Аримизда шундақ алаһидә кишиләр бар

Һөрмәтлик оқурмәнләр, һәммә әзайи сақ болған нормал кишиниң, җисманий җәһәттин мейип мәҗруһ кишиләрниң роһий дунясини чүшүнүп келиши натайин, әтрапимиздики мейип кишиләрдин сорап бақсақ уларниң җәмийәттин күтүдиғини пәқәт уларниң җисманий аҗизлиқиға ич ағритиш, яки турмушини қамдишиға анчә мунчә сахавәт көрситиш әмәс, әмәлийәттә уларниң күтидиғини йәни нормал инсанлардин күтидиғини уларни җәмийәтниң бир әзаси дәп билиш вә уларниңму нормал роһий дуняси барлиқи һәтта бәзи җисманий җәһәттин сағлам кишиләрдинму күчлүк ирадигә игә, аҗайип ғайә вә арзулириниң барлиқини етирап қилиштур.
Мухбиримиз гүлчеһрә
2009-02-20
Share

Билиш керәкки роһий мәҗруһлуқ җисманий мәҗруһлуқтинму яман. Инсанни йиқитидиғини җисманий аҗизлиқ әмәс бәлки роһий аҗизлиқ.

Инкаслардин мәлумки хитайда җүмлидин уйғур елидә мейипларға нисбәтән мукәммәл бир җәмийәт системиси бәрпа қилинмиған, уларниң инсаний һәқ -  һоқуқлири һәққидә тохтилиштин бурун уларниң иҗтимаий капалити һәтта җәмйәттә орниниңму болмайватқанлиқдәк реални мәсилиләр алдимзни тосайду. Мейипларни аҗиз дәп қараватқан җәмйәттә уларға болған көңүл бөлүшиму пәқәт маддий җәһәттики иқтисадий җәһәттики ярдәмләр биләнла чәклиниду. Әмәлийәттә әтрапимиздики җисманий җәһәттин мәҗруһ болған кишиләрниң көпинчиси инсанларниң уларниму бир нормал инсан дәп қаришини үмид қилиду, улар кишиләрниң хәйри сахавити, меһри шәпққәт йәткүзишидин бәкрәк, өзлиригә нормал инсан сүпитидә һөрмәт қилишини күтиду.

Уларниң арисида шундақ ирадилик кишиләр барки уларниң роһийити адәттики сағлам кишиләрдинму сағлам һәм күчлүк, улар бу мәҗруһлуқидин ибарәт реаллиқни етирап қилип һәм шуни йеңип яшимақта. Улар дуняға башқа нуқтидин туруп қарайду, улар шунчилик шүкри қанаәтчанки улар өзлиригә адил муамилә қалмайватқан, аран сиғдуруватқан мушу җәмийәткә йәнила миннәтдарлиқ билдүриду. Уларниң бәзилири сиз вә бизгә охшаш җисманий җәһәттин сағлам кишиләр қилалмайдиған ишларниму вуҗутқа чиқиралайду, һеч болмиса шуниң үчүн тиришиду.

Қәшқәрдики гүлбаһар турсун исимлик бир қиз йеқинда уйғур тор бәтлиригә " мән бөрикимни һәқсиз тәқдим қилимән" дегән мураҗиәтни елан қилди.

Инсан һаятида нурғун һиҗран азаблириға учриши мумкин, әмма инсан үчүн өз җисминиң бир қисми билән видалишиштинму артуқ һиҗран болмас, мана бу өз бөрикини тәқдим қилиш арқилиқ йәнә бир инсанни қутқузуш ирадисигә кәлгән гүлбаһар, ривайәтләрдики ақкөңүл пәриштиму әмәс, җисманий җәһәттин алаһидә сағлам бир қизму әмәс, әмәлийәттә өзи бир мейип қиз.

Гүлбаһар қанлиқ бәдәл бериш орниға бу дуняда бир инсан сүпитидә из қалдурушни, инсан сүпитидә етирап қилинишни ойлимақта. Дуня, тәқдир, җәмийәт униңға рәһимсиз болсиму у йәнила адәттин ташқири меһир шәпқәтлик йүрики билән җаваб қайтурмақта. Реаллиқтики пәриштә кәби гүлбаһарниң өзиниң ахирқи сақ әзасиниму тәқдим қилиш арқилиқ, йәнә бир һаятлиққа яшаш үмиди ата қилиш арзуси җәмийәтни тәсирләндүрмәктә, ойғатмақта.


Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт