Istansimiz muxbiri béyjingdiki qattiq qamal qilin'ghan namayish rayonida bir erzdarning derdini anglidi

Olimpik ötküzülüsh jeryanida, béyjingda namayish élip bérishqa ruxset bérilgen 3 rayonda hazirgha qeder bir qétimmu namayish ötküzülüp baqmighan bolup, buning sewebi namayish iltimaslirining izchil ret qilinishi tüpeylidin meydan'gha kelgen.
Muxbirimiz eqide xewiri
2008-08-21
Share

 Biraq 20 ‏ - awghust küni istansimizning muxbiri béyjingdiki namayish élip bérish meydanida bir xitay ayalning uninggha yighlap turup éytqan dertlirini anglidi.

Xitay bixeterlik organliri olimpik mezgilide béyjing sheherlik dunya baghchisi, bambuk baghchisi we riten baghchilirida xelqning namayish élip bérishigha yol qoyidighanliqini uqturghan bolsimu, biraq olimpik tenterbiye murasimi bashlinip bügün'ge qeder héchqandaq ademning namayish ötküzüsh telipini qobul qilghan emes. Shinxu'a agéntliqining xewiridin ashkarilinishiche, munasiwetlik tarmaqlar, namayish ruxsiti élish üchün sunulghan 77 déloni tapshurup alghan, bularning ichide 74 dilogha a'it mesile bir terep qilin'ghanliqtin iltimaslar qayturuwélin'ghan, 2 si melumatlar toluq emes dep qarilip qayturwitilgen, 1 si qanunsiz hésablinip iltimas qayturwitilgen.

Közetküchiler yuqiriqi uchurlarni dunya metbu'ati üchün bérilgen saxta xewer dep qarighan. Bu arida béyjing olimpik komitétining bayanatchisi wang wéy ": namayish ötküzüsh mesilini hel qilishning charisi emes, yaxshi izdinish élip bérish we di'alog qurush usulliri bilen mesilini hel qilish, heqiqiy junggo medeniyitige bab kélidighan chare," dégen.

Wang wéy sözide yene": méningche, namayish qilmaqchi bolghan bu kishilerning meqsiti mesilini hel qilish, mesilining hel bolghini ishning pütkini, démek mesilini hel qilishning asasliq charisi qanun yolliridin paydilinish, u hergizmu namayish qilish emes " dédi.

Wang wéy ": kishiler söz qilish erkinlikige ige, olimpik namayish meydani tesis qilish bilen maw zédungning barche güller teng échilsun dégen eqliyesi bir - birige oxshimaydu " dep tekitligen bolup, chet'el metbu'atlirida ashkarilan'ghan ikki yashan'ghan momayning namayish ötküzüsh iltimasi tüpeyli bir yilliq emgek bilen özgertish jazasigha tartilish ehwali xelq'ara olimpik komitétining bayanatchisigha yaxshi tesir körsetmigen.

Namayish élip bérishqa ruxset bérilgen rayonning weziyitini közitip béqish üchün, istansimizning béyjinggha ewetken muxbiri gu jiru, 20 ‏ - awghust küni chüshtin kéyin béyjingdiki riten baghchisigha ziyaretke barghan.

Muxbir gu jiru aldi bilen, mezkür baghchining derwazisi aldiki herbiy posttin, bu jay namayish ötküzüshke ruxset bérilgen 3 jayning birsimu? dep sorighan.

Herbiy post toghra dep jawab bérip, bu jayning bir qanche kündin buyan nahayiti ténch ikenlikini, bu jem'iyet muhitining yaxshiliqidin dérek béridighanliqini éytqan.

Muxbirimiz herbiy postqa 77 qétimliq namayish iltimasining ret qilin'ghanliqini bildürgende, post " : buningdin xewirim yoq, men wezipe ada qiliwatimen, ziyaret qilishqa epsiz " dep jawab bergen.

Muxbirimiz baghcha ichige kirip nechche qedem mangmay turupla, bireylenning uningdin salahiyet kinishkisini sorighan awazi anglan'ghan, muxbirimiz "bu baghchighu ? "dep muxbirliq kinishkisini körsetken, baghcha bashqurghuchisi," eger muxbirlar ziyaretke kelse, biz muxbirlarni birdek qobul qilimiz" dégen, muxbir dégen sözni anglighan bir ottura yashliq ayal, istansimiz muxbiri gu jiruning yénigha yügrep kélip, " siz muxbirmu? méning derdimni anglang, men lyawningliq bolimen, men adilliqqa muhtaj, ular méning yoldushumgha uwal qildi, héchqandaq gunah qilmighan yoldushumni 9 ay solap qoydi, gerche qaytip chiqqan bolsimu, ular, uni méyip haletke keltürüp qoyghan. 3 Yil boldi bu ishni héchkim sürüshte qilghini yoq, bizning yerlik emeldarlar bizni bek qiynap ketti, pütün a'ilimizni 24 sa'et közitidu, erz qilsang körgiliking bar dep tehdit salidu " dep yighlap öz derdini bayan qilghan.

Bu chaghda etrapqa ademler toplashqan bolup, kishiler gaw winju'en isimlik ayalgha özlirining her xil tewsiyilirini anglitip, " siz eng yaxshisi, erziyet idarisigha béring" déyishken, gaw winchüen " méning barmighan yérim qalmidi, bu dölette heqiqet yoq, kishilik hoquq yoq, men bir adettiki addi puqra, bu dölette chong ademlerning, puldar, emeldarlarning soriqi bolidu, bu yerde ézilishtin bashqa nerse yoq " dep waqirap nale qilghan.

Yene bir kishi, bu ayalgha teselli bérip " liyawningda yüz bergen weqeni, béyjingda sorishi natayin, yerlik gézit ‏ - zhurnallargha weqeni ashkarilimidingizmu " dep sorighanda, gaw yene " yerlik hökümet buyruq chüshürüp, méni közitip turushni békitti, men béyjinggha oghurluqche qéchip keldim" dégen.

Gaw wénchüenning yoldishi liyawning saqchi idarisining saqchisi bolup, uni sewebsizla solap qoyghan, qoyup bérilgen 3 yildin buyan xizmiti eslige kelmigen shuningdek bu weqe eger ashkarilansa er - xotun her ikkisining qayta türmige tashlinidighanliqi heqqide tehditke uchrighan.

Istansimiz muxbiri gawning bixeterlikini közde tutup, uning derhal kétishni tewsiye qilip, uning qarisi yoqighiche arqisidin qarap turghan. Del shu peytte, puqrache kiyin'gen bir qanche adem bilen, nahayiti kichik heripte " saqchi " dep yézilghan kök renglik tenterbiye kiyimi kiygen bir adem uning arqisidin qoghlap yétip bérip, uni ikki qolidin tartqan péti élip ketken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet