Bérmudadiki Uyghurlar: amérikigha qarita aghrinish we naraziliqimiz yoq
Muxbirimiz shohret hoshur
2009.06.15
2009.06.15

www.uyghuramerican.org Din élindi.
Xelq'ara xewerlerde körsitilishiche, ular özlirining elqa'ide teshkilati bilen munasiwiti yoqluqini hetta elqa'ide we bin ladin dégen namni güentanamogha kelgendin kéyin anglighanliqini bildürgen. Ular sözide xitayning térrorchi dégen eyiblimisinimu keskin ret qilghan. 4 Neper Uyghurdin ikki nepiri türmidiki chéghida az - tola in'gilizche ögen'gen, bulardin xélil mamut muxbirgha in'gilizche söz qilip mundaq dégen: " men térrorchi emes, térrorchi bolghanmu emes hem hergiz térrorchimu bolmaymen."
Bérmudadiki 4 neper Uyghur muxbirlargha qilghan sözliride, Uyghurlarning xitay zulmida körüwatqan künlirini؛ xitay hökümitining Uyghurlarni omumyüzlük yoqitish siyasitini qolliniwatqanliqini, hetta Uyghurlarning tughulmighan bowaqliriningmu ölümge mehkum qiliniwatqanliqini, shunga Uyghurlarning peqet birla düshmini barliqini, u bolsimu, xitay hökümiti ikenlikini bildürgen؛ 4 Uyghurning biri abdulla abduqadir muxbirgha mundaq dégen: " bezi kishiler bizni xeterlik kishiler dep qarishidu we amérikigha nepriti bar dep qaraydu؛ emeliyette undaq emes, bizning amérikigha qarita héchqandaq naraziliq we aghrinishimiz yoq."
Ular yene, sözliride bérmudaning güzellikige meptun bolghanliqini bildürüsh bilen bille, bérmuda hökümitining jasaretlik qararigha - xitayning tehditlirige pisent qilmighanliqigha apirin oqughan. Ular sözliride, özlirining bügün'ge qeder erkinlik we ténchliq izdep yashighanliqini, bundin kéyinki hayatidimu bu nuqtini ispatlaydighanliqini bildürgen we shara'itliri hazirlan'ghanda, bérmudada bir Uyghur ashxanisi échish pilanini ashkarilighan. Ular yene özlirini bérmudada bixeter hés qiliwatqanliqini, chünki bérmudaning iqtisadiy jehettin yükselgen bolush bilen bille, en'giliye bilen himayichilik munasiwiti barliqini we en'giliyining xitaygha taqabil turalighidek küchlük dölet ikenlikini eskertken.
Nöwette en'giliye hökümiti bu Uyghurlar üstidin bixeterlik tekshürüshi élip barmaqta. Bérmudadiki öktichi partiyimu, bérmudaning bash ministiri brwanni bash - bashtaqliq bilen eyiblimekte.
4 Neper Uyghur bolsa, kishilerning her xil endishe we gumanlirigha bundin kéyinki hayati arqiliq yeni ishchanliqi we ténchliqsöyerliki bilen jawab qayturidighanliqini bildürgen.
Tünügün we bügünki xelq'ara xewerlerde, bu töt neper Uyghurning déngiz boyida dem éliwatqan, béliq tutuwatqan we chaxchaqlishiwatqan körünüshliri bérilgen bolup, bularning nöwette bérmudagha tézla masliship kételeydighanliqi texmin qilinmaqta. Bérmudadiki 4 neper Uyghur bérmudagha kelgen bir qanche künlük hayatida muxbirlargha qilghan sözliri we özlirining yürüsh - turushliri bilen etraptiki kishilerning qizghin qarshi élishigha érishken.
Londonda chiqidighan waqit gézitining xewer qilishiche, ulargha 3 kün ichide 5 orundin ishqa qobul qilish heqqide teklip kelgen.
Bérmudaning 4 neper Uyghurni qobul qilghanliqi munasiwiti bilen, dunya kishilik hoquqni közitish teshkilati jüme küni bayanat élan qilip, bu 4 neper Uyghurning bérmudagha yerlishishi, güentanamoni taqashtiki ijabiy bir qedem dep medhiyilidi.
Mezkur teshkilat bayanatida, Uyghurlar üchün amérika we yawropaning muwapiq jay ikenlikini, amérikidiki Uyghurlarning güentanamodiki Uyghurlarni kütüwélish üchün puxta teyyarliq qilghanliqini, shunga qalghan Uyghurlarning amérika we yawropagha orunlishishini ümid qilidighanliqini qeyt qildi.
Bérmudadiki 4 neper Uyghur heqqidiki xewerler küntertiptin chüshmeywatqan bu künlerde yeni düshenbe küni yawropa ittipaqi güentanamodiki mehbuslarni qobul qilidighanliqini bildürdi.