүз бәргән партлитиш вәқәсидә ишлитилгәнгә охшаш уч чақлиқ мотсиклитқа минип турған көрүнүши.
http://articles.latimes.com Дин елинди.

Ашкарилинишичә, мәзкур партлитиш һуҗуми йүз бериштин 2 күн аввал, ақсу шәһириниң көкяр кәнтидә хитай сақчилири билән уйғур қораллиқ қаршилашқучилар арисида тоқунуш йүз бәргән.

Хитай даирилириниң ақсудики партлитиш вәқәсиниң баш ‏- ахири һәққидики мәлуматларни йошуруватқанлиқи мәлум болмақта. Түнүгүн ақсу шәһиридики 6 сақчихана вә йәрлик аһалиләрдин игилишимизчә, 19 ‏- авғуст күни партлитиш һуҗуми йүз бериштин 3 күн аввал, ақсу шәһириниң көкяр дегән җайида хитай сақчилири билән бир қанчә уйғур қораллиқ қаршилашқучилар арисида тоқунуш йүз бәргән.


Йәнә ашкарилинишичә, хитай сақчилири түнүгүн, ақсудики партлитишқа четишлиқ дәп қаралған йәнә икки гумандарни тутқун қилған. Гумандарлар, ақсу шәһәр яқисидики юқири сүрәтлик йолдики бир көврүкниң астида йошурунуп ятқан йеридә тутулған. Түнүгүн йәнә 19 ‏- авғуст партлитиш вәқәсигә четилип 2 гумандар тутқун қилинған.

Мәлум болушичә, көврүкниң астидин тутулған икки гумандар, 19 ‏- авғуст партлитиш елип барған һуҗумчиниң шериклири дәп қаралмақта вә икки гумандарниң тутулғанлиқини аридин 2 соткиға йеқин вақит өткән болсиму, ахбараттин йошурун тутмақта. Биз бу әһвални техиму тәпсилий уқуш үчүн, ақсу шәһәрлик дөләт бихәтәрлик сақчилиридин әһвал игилидуқ.

Хитай даирилири кокярдики вәқәни, қанун саһәсидә мәхсус уқтуруш тарқитип уқтурған, әмма ахбаратқа ашкарилимиған. Сақчилар, көкярдики тоқунушта, бир киши өлгән вә бир аял киши тутқун қилинғанлиқини билдүргән болсиму, лекин қумбаш сақчиханисиниң йеза вә кәнт дохтурханилирида тәкшүрүш елип барғиниға қариғанда, көкярдики тоқунушта йәнә бир қисим кишиләрниң яридар болғанлиқи вә қачқанлиқи мәлум болмақта.

Буниңдин бир қанчә күн бурун хитай тор бәтлиридә, ақсудики хитай аһалилири пикир баян қилип, сақчиларниң партлитиш вәқәсидин аввал, бир түркүм оқ- дора қатарлиқ партлитиш буюмлирини паш қилғанлиқини, буниң билән нәқ мәйданда вәқә келип чиққанлиқини, һөкүмәтниң болса бу учурларни йошуруватқанлиқини билдүргән иди.

Вәқәниң вақит тәртипидин қариғанда, көкярдики тоқунуш, долан көврүктики партлитиш вә юқири сүрәтлик ташйолда мөкүнүш вәқәлириниң бир- биригә четишлиқ икәнлики, әмма хитайниң булардин пәқәт, партлитиш вәқәсинила ахбаратқа ашкарилиғанлиқи мәлум болмақта.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.