Истансимиз мухбири бейҗиңдики қаттиқ қамал қилинған намайиш районида бир әрздарниң дәрдини аңлиди

Олимпик өткүзүлүш җәрянида, бейҗиңда намайиш елип беришқа рухсәт берилгән 3 районда һазирға қәдәр бир қетимму намайиш өткүзүлүп бақмиған болуп, буниң сәвәби намайиш илтимаслириниң изчил рәт қилиниши түпәйлидин мәйданға кәлгән.
Мухбиримиз әқидә хәвири
2008-08-21
Share

 Бирақ 20 ‏ - авғуст күни истансимизниң мухбири бейҗиңдики намайиш елип бериш мәйданида бир хитай аялниң униңға йиғлап туруп ейтқан дәртлирини аңлиди.

Хитай бихәтәрлик органлири олимпик мәзгилидә бейҗиң шәһәрлик дуня бағчиси, бамбук бағчиси вә ритән бағчилирида хәлқниң намайиш елип беришиға йол қойидиғанлиқини уқтурған болсиму, бирақ олимпик тәнтәрбийә мурасими башлинип бүгүнгә қәдәр һечқандақ адәмниң намайиш өткүзүш тәлипини қобул қилған әмәс. Шинхуа агентлиқиниң хәвиридин ашкарилинишичә, мунасивәтлик тармақлар, намайиш рухсити елиш үчүн сунулған 77 делони тапшуруп алған, буларниң ичидә 74 дилоға аит мәсилә бир тәрәп қилинғанлиқтин илтимаслар қайтурувелинған, 2 си мәлуматлар толуқ әмәс дәп қарилип қайтурвитилгән, 1 си қанунсиз һесаблинип илтимас қайтурвитилгән.

Көзәткүчиләр юқириқи учурларни дуня мәтбуати үчүн берилгән сахта хәвәр дәп қариған. Бу арида бейҗиң олимпик комитетиниң баянатчиси ваң вей ": намайиш өткүзүш мәсилини һәл қилишниң чариси әмәс, яхши издиниш елип бериш вә диалог қуруш усуллири билән мәсилини һәл қилиш, һәқиқий җуңго мәдәнийитигә баб келидиған чарә," дегән.

Ваң вей сөзидә йәнә": мениңчә, намайиш қилмақчи болған бу кишиләрниң мәқсити мәсилини һәл қилиш, мәсилиниң һәл болғини ишниң пүткини, демәк мәсилини һәл қилишниң асаслиқ чариси қанун йоллиридин пайдилиниш, у һәргизму намайиш қилиш әмәс " деди.

Ваң вей ": кишиләр сөз қилиш әркинликигә игә, олимпик намайиш мәйдани тәсис қилиш билән мав зедуңниң барчә гүлләр тәң ечилсун дегән әқлийәси бир - биригә охшимайду " дәп тәкитлигән болуп, чәтәл мәтбуатлирида ашкариланған икки яшанған момайниң намайиш өткүзүш илтимаси түпәйли бир йиллиқ әмгәк билән өзгәртиш җазасиға тартилиш әһвали хәлқара олимпик комитетиниң баянатчисиға яхши тәсир көрсәтмигән.

Намайиш елип беришқа рухсәт берилгән районниң вәзийитини көзитип беқиш үчүн, истансимизниң бейҗиңға әвәткән мухбири гу җиру, 20 ‏ - авғуст күни чүштин кейин бейҗиңдики ритән бағчисиға зиярәткә барған.

Мухбир гу җиру алди билән, мәзкүр бағчиниң дәрвазиси алдики һәрбий посттин, бу җай намайиш өткүзүшкә рухсәт берилгән 3 җайниң бирсиму? дәп сориған.

Һәрбий пост тоғра дәп җаваб берип, бу җайниң бир қанчә күндин буян наһайити тенч икәнликини, бу җәмийәт муһитиниң яхшилиқидин дерәк беридиғанлиқини ейтқан.

Мухбиримиз һәрбий постқа 77 қетимлиқ намайиш илтимасиниң рәт қилинғанлиқини билдүргәндә, пост " : буниңдин хәвирим йоқ, мән вәзипә ада қиливатимән, зиярәт қилишқа әпсиз " дәп җаваб бәргән.

Мухбиримиз бағча ичигә кирип нәччә қәдәм маңмай турупла, бирәйләнниң униңдин салаһийәт кинишкисини сориған авази аңланған, мухбиримиз "бу бағчиғу ? "дәп мухбирлиқ кинишкисини көрсәткән, бағча башқурғучиси," әгәр мухбирлар зиярәткә кәлсә, биз мухбирларни бирдәк қобул қилимиз" дегән, мухбир дегән сөзни аңлиған бир оттура яшлиқ аял, истансимиз мухбири гу җируниң йениға йүгрәп келип, " сиз мухбирму? мениң дәрдимни аңлаң, мән лявниңлиқ болимән, мән адиллиққа муһтаҗ, улар мениң йолдушумға увал қилди, һечқандақ гунаһ қилмиған йолдушумни 9 ай солап қойди, гәрчә қайтип чиққан болсиму, улар, уни мейип һаләткә кәлтүрүп қойған. 3 Йил болди бу ишни һечким сүрүштә қилғини йоқ, бизниң йәрлик әмәлдарлар бизни бәк қийнап кәтти, пүтүн аилимизни 24 саәт көзитиду, әрз қилсаң көргиликиң бар дәп тәһдит салиду " дәп йиғлап өз дәрдини баян қилған.

Бу чағда әтрапқа адәмләр топлашқан болуп, кишиләр гав винҗуән исимлик аялға өзлириниң һәр хил тәвсийилирини аңлитип, " сиз әң яхшиси, әрзийәт идарисиға бериң" дейишкән, гав винчүән " мениң бармиған йерим қалмиди, бу дөләттә һәқиқәт йоқ, кишилик һоқуқ йоқ, мән бир адәттики адди пуқра, бу дөләттә чоң адәмләрниң, пулдар, әмәлдарларниң сориқи болиду, бу йәрдә езилиштин башқа нәрсә йоқ " дәп вақирап налә қилған.

Йәнә бир киши, бу аялға тәсәлли берип " лиявниңда йүз бәргән вәқәни, бейҗиңда сориши натайин, йәрлик гезит ‏ - журналларға вәқәни ашкарилимидиңизму " дәп сориғанда, гав йәнә " йәрлик һөкүмәт буйруқ чүшүрүп, мени көзитип турушни бекитти, мән бейҗиңға оғурлуқчә қечип кәлдим" дегән.

Гав венчүәнниң йолдиши лиявниң сақчи идарисиниң сақчиси болуп, уни сәвәбсизла солап қойған, қоюп берилгән 3 йилдин буян хизмити әслигә кәлмигән шуниңдәк бу вәқә әгәр ашкариланса әр - хотун һәр иккисиниң қайта түрмигә ташлинидиғанлиқи һәққидә тәһдиткә учриған.

Истансимиз мухбири гавниң бихәтәрликини көздә тутуп, униң дәрһал кетишни тәвсийә қилип, униң қариси йоқиғичә арқисидин қарап турған. Дәл шу пәйттә, пуқрачә кийингән бир қанчә адәм билән, наһайити кичик һәриптә " сақчи " дәп йезилған көк рәңлик тәнтәрбийә кийими кийгән бир адәм униң арқисидин қоғлап йетип берип, уни икки қолидин тартқан пети елип кәткән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт