Бейҗиңдики бир әрздар: сақчилар мени роһи кесәл дәп сараңлар дохтурханисиға солап қойди

Радиомиз зияритини қобул қилған бир нәпәр уйғур әрздар, йәрлик даириләрниң уни әрз қилиштин тосуш үчүн, ялған испат арқилиқ уни роһи кесәлләр дохтурханисиға йоллиғанлиқини билдүрди.
Мухбиримиз меһрибан
2012.07.16
Goher-memet-Uyghur-erzdar-305 Сүрәттә, шаирә гөһәр мәмәт.
RFA Photo / Shohret Hoshur

Уйғур әрздарлири әрзни давамлаштуруш җәрянида һәр хил тәһдит һәм тосалғуларға учримақта.

Һазирчә өз кимликини ашкарилашни халимиған бир нәпәр уйғур әрздарниң билдүрүшичә, у турушлуқ наһийидики бир қисим наһийә кадирлири һәм наһийә әмәлдарлириға ян таяқ болғучи бирқанчә сақчи хадими, уни әрз қилиштин тосуш үчүн, униң роһи кесәл икәнлики һәққидә ялған испат тәйярлап, 2011-йили 11-ай мәзгилидә уни үрүмчидики роһи кесәлләр дохтурханисида мәҗбурий ятқузған.

Бу кишиниң баян қилишичә, икки айдин артуқ роһи кесәлләр дохтурханисида йетиш җәрянида, дохтурлар униң роһи җәһәттин сағлам икәнликини билгәндин кейин, униңға бериливатқан окул ‏- дориларни тохтитип, уни 2012-йили 1-ай мәзгилидә дохтурханидин чиқиривәткән. Әмма бу чағда, узун мәзгил ишлитилгән дориларниң әкс тәсири сәвәблик униң саламәтлики барғанчә начарлашқан.

Дохтурханидин чиққандин кейин өзи учриған наһәқчиликләр үстидин әрз қилиштин йәнила ваз кәчмигәнликини билдүргән бу әрздар, нөвәттә йәрлик даириләр уни әрз қилиштин ваз кәчтүрүш үчүн һәр хил тәһдитләрни селиватқан болсиму, әмма өзиниң таки һөкүмәт даирилири мәсилини адил бир тәрәп қилғучә әрзини давамлаштуридиғанлиқини билдүрди.

Радиомиз илгири игилигән учурлардин мәлум болушичә, уйғур әрздарлири дуч келиватқан тәһдитләрниң ичидә әрз қилиштин ваз кәчмигән әрздарларға қарита йәрлик даириләр алдаш, попоза қилиш, қорқутуш қатарлиқ васитиләрни қолланғандин башқа йәнә, әрздарларни роһи җәһәттин сағлам әмәс дегәндәк ялған испатларни тәйярлап әрздарларни роһи кесәлләр дохтурханисиға йоллаш васитисини қолланған. Мәсилән 2009-йили ери мәмәт турсун ташниң йәкән наһийилик сақчиханида сорақ җәрянида өлтүрүлгәнлики сәвәбидин әрз қилған дилбәр тохти, үрүмчи 1-авғуст полат-төмүр завутиниң ишчиси гөһәр мәмәт шундақла йеқинда ақсу вилайитидин бейҗиңға кәлгән әрздарлардин абдуреһим молләк һәм анаргүл ханимларму йәрлик даириләрниң улар үстидин роһи җәһәттин сағлам әмәс дегән испатларни тәйярлап, уларни мәлум мәзгил роһи кесәлләр дохтурханисиға солап қойғанлиқини билдүргән иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.