Шветсийә сотида бабур мәхсут делоси һәққидә гуваһлиқ берилди

Бүгүн әтигән шветсийә вақти саәт 10 дин 11:30 ғичә, шветсийиниң стокһолм шәһиридә, бултур 5 - ай мәзгилидә җасус гумандари дәп әйиблинип, тутуп турулған бабур мәхсут һәққидә гуваһлиқ бериш соти ечилған.
Мухбиримиз миһрибан
2010.02.12
Jasus-gumandari-Babur-Mexsut1-305 Сүрәттә, җасус гумандари бабур мәхсутниң 2009 - йили май ейида вашингтонда ечилған д у қ ниң йиғини җәрйанида өткүзүлгән хитай әлчиханиси алдидики намйишқа қатнишиватқан күрүнүш болуп, җасус гумандари бабур мәхсут оңдин иккинчи киши.
RFA Photo

Соттин кейин, шветсийә сотида бабур мәхсутни әйиблигүчи томас линдстранд әпәнди һәм бу қетимлиқ сотта гуваһлиқ бәргүчи сүпитидә сотқа қатнашқан дуня уйғур қурултийиниң баянатчиси дилшат ришит әпәнди, радиомиз уйғур бөлүминиң зияритини қобул қилди.

Томас линдстаранд әпәнди зияритимизни қобул қилип, сотниң йепиқ һаләттә ечилғанлиқи үчүн, һазирчә делоға мунасивәтлик бәзи һалқилар һәққидә мәлумат берәлмәйдиғанлиқини, лекин бабур мәхсутниң җасуслуқ җинайити билән әйиблинишиниң сәвәби һәққидә зияритимизни қобул қилалайдиғанлиқини билдүрди.

Томас линдстаранд әпәндиниң билдүрүшичә, җасуслуқ җинайити билән әйиблиниватқан бабур мәхсут, шветсийидә сиясий панаһлиқ тиләп туруп қалғандин кейин, 1997‏ - йилидин буян шветсийә, норвегийә, германийә вә америкида туруватқан уйғурлар тоғрисида хитайға җасуслуқ қилиш билән шуғуллинип келиватқан болуп, у бу җәрянда, хитайниң сиясий вә диний зиянкәшликигә учрап, юртлиридин қечип чиққан уйғурларниң сиясий панаһлиқ тиләш әһвали, саламәтлик әһвали, қайси дөләттә туруватқанлиқи, телефон номури қатарлиқлар һәққидә хитайға җасуслуқ қилип келиватқанлиқини баян қилди.

Томас әпәнди сөзидә йәнә, бабур мәхсутниң хитайға җасуслуқ қиливатқанлиқи һәққидики пакитларниң асасән рәтлинип болуп, һазир гуваһчиларниң сотқа чақирилип гуваһлиқ бериватқанлиқини, 2 - айниң 26 - күни сот аяғлишип, бу дело һәққидә һөкүм чиқирилидиғанлиқини, 3 - айниң 8 - 9 - күнлири һөкүм нәтиҗиси елан қилинидиғанлиқини баян қилди.

Дуня уйғур қурултийиниң баянатчиси дилшат ришит әпәнди бу қетимлиқ сотта гуваһлиқ бәргән болуп, у сотниң омумий әһвали һәққидә тохталди.

Дилшат ришит әпәнди өзиниң шветсийә дөләт бихәтәрлик идарисида бабур мәхсутниң җинайи пакитлири һәққидики испатларни көргән чеғидики һессиятини ипадиләп, өзиниң бир уйғур болуш сүпити билән бу испатларни көргән чеғида көңлиниң толиму йерим болғанлиқини, мәйли сотниң нәтиҗиси қандақ болсун, һәр қандақ бир уйғурниң бу хил қилмишларни қобул қилалмайдиғанлиқини һәм әйибләйдиғанлиқини билдүрди.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.