Awistraliyining séydni shehiride ötküzülgen putbul musabiqisi muwappeqiyetlik ayaghlashti

Awstraliyining séydni shehiride ötküzülgen 8 - nöwetlik "Awstraliye Uyghur longqisi" aylanma musabiqisi 12 - ayning 23 - küni bashlinip 26 - küni muweppeqiyetlik halda ayaghlashti.
Ixtiyariy muxbirimiz abide
2012-12-26
Share
awustraliye-uyghur-putbol-2012-305.jpg Awistraliyining séydni shehiride 2012-yili ötküzülgen putbul musabiqisidin bir körünüsh
RFA/Abide


Üch kün dawamlashqan bu musabiqide qattiq issighan hawa hem musabiqining axirqi künidiki qattiq yamghurlarmu musabiqige qatnashqan ezimetlerni tewritelmigen. Musabiqe tamashibinlarning medet tiligen awazliri bilen intayin keskin we jushqun halette dawamlashqan.

Musabiqining ichilish murasimi dunya Uyghur qurultiyining mu'awin re'isi, awstraliye Uyghur jem'iyitining re'isi memtimin ela ependining riyasetchilikide muweppeqiyetlik ilip bérildi. Bu qétimliq musabiqige adilayd, sidnéy we mélburin komandiliri hem shundaqla herbir sheherdin kelgen wekiller qatnashti. Dunya Uyghur qurultiyi wekilliridin, yaponiyidin yaponiye Uyghur jem'iyitining re'isi ilham mehmut ependi, gérmaniyidin dunya Uyghur qurultiyining mu'awin re'isi ümid agahi ependiler bu qétimqi musabiqining eziz méhmanliri süpitide ichilsh murasimigha qatnashti we tebrik sözliri qildi.

Memtimin ela tenherketchiler bilen bille
Memtimin ela tenherketchiler bilen bille

Pa'aliyetning orunlashturghuchsi'i we bashqurghuchiliridin biri bolghan, awstraliye Uyghur jem'iyitining re'isi memtimin ela ependi ziyaritimizni qobul qilip bu yilliq musabiqe teyyarliqliri hem shundaqla bu musabiqining muhimliqi heqqide toxtilip ötti. U sözide "Bu peqet bir putbol musabiqisi bolupla qalmay, awstraliyidiki yashlarning her yili bir yerge jem bolup, öz - ara tonushush, öz - ara chüshinishni ilgiri sürüshtiki yaxshi bir purset" dep körsetti.

Dunya Uyghur qurultyigha wakaliten bu pa'aliyetke qatnashqili kelgen, musabiqinng méhmanliri bolghan ilham mehmut ependi bilen ümid agahi ependi ziyaritimizni qobul qildi.

Ilham mehmut ependi öz sözide mundaq dédi: bizning kélishtiki meqsitimiz, dunya Uyghur qurultiyining awstraliyidiki jama'etchilikke we awstraliyidiki pa'aliyetlirige muhim orunda qoyup köngül bölüwatqanliqini yetküzüsh. Biz mushundaq ammiwi pa'aliyetlerge buningdin kiyin dunya Uyghur qurultiyining özige chushluq küchini chiqirip, pa'aliyetlerni dunya boyiche güllendürüsh, janlandurush terepte iradisi barliqini köpchilikke yetküzüsh üchün bu qétimqi pa'aliyetke kelduq. Bu xil ammiwi pa'aliyetler bizning dunya Uyghur qurultiyining buningdin kéyinki xizmetlirining güllinishide muhim rollarni oynaydu. Awstraliyidiki pa'aliyetlerning bundaq janliq ilip bériliwatqanliqigha qarap nahayiti xushal bolduq hemde awstraliyidiki pütün Uyghur xelqige chin qelbimizdin rehmet éytimiz.

Ümid agahi ependi ziyaritimizni qobul qilip mundaq dédi: bügün men bu yerde gérmaniyidiki we yawropadiki wetendashlargha wakaliten awstraliye Uyghur longqisini talishish yashlar musabiqisige qatnashtim. Bular nahayiti yaxshi teyyarliq qiliptu. Hemme yerde sherqiy türkistan bayraqliri jewlan qilip turidu. Yashlarning keypiyati nahayiti jushqun. Méning hemmidin bek hayajanlan'ghinim, awstraliyidiki Uyghurlarning öz medeniyitini, her sahediki ilgharliqini körsitip, yashlarni ittipaqlashturup, putbol musabiqisi orunlashturush arqiliq sherqiy türkistan bayriqini yene bir qétim mushu yerde jewlan qilip, sherqiy türkistan dölet gémini orunlap jama'et bile birlikte bu pa'aliyetni nahayiti qizghinliq bilen ilip bériwatqanliqidin nahayiti tesirlendim hemde nahayiti xursen boldum.

Bu qétimliq musabiqide, adilayd sherqiy türkistan komandisi birinchilikke, milburin komandisi ikkinchilikke, sédini komandisi üchinchilikke érishken. Adilayd komandisidin "Munewwer térnir" bolup bahalan'ghan nesirulla ziyaritimizni qobul qilip mundaq dédi: bizning balilar bu musabiqige kélishtin burun nahayiti qattiq, japaliq meshiqler qilish jeryanida bezi balilirimiz yaridar boldi. Shundaq bolsimu, yene kélip biz bilen oynap nahayiti yaxshi tirishchanliqlar bilen bu longqigha érishtuq. Bizning balilar bek xushal, hazir bu yerde.Awstraliyidiki pütün yash balilar birliship weten üchün, xelq üchün yaxshi ishlarni qilishqa chin dilimizdin özimizningki küchimizni chiqirishqa tirishimiz. Séydnidiki pütün jama'etke rehmet éytqum bar. Hemmeylenning mushundaq ittipaq bolup, musabiqilirimizning mushundaq dawam qilishini ümid qilimen. Biz adilaydin kilip longqa alghinimizghimu shundaq xush. Hemmimizning mushundaq xushal - xuram, ittipaq bolushini ümid qilimen.

Awstraliyige kéliwatqan Uyghur yashlirining köpiyishige egiship, putbol oynashqa qiziqidighan yashlarning sanimu tedrijiy ashmaqta. Ular ishtin sirtqi bosh waqitlirida meshiq élip bérip, yene bir tereptin her xil musabiqilerge qatniship Uyghur dégen namini bashqilargha tonushturmaqta.

Musabiqining orunlashturghuchilirining biri bolghan bextiyar ependi musabiqe heqqide söz qilip mundaq dédi: bu qétimliq musabiqe sédnida ötküzüldi. 3 Kün dawamlashqan bu musabiqe séydini, milburin we adilayd komandilirining musabiqige chüshüshi bilen bügün axirlashti. Bu musabiqide munewwer shexsler, munewwer tirnirlar hem teqdirlendi. Séydnidiki awstraliye Uyghur jem'iyiti musabiqini teshkilleshke küch chiqarghan. Séydinidiki jama'et nahayiti yaxshi qollap, shara'itlarni yaritip, hemme jama'et asasi jehettin qatniship, mana bügün bu musabiqining netijilik, yaxshi bolushigha zor küchlerni chiqardi. Bu musabiqining yene bir alahide bolghini dunya Uyghur qurultiyining yawropadiki mu'awin re'isi ümid agahi we yaponiyidiki mu'awin re'isi ilham mahmut ependiler alahide kélip, méhman süpitide qatnashti. Buning bilen bu musabiqining tesir da'irisi bir qeder chong hem nahayiti yaxshi muweppeqiyetlik boldi.

Kéler nöwetlik musabiqe milburin shehiride ötküzülidighan bolup, 3 sheherdiki mahirlar buningdin kéyin ötküzülidighan musabiqilerde özlirining eng chong maharetlirini körsitip, öz xelqini, chonglarni we kichiklerni ilhamlanduridighanliqini bildürdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet