Men Uyghur balisi

1-Iyun xelq'ara balilar bayrimidek eng xushalliq bayriminglarda, erkin asiya radi'osidiki tagha-achiliringlar silerni untup qalghini yoq, emdiki minutlarni silerge atimaqchimiz.

Gülchéhre achanglar bügünki anglitish waqtimizdin paydilinip chet'ellerdiki xelq'araliq siyasiy sehnisidin tartip, ilim hem sen'et sahesigiche her sahede tonulghan bezi pexirlik Uyghurlirimizni ziyaret qilip, ularning hem bizning tileklirimizdin dunyaning barliq jayliridiki söyümlük balilirimizgha atap güldeste tizdi, qéni qobul qilinglar hem bayriminglar tatliq külkiliringlar bilen tolsun.

Salam badam doppa, chimen doppilar, salam pütün dunyaning her qaysi jayliridiki Uyghur baliliri,-1 iyun balilar bayriminglargha mubarek bolsun. Ata aniliringlarning, bizningmu silerge oxshash ghemsiz baliliqimiz bolghan, bizningmu tapshuruqtin xali, tenqidsiz, peqetla sowghilar, tilekler, tatliq kempütler bilen ötküzgen bayramlirimiz bolghan. Silerge oxshash ajayip-gharayip chüshlirimiz, xiyallirimiz bolghan mana bular baliliqimizdiki eng qimmetlik nersiler.

Siler dunyaning siyaset, ilim-pen, soda-sana'et, medeniyet-sen'et sehniside we her sahelerdiki pexirlik Uyghur siyasiyonlar, alim, ölimalirimiz,sen'etkarlirimizning baliliqining qandaq ötkenlikige qiziqamsiler? ular silerdek chaghlirida némilerni xiyal qilattikine? ularning özidin sorap köreyli, aldi bilen silerni amérikining paytexti washin'gtondiki Uyghurlarning milliy herikiti rehbiri bolghan rabiye qadir anining ishxanisigha bashlap kirey.

Ésimni bilsem, kichikimde dunyada apiride qilin'ghan barliq nersiler ichide hemmidin sirliq tuyulidighini asman idi, silergimu shundaqmu? bilemsiler, xelq'aradiki alem tetqiqati ornidimu bizning pexirlik alimlirimiz bar, amérikidiki nasa dep atalghan alem téxnikisi tetqiqat orginidiki doktor taghanglar erkin sidiq ependi Uyghurlargha tonulghan astronomiye alimlirining biridur, qéni uningdin sorap köreyli, umu silerdek chaghlirida yultuzlar heqqide xiyal sürüp baqqanmu-yoq?

Etrapimizgha baqayli, bu dunya menzire rengler bilen tolghan ajayip-gharayiplar bilen tolghan, hetta mewhum dunyayimiz chüshlirimizmu shunche rengdar, shunga resim sizalmaydighan bala bolmisa kérek, arimizda oylighanlirini sözlesh we yézishqa baqqanda, sizishqa amraq balilar bar, tonulghan Uyghur ressamlar ichide gérmaniyide yashawatqan merwayit hapiz, baliliq chaghlirida ene shundaq némini körse shuni sizip baqidighan talantliq qiz idi.

Anglidinglarmu balilar, biz tirishsaqla, emelge ashuralmaydighan chüsh yoq, hemmimiz birlikte tirishsaq, mushu pexirlik ana we tagha-achiliringlardek arzulirining hemmisini emelge ashuralaymiz, chünki siler, dunyaning kelgüsi, barliq sirlarning achquchi silerning qolunglarda.

Axirida, bayriminglargha atap qazaqistandiki talantliq Uyghur ösmür cholpan suxrap nizamidinof orunlighan “Men Uyghur balisi” dégen naxshini teqdim étimiz, bayriminglar tatliq ötsun qozilirim, ümid silerge külsun!

Yuqiridiki awaz ulinishidin tepsilatini anglighaysiler.