Бейҗиңда 9 нәпәр уйғур әрздар 3 нәпәр яридар сәпдишини йүдүп, тутуп туруш мәркизидин қечип кәткән

Бу йил 11-айниң 23-күни бейҗиңдики хитай мәркизи интизам тәкшүрүш комитети қорусиниң алди бир мәйдан қанлиқ вәқәгә сәһнә болған.
Мухбиримиз шөһрәт һошур
2011.12.06
beijing-petitioners-305-2.png Сүрәттә бейҗиңдики әрздарлар вә хитай сақчилири оттирисидики тоқунуштин бир көрүнүш
AFP

Шу күни 60 тин артуқ хитай әрздар билән 12 уйғур әрздар интизам тәкшүрүш комитетиниң мәсуллири билән көрүшүшни тәләп қилған. Дәрваза алдида вәзипә өтәватқан сақчилар әрздарларниң қоруға киришигә тосқунлуқ қилған; бу чағда уйғур әрздарлар қоруниң ичигә етилип киргән. Қорудики 20 дин артуқ сақчи 3 уйғур әрздарни ишханисиға сөрәп кирип қаттиқ урған вә еғир дәриҗидә яриландурған. Вәқәниң ақивитидә уйғур әрздарлар бейҗиңдики бир тутуп туруш мәркизигә қамап қоюлған. Бу җайда уйғур әрздарларниң сақлири яридарларни дүмбисидә йүдүп қамақханидин қечип кәткән.

Хитайниң һәр дәриҗилик органлириға әрз сунуп ақтуралмиған уйғур әрздарлар, ахири әрзини мәркизи интизам тәкшүрүш комитетиға йәткүзүшни тоғра тапқан. Бирақ комитет хизмәтчилири әрздарларни йәнила қуруқ сөз билән қайтурушқа урунған. Әрздарлар, комитетниң мудири хе юң билән көрүшүшни тәләп қилған. Бу тәләпму охшашла рәт болған. Нәтиҗидә бирқанчә уйғур әрздар комитет қорусиға бесип киргән.

Уйғур әрздарларниң билдүрүшичә, уларниң әрзиниң та һазирғичә һәл болмай келиши, һәр дәриҗилик рәһбирий кадирларниң чириклик вә хиянәтчилики сәвәбидиндур. Шуңа улар рәһбири кадирларни назарәт қилидиған интизам тәкшүрүш комитетидин чарә күткән. Лекин улар бу җайда дәрдигә дава әмәс, бәлки җараһәтлириниң үстигә зәрбә йегән.

Шу күни еғир дәриҗидә зәхимләнгән әрздарлардин бири йәкән наһийисиниң оданлиқ йезисидин ясин садиқтур. ясин садиқ шу күнидики вәқәдә баш-көзи йерилған. Нөвәттә бейҗиңни ташлап тйәнҗиндә мөкүнүп яшаватқан ясин садиқниң билдүрүшичә, униң саламәтлики техичә әслигә кәлмигән, у аңлаш сезимини йоқитип қойған.

Шу күни вәқә йүз бәргәндин кейин, бейҗиң даирилири вәқәдин уйғур районлуқ һөкүмәтни хәвәрдар қилған. Районлуқ һөкүмәт, бейҗиңға мәхсус хизмәт гурупписи әвәтип вәқәни тәкшүргән, лекин, бу гуруппа әрздарлар үчүн һечбир иш қилип берәлмигән.

Бейҗиң сақчилири, уйғур әрздарларни җамаәт тәртипини бузди дәп әйибләп, уларға 7 күнлүктин тутуп туруш җазаси бәргән вә бейҗиң шәһиридики бир тутуп туруш мәркизигә қамақ қойған вә җаза муддити тошқандин кейин, юртлириға қайтуруветишни қарар қилған. Лекин уйғур әрздарлар, юртлириға қайтип барса йәнә җазалинидиғанлиқини билгәчкә, өз-ара һәмкарлишип тутуп туруш мәркизидин қечип кәткән.

Юқирида, уйғур әрздарларниң хитай сақчилиридин таяқ йегәнлики вә қамақханидин бирликтә қечип кәткәнлики һәққидә мәлумат бәрдуқ.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.