Б д т, һайтидики тинчлиқ сақлаш қисимлириниң адәм санини 3500 гә йәткүзүшни қарар қилди

Һайтида 12‏ - январ күни 7.3 Бал йәр тәвригән иди, бүгүн 7 - күни тәхминлинишичә, һайтида йүз бәргән бу қетимқи йәр тәврәштә һаятидин айрилған адәм сани 200 миңға йетиши мумкин. Һазир һайтиға ярдәм беришкә қатнашқан дөләтләрниң сани һазир 30 дин ашти. Б д т бихәтәрлик кеңиши бүгүн баш катиб бан кимунниң тәклипигә асасән, һайтидики тинчлиқ сақлаш қисимлириниң санини 3500 гә йәткүзүшни қарар қилди.
Мухбиримиз вәли
2010-01-19
Share
Hatida-bulang-talang-herkiti-kopeygen-305.jpg 17 - Йанвар күни, һайтиниң мәлум һайполайт исимлиқ базирида булаң - талаң һәрикитигә қатнашқан нәччә йүзлигән йашларға сақчилар оқ чиқирип кам дегәндә бир кишини етип өлтүргән болуп, сүрәттә, шу булаң - талаң һәрикитигә қатнашқан йашлардин бир көрүнүш.
AFP Photo

Һайтида 12‏ - январ күни кәч саәт 21 дә 7.3 Бал йәр тәвригән иди, с н н телевизийә истансиси 7 күндин буян нәқ мәйдандин бериватқан учурлардин қариғанда, шуниңдин буян 9 милйон нупуси бар һайти дөлитиниң дуня билән болған мунасивити пәқәт сүний һәмраһ арқилиқла болуватиду. Чүнки бу қетимқи йәр тәврәштә һайтида пүтүн асаси қурулуш иштин чиққан, учур - алақә торлири пүтүнләй паләч болған. Һайтида йүз бәргән бу қетимқи йәр тәврәштә һаятидин айрилған адәм сани һазир 200 миңға йетиши мумкин, дәп тәхминләнмәктә.

Нурғун дөләтләрниң ярдәм әшялирини елип баридиған айропиланлири һазир һайтиға кириш нөвитини күтүватиду

7 Күнидин буян дуня әллири 9 милйон һайти хәлқини апәттин қутқузуп, бу дөләтни қайтидин әслигә кәлтүрүш үчүн җиддий ярдәм бериватиду. Һазир һайтиға ярдәм беришкә қатнашқан дөләтләрниң сани һазир 30 дин ашти. Һайти айродроминиң көлими чәклик болғанлиқи үчүн, нурғун дөләтләрниң ярдәм әшялирини елип баридиған айропиланлири һазир һайтиға кириш нөвитини күтүватиду. Доминика, беразилийә, канада, чили, америка қатарлиқ дөләтләр 25 - январ күни канаданиң монтериал шәһиридә һайтини қайтидин қуруш мәслиһәт йиғини ечиш үчүн тәйярлиқ көрүватиду.

Б д т ниң йемәк тәқсимләйдиған 14 понкити ишқа киришти

Б д т ашлиқ мәһкимиси тәйярлиған 43 тонна йемәк һайтиға йетип кәлди. Б д т ашлиқ мәһкимисиниң башлиқи җосет шранниң баян қилишичә, порт ава пренси шәһиридә һазир б д т ниң йемәк тәқсимләйдиған 14 понкити апәткә учриған хәлққә йемәк бериватиду. Бу понкитларниң хизмити 30 күн давам қилидикән.

Америка авазиниң баян қилишичә, америка һава қисимлири бүгүн йәнә һайтиниң пайтәхти порт ав пренси шәһиригә һавадин икки қетим йемәк ташлиди.

Явропа бирлики һайтини қайтидин қуруш үчүн 575 милйон америка доллири ярдәм беридиғанлиқини җакарлиди

явропа бирлики бүгүн һайтини қайтидин қуруш үчүн 575 милйон америка доллири ярдәм беридиғанлиқини җакарлиди. Қизил крест җәмийити йүз милйон америка доллири ярдәм беридиғанлиқини җакарлиди.

Түркийиниң аптомобил дохторханилири җиддий ишләватиду

Түркийә һайтиға 20 кишилик қутқузуш әтрити билән 1 милйон америка доллири нәқ пул, 10 тонна дора, 20 тонна әдиял қатарлиқ қутқузуш буюмлири әвәткән иди, түркийиниң аптомобил дохторханилири һазир җиддий ишләватиду.

Голландийниң айропилани бүгүн һайтидин 109 нәпәр йетим балини елип кәтти

Голландийниң айропилани бүгүн һайтидин 109 нәпәр йетим балини елип кетип беқивелишни илтимас қилған аилиләрниң қолиға йәткүзүшкә башлиди. Америка дөләт земини бихәтәрлик министирлиқи һайтидики йетим балиларни вақтинчә америкиға әкилип турғузушқа вә беқивелишни халиған аилиләргә йәткүзүп беришкә иҗазәт бәрди.

Америкиниң сабиқ президентлиридин бил клинтон билән җорҗи буш һазир һайтиға ианә топлаватиду

Һайтида йәр тәврәш йүз бәргән күнидин башлап америка қисимлири 5 миң 800 адәм чиқирип һавадин вә қуруқлуқтин берилидиған ярдәмни тәшкилләш, йәткүзүш вә адәм қутқузушқа киришкән иди. Улар һәр күни һайтида 130 миң кишилик йемәк вә су бериватиду. Америкиниң сабиқ президенти бил клинтон билән сабиқ президебнт җорҗи буш иккәйлән һазир һайтиға ианә топлаватиду. Бүгүн йәнә америкиниң 250 кишилик давалаш әтрити һайтиға кирди.

Б д т бихәтәрлик кеңиши бүгүн һайтиға йәнә 3500 кишилик қисим әвәтишни қарар қилди

Б д т баш катиби бан кимун түнүгүн һайтини зиярәт қилип қайтқандин кейинла, бихәтәрлик комитетини һайтида тинчлиқ сақлашни күчәйтиш үчүн йәнә 3500 кишилик һәрбий қисим вә сақчи әвәтишкә чақирған иди. Б д т бихәтәрлик кеңиши бүгүн бан кимунниң тәклипи буйичә қарар мақуллиди.

Хитай һайтида хитайларнила қутқузғанлиқини иқрар қилмиди

Америка авазиниң баян қилишичә, хитай ташқи ишлар министирлиқиниң баянатчиси ма җавшү йәкшәнбә күнидики баянатида, хитайниң һайтида пәқәт хитайларнила қутқузғанлиқини етирап қилмиған, бәлки 'бизни һайтида хитайларнила излиди - қутқузди' дегән гәп яман нийәтлик адәмләрниң гепи' дәп наразилиқ билдүргән иди. Мәркизи агентлиқиниң бүгүн баян қилишичә, хитай ташқи ишлар министирлиқиниң баянатчиси бүгүнки баянатида йәнә 'тәйвән һазирға қәдәр һайтиға ярдәм бериштә биз билән һәмкарлашмайватиду, тәйвән чуқум хәлқара ярдәм ишлиридиму бир җуңго сияситини иҗра қилиши керәк' дәп тәкитлигән.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт