Xitaydiki yamghur apitidin kéyinki mulahiziler

Xitay da'iriliri 21 - iyul béyjingda yüz bergen qattiq yamghur apitide ölgenlerning sanini 77 dep élan qildi. Emma hökümetning ras gep qilghanliqigha guman bilen qarighan tor abontliri intérnét tor betliride mexsus sehipe ichip, su apitide béyjing we bashqa sheherlerde yoqap ketkenlerning isim - familisini, resimini élan qilish arqiliq, heqiqiy sanni bilishke tirishiwatqan idi. Lékin, xitay da'irilirining bügün uqturush chiqirip, yamghur apitige alaqidar barliq mezmunlarni intérnétttin tazilishi - hökümetining semimiyitige bolghan gumanni téximu ulghaytiwetti.
Muxbirimiz irade
2012-07-27
Share
beijing-kelkun-305.png Béyjingdiki kelkün apitidin bir körünüsh
AFP


Hörmetlik radi'o anglighuchilar, aldinqi shenbe küni yüz bergen qattiq yamghur sewebidin béyjingda eng az dégende 77 adem ölgenliki élan qilin'ghan idi. Éghir aqiwetlerni peyda qilghan yamghur apiti kéyin qutquzush xizmetlirining waqtida ishlenmigenliki we béyjingning yer asti su yolliri qurulushi süpiti heqqide nurghun munaziler peyda boldi. Intérnét tor betliridiki munazire sehipiliride kishiler, özini qudretlik dölet dep ataydighan xitayning paytexti béyjing shehirining asasiy qurulushining bir qattiq yamghurgha berdashliq bérelmigenlikini qattiq tenqid qilip, buni xitay hökümet emeldarliri arisidiki chiriklik, parixorluq we dölette ochuq - ashkara tenqid séstimisining yoqluqining biwaste netijisi, déyishti. Ölgüchilerning sani heqqide hökümet élan qilghan reqemgimu ishenmigen tor abontliri öz aldigha ölgenlerning sanini istatéstika qilishqa tirishiti.

Emma, jüme küni tuyuqsizla bu heqtiki tenqidiy xewerlerni eng köp ishligen jenubiy heptilik géziti apet heqqide ishligen barliq xewerlirini öchürüp tashlidi. Mulahize bétidiki mulahizilernimu qisqartiwetti. Buningdin srt, jüme künidin itibaren sabiq béyjing sheher bashliqi heqqidiki we bu qétimliq yamghur apitide eng éghir ziyan'gha uchrighan béyjing shehiri fangshen rayonigha alaqidar uchurlar intérnétte tosuwétildi. Tor abontliri sina wéybo tor bétide yuqiridiki isimlarni kirgüzüp, héchqandaq uchurgha érishelmidi.

Birleshme agéntliqining éytishiche, bu yil sintebirde échilishi pilan qiliniwatqan 18 - qurultay sewebidin hazir béyjingda bixeterlik tedbirliri alliqachan chingitilghan bolup, bu heqtiki naraziliqlarning kücheygenlikini körgen hökümet da'iriliri qurultay aldida birer weqe chiqishining aldini élish üchün munazilerni bésiqturuwetmekchi bolghan bolushi mumkin iken.

Xitaydiki ismini ashkarilashni xalimighan bir muxbirning birleshme agéntliqigha éytip bérishiche, axbaratta yamghur apiti heqqidiki hökümetke yaqmaydighan xewerlerning élip tashlinishigha ölkilik teshwiqat we teshkilat bölümi biwaste qol tiqqan. Buning bilen jenubiy heptilik géziti yamghurda ölgen 25 kishi heqqidiki xewerlerni, béyjing yuqiri sür'etlik tashyolini su ep kétishining sewebi we yer asti su yoli qurulushi heqqidiki analiz maqalilirini élan qilishtin toxtitip qoyghan.

Jenubiy heptilik gézitining bu xewerlerni élan qilmasliqqa mejburlinip, ilgiriki xewerlerningmu mejburiy öchürüwétilgenliki xitaydiki dangliq munazire tor betliride küchlük inkas qozghighan. Netijide, heptilik gézit özimu intérnétta chiqmaydighan bopqalghan.

Yuqiridiki ismini ashkarilashni xalimighan muxbir yene, xitay teshwiqat we teshkilat bölümining bésimi bilen bu gézitning öz muxbirlirigha, chet'el muxbirliri bilen sözleshmeslikni buyruq qilghanliqini éytip bergen.

Xitay ishliri tetqiqatchisi, aptor élizabit ékonomiyning diplomat zhurnilida élan qilghan maqaliside éytishiche, shu küni béyjing sheherlik hökümet da'iriliri puqralargha héchqandaq bir aldin agahlandurush bermigen. Qatnash saqchiliri yolda qepqalghan aptomobillargha yardem qilishning ornigha, ulargha jaza kesken. Yuqiri sür'etlik tashyollardiki pul tapshurush orunliridiki xizmetchiler jénini ep qéchishqa aldirawatqan aptomobil heydigüchilerni toxtitip, yene pul élishni dawam qilghan. Béyjing da'iriliri élan qilghan istatéstikigha qarighanda, bu qétimliq yamghur apiti keltürüp chiqarghan maddi ziyan bir milyard 880 milyon dollargha yetken. 65 Ming kishi öyidin köchürülgen. 77 Adem ölgen. Xelqning hökümetning tedbirsizlikige bolghan naraziliqi küchlük.

Emma, élizabét ékonomiy bu qétimliq weqede diqqet qozghaydighan shundaq bir nuqtining barliqini tekitleydu. U bolsimu, intérnétning küchi we u yaritiwatqan yéngi bir ewlad xitay puqraliri. Uning éytishiche, weqe küni xitaydiki munazire betliri yardem bérishni xalaydighan kishilerning élanliri bilen toshup ketken. Kishiler özlikidin yolda qalghan kishilerge yardem qilghan. Yüzligen kishi özlikidin béyjing ayrodromigha mashina heyde bérip, yoluchilargha yardem qilghan.

Ilzabit xanim, buni intérnét dewridiki puqralar küchining oxshimighan shekilde özini körsitishi, deydu. U yene, hazir intérnétning yardimi bilen teshkillinip, özini namayen qilishqa bashlighan puqralar küchi bilen qandaq élishishni bilmey qalghan hökümetning, intérnétni küchining yétishiche cheklewatqanliqini, emma xitayning yéngi siyasiy aktiplirining xitay puqraliri bolushqa qarap yüzlen'genlikini mulahize qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet