Бермудадики уйғурлар: америкиға қарита ағриниш вә наразилиқимиз йоқ

Бермудаға орунлашқан 4 нәпәр уйғур әркинликкә чиққандин кейин, хәлқара мәтбуатларда сөз қилип, гүәнтанамодики уйғурлар һәққидә илгири соралған бир қисим соалларға җаваб қайтурди.
Мухбиримиз шоһрәт һошур
2009.06.15
Guantanamo-Uyg-Bermudada-305 Бермудадики 4 нәпәр уйғурниң әркинликкә чиққандин кейинки йеңи қийапити. Сүрәттә, солдин онңға: хелил мамут, абликим турахун, салаһидин абдулахәт вә абдулла абдуқадир.
www.uyghuramerican.org Дин елинди.

Хәлқара хәвәрләрдә көрситилишичә, улар өзлириниң әлқаидә тәшкилати билән мунасивити йоқлуқини һәтта әлқаидә вә  бин ладин дегән намни гүәнтанамоға кәлгәндин кейин аңлиғанлиқини билдүргән. Улар сөзидә хитайниң террорчи дегән әйиблимисиниму кәскин рәт қилған. 4 Нәпәр уйғурдин икки нәпири түрмидики чеғида аз - тола ингилизчә өгәнгән, булардин хелил мамут мухбирға ингилизчә  сөз қилип мундақ дегән: " мән террорчи әмәс, террорчи болғанму әмәс һәм  һәргиз террорчиму болмаймән."

Бермудадики 4 нәпәр уйғур мухбирларға қилған сөзлиридә, уйғурларниң хитай зулмида көрүватқан күнлирини; хитай һөкүмитиниң уйғурларни омумйүзлүк йоқитиш сияситини қоллиниватқанлиқини, һәтта уйғурларниң туғулмиған бовақлириниңму өлүмгә мәһкум қилиниватқанлиқини, шуңа уйғурларниң пәқәт бирла дүшмини барлиқини, у болсиму, хитай һөкүмити икәнликини билдүргән; 4 уйғурниң бири абдулла абдуқадир мухбирға мундақ дегән: " бәзи кишиләр бизни хәтәрлик кишиләр дәп қаришиду вә америкиға нәприти бар дәп қарайду; әмәлийәттә ундақ әмәс, бизниң  америкиға қарита һечқандақ наразилиқ вә ағринишимиз йоқ."

Улар йәнә, сөзлиридә бермуданиң гүзәлликигә мәптун болғанлиқини билдүрүш билән биллә,  бермуда һөкүмитиниң җасарәтлик қарариға - хитайниң тәһдитлиригә писәнт қилмиғанлиқиға апирин оқуған. Улар сөзлиридә, өзлириниң бүгүнгә қәдәр әркинлик вә тенчлиқ издәп яшиғанлиқини, бундин кейинки һаятидиму бу нуқтини испатлайдиғанлиқини билдүргән вә шараитлири һазирланғанда, бермудада бир уйғур ашханиси ечиш пиланини ашкарилиған. Улар йәнә  өзлирини бермудада бихәтәр һес қиливатқанлиқини, чүнки бермуданиң иқтисадий җәһәттин йүксәлгән болуш билән биллә, әнгилийә билән һимайичилик мунасивити барлиқини вә әнгилийиниң хитайға тақабил туралиғидәк күчлүк дөләт икәнликини әскәрткән.

Нөвәттә әнгилийә һөкүмити бу уйғурлар үстидин бихәтәрлик тәкшүрүши елип бармақта. Бермудадики өктичи партийиму, бермуданиң баш министири брванни баш - баштақлиқ билән әйиблимәктә.

4 Нәпәр уйғур болса, кишиләрниң һәр хил әндишә вә гуманлириға бундин кейинки һаяти арқилиқ йәни  ишчанлиқи вә тенчлиқсөйәрлики билән җаваб қайтуридиғанлиқини билдүргән.

Түнүгүн вә бүгүнки хәлқара хәвәрләрдә, бу төт нәпәр уйғурниң деңиз бойида дәм еливатқан, белиқ тутуватқан вә чахчақлишиватқан көрүнүшлири берилгән болуп, буларниң нөвәттә бермудаға тезла маслишип кетәләйдиғанлиқи тәхмин қилинмақта. Бермудадики 4 нәпәр уйғур бермудаға кәлгән бир қанчә күнлүк һаятида мухбирларға қилған сөзлири вә өзлириниң йүрүш - турушлири билән әтраптики кишиләрниң қизғин қарши елишиға еришкән.

Лондонда чиқидиған вақит гезитиниң хәвәр қилишичә, уларға 3 күн ичидә 5 орундин ишқа қобул қилиш һәққидә тәклип кәлгән.

Бермуданиң 4 нәпәр уйғурни қобул қилғанлиқи мунасивити билән, дуня кишилик һоқуқни көзитиш тәшкилати җүмә күни  баянат елан қилип,  бу 4 нәпәр уйғурниң бермудаға йәрлишиши, гүәнтанамони тақаштики иҗабий бир қәдәм дәп мәдһийилиди.

Мәзкур тәшкилат баянатида, уйғурлар үчүн  америка вә явропаниң  мувапиқ җай икәнликини, америкидики уйғурларниң гүәнтанамодики уйғурларни күтүвелиш үчүн пухта тәйярлиқ қилғанлиқини, шуңа қалған уйғурларниң америка вә  явропаға орунлишишини үмид қилидиғанлиқини қәйт қилди.

Бермудадики 4 нәпәр уйғур һәққидики хәвәрләр күнтәртиптин чүшмәйватқан бу күнләрдә йәни дүшәнбә күни явропа иттипақи гүәнтанамодики мәһбусларни қобул қилидиғанлиқини билдүрди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.