Б д т инсанийәт тәрәққияти программиси чириклик тоғрисида доклат елан қилди

12 - Июн пәйшәнбә күни бирләшкән дөләтләр тәшкилати инсанийәт тәрәққияти программиси " чирикликкә қарши туруп һаятлиқни өзгәртиш: асия ‏ - тинч окян районлирида инсанийәт тәрәққиятини илгири сүрүш" темиси астида бир доклат елан қилди.
Мухбиримиз җүмә хәвири
2008-06-13
Share

 Доклатта, намратлиқ билән чирикликниң бир ‏ - биригә четишлиқ икәнлики, чериклик қанчики еғир болғансери намратлиқиниң шунчики яманлишип баридиғанлиқи көрситилип, чирик дөләтләрдә намрат кишиләрниң әң еғир зәрбигә учрайдиғанлиқи санлиқ мәлуматлар билән оттуриға қоюлди.

 Қанун йүргүзүш тармақлиридиму чириклик интайин еғир

Доклатта чириклик мәсилисини һәл қилиштики тарихи мәсилиләр үстидә тохтилип, асия - тинч окян районлиридики әлләрниң чирикликкә чирмишип кәлгәнлики, гәрчә хитай, сингапор вә хоңкоң қатарлиқ район вә дөләтләрдә чирикликни азайтиш җәһәттә бир қатар хизмәтләр ишләнгән болсиму, әмма бу райондики дөләтләрниң һәммисидә чирикликни йоқитиш қәдиминиң интайин аста болуп кәлгәнлики көрситилгән.

Доклатта оттуриға қоюлушичә, асия - тинч окян райони әллиридә қанун йүргүзүш тармақлиридиму чириклик интайин еғир болуп, көпинчә һалларда шу сәвәбтин адаләт яқиланмай қалидиған әһваллар көп учрайдикән.

Доклатта асия ‏ - тинч окян районлиридики чириклик дәриҗиси һәққидә елип берилған бир рай синаштин мисал елинған болуп, асия ‏ - тинч окян райони әллиридики һәр бәш адәмниң ичидә бир адәм сақчиға пара берип иш тоғрилайдикән.

Бу һәқтә тохталған б д т тәрәққият программиси ахбарат бөлүмидики мәсул хадим кара сантос ханимниң билдүрүшичә, юқириқи рай синаш асия - тинч окян әллиридики барлиқ дөләтләрдә ортақ елип берилған болуп, у хитайниму өз ичигә алидикән.

Хитайда чириклик юқири дәриҗилик әмәлдарлар арисидиму охшаш мәвҗуттур

Доклатта йәнә, асия - тинч окян районлиридики чириклик мәсилиси түпәйли тәбиий байлиқларниң хораш сүритиму тиз болуп, пайда елишнила көзләйдиған ширкәтләр нәпсанийәтчи әмәлдарларға пара берип, дәл - дәрәхләрни қалаймиқан кесиш, байлиқ мәнбәлирини қалаймиқан ечиш содилириға йол ачидикән һәмдә бәзи әһвалларда, әмәлдарларму бундақ тиҗарәткә йошурун мәбләғ салидикән.

Доклатта хитайниң чириклик вә чирикликкә қарши туруш тарихиға нәзәр селинған болуп, гәрчә тарихтин буянқи хитай һакимийәтлиридә үзүлдүрмәй мәвҗут болуп турған чирикликкә һәрхил васитиләр йәни, куңзи тәлиматини өз ичигә алған әхлақи өлчәмләрни ишқа селиш қатарлиқларни ишқа селип тақабил туруп кәлгән болсиму, "әмма чириклик йәнила мәвҗут мәсилә сүпитидә қеливәрди" дәп көрситилгән.

Вәһаләнки, доклатта йәнә, һазирқи хитай һөкүмитиниң чирикликни йоқитиш вә чирикликкә қарши турушта бәзи иҗабий хизмәтләрни ишлигәнликини һәмдә хитай қанун бәлгиләш тармақлириниң 2006 - йили июнда җинайи ишлар қанунниң 6 - қетим өзгәртилгән нусхисида әгәр мәктәп, дохтурхана хадимлири хизмәт шараитидин пайдилинип пара алса җинайи ишлар җавабкарлиқиға тартилидиғанлиқи тонуштурулғанлиқи илгири сүрүлүп, алдинқи йили пара алғанлиқи үчүн қолға елинип өлүмгә һөкүм қилинған хитай дөләтлик дора - дәрмәк вә йимәк ичмәк башқуруш баш идарисиниң башлиқи җең шявйү вәқәси мисал қилинған.

Һалбуки, хитайда чириклик мәсилиси йәнила еғир болуп, бу чәт - яқилиридики төвән дәриҗилик әмәлдарлардин тартип дөләт кабенитидики юқири дәриҗилик әмәлдарлар арисидиму охшаш мәвҗуттур.

Хитайдәк бир партийилик дөләттә чирикликни йоқитиш интайин мүшкүл

Бу һәқтә өз көз қаришини ипадилигән сиясий көзәтчи илшат әпәнди, хитай һакимийәт қурулмиси җәһәттин елип ейтқанда, парихорлуқ вә чирикликни үнүмлүк тазилашқа бап кәлмәйдиғанлиқини, хитайда чирикликниң интайин йошурун иҗтимаий һадисә икәнликини һәмдә хитайдәк бир партийилик дөләттә чирикликни йоқитишниң интайин мүшкүл икәнликини билдүрди.

Доклатта хитайдики чириклик һәмдә униңға қарши туруштики чариләр һәққидә хитай сиясий вә иқтисади һәмкарлиқ мәркизидики профессор зең кехениң тәклиплири қистурма қилип берилгән болуп, бу тәклип мундақ көрситилгән: " хитайдики чириклик сәвәбидин хитай һөкүмити хитай пуқралириниң ишәнчи һәмдә қоллишидин айрилипла қалмастин, бәлки йәнә чириклик хитайниң хәлқарадики риқабәт күчини аҗизлаштуруп, инавитини чүшүрди".

Чирикликниң чиқими намратларниң күндилик һаятидин сүмүрүп елиниду

Бу қистурмида йәнә, дөләт ичидә һөкүмәтниң ишәнчлик дәриҗисини ашуруш үчүн, сиясий системиға сайламни елип кириш, ахбаратни ролидин толуқ пайдилиниш, қанун - түзүмләрни йүргүзүш вә тәтбиқлашни күчәйтиш қатарлиқларға охшаш тәклипләр берилгән болуп, сиясий көзәтчи илшат әпәндиму бу җәһәтләрдә охшаш пикирләрни илгири сүрди.

Доклатта чирикликкә инсанийәт тәрәққияти нуқтисида туруп нәзәр селинған болуп, буниңда "чирикликниң чиқими намрат вә җәмийәттики орни төвән кишиләрниң күндилик һаятидин сүмүрүп елиниду" дәп оттуриға қоюлған болуп, мана бу мәзкур доклатниң алаһидә диққәт қилишқа тегишлик йеридур.

Җәмий 246 бәттин тәркип тапқан доклатта, чирикликкә "чириклик болса адәттә берилгән һоқуқни өзиниң пайдисиға суйиистемал қилиш дегәнликтур" дәп ениқлима берилгән болуп, бу ениқлиминиң һөкүмәт органлириға һәтта шәхсләргиму қаритилидиғанлиқи илгири сүрүлгән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт