Balilarning hoquq menpe'itini némige tayinip qoghdaymiz?

Baqquchi ayalning öyide xarlashqa uchrighan abduréhimjanning ata-anisi, balining bedinidiki yara we zexme izlirining tashqi zexme ikenliki heqqide ikki oxshimighan doxturxanining di'agnozliri we bashqa ispatlarni kötürüp, ikki heptidin buyan shimigo rayonluq nenxu saqchi ponkitigha dawa qilip bériwatqan bolsimu, hazirghiche buning bir netijisi bolmighandin sirt, eksiche özlirige bohtan chaplinip azabning üstige xorluqqa qalghan, bu adaletsizlik abduréhimjanning rak késilige giriptar bolup késel kariwitida yatqan anisi zinnetgülni ghezeptin ornidin turushqa mejbur qilghan bolup, u “Ilgiri késel azabigha chidimay baldurraq ölüp ketsemmu boptiken dep oylighan idim, oghlum bu xorluqqa uchrighandin kéyin özümni hejep shexsiyetchi ikenmen dep oylawatimen, men ümidlik yashishim kérek, oghlumni-balilirimni bashqilargha bermeymen, ularni yaxshi saghlam béqish üchün yashaymen” dédi.

Biz abduréhimjanni bala baqquchigha tapshurghan we abduréhimjanning zeximlen'genlikini birinchi bolup körgen uning chong apisi zöhregül bilen alaqileshtuq, u singlisigha bala baqquchini tonushturghanliqigha pushayman qilip özini eyiblep azabliniwatqan bolsa, jiyenining xorluqqa uchrishida öziningmu jinayet gumandarigha aylinip qélishidin ghezeplenmekte.

Balilarni qoghdash a'ilining, jem'iyetning, döletning mes'uliyiti, bir döletning ewladlargha we ma'aripqa tutqan pozitsiyisi uning kelgüsini belgileydu, rehimsiz jem'iyette, xorluqta üsüp yétilgen bala kelgüside özini xarlighan jem'iyetke qandaqmu méhribanlarche mu'amile qilalisun?

Abduréhimjanning dadisi, saqchi, adwokatqa oxshash qanun ijra qilghuchilarning, puqralarning hoquq menpe'itini qoghdashqa tutqan bu xil passip pozitsiyisidin, adaletsizlik hés qilghanliqini, özining amalsiz qalghanliqini bildürüp : balilarni zadi némige, kimge tayinip qoghdaymiz? dédi.

Xitayning we xelq'araliq balilarning hoquq menpe'itini qoghdashqa da'ir qanunlirida, balilarni jismaniy, rohiy we jinsi hemde bashqa jehetlerdin zeximige uchritishning hemmisi xorlash jinayiti shekillendüridighan heriketler dep qarilidu. Yeni qorumigha yetmigen yaki özini qoghdash iqtidarigha ige emes yash ösmürlerni qattiq urup zeximlendürüsh, bowaqlarni qattiq silkish, térisini köydürüsh, nepisini boghush, baghlap qoyush, ach qoyush qatarliqlar, balilarni héchkim söymeydighan kéreksiz bir bala ikenlikini hés qildurush, ularni xeterlik, qorqunchluq shara'itta yalghuz qoyup qoyush, balilarni qorqutush, adaletsizlik qilish, qurbi yetmeydighan ishlargha zorlash, qattiq telep we yük artish qatarliqlar, buningdin bashqa jinsiy xorluqmu balilargha ziyankeshlik qilish, xorlash jinayiti hésablinidu, balilargha qilin'ghan bu xil ziyankeshlik ularni jismaniy we rohiy jehetlerdin zeximlendürüpla qalmay, ularning pütün hayat musapiside selbiy rol oynaydu we yene ölüwélishqa oxshash échinishliq aqiwetlerni keltürüp chiqiridu.

Xitayning jinayi ishlar dewa qanuni we qorumigha yetmigenlerni qoghdash qanun we nizamliridimu bu xil jinayet sadir qilghan jinayetchilerge qattiq jaza békitilgen.

Biz gerche shimigo saqchi ponkiti we bala baqquchi ayal mahinur bilen téléfon alaqisi qilishqa tirishqan bolsaqmu, ular téléfonimizni qobul qilmidi. Biz bu bala xorlash weqesining netijisi heqqide dawamliq iz qoghlaymiz.