Fransiye, en'gliye hazir liwiyide qozghilangchilarni qoghdash üchün her waqit teyyar

B d t bixeterlik kéngishi liwiye asminida uchushqa bolmaydighan rayon belgilesh heqqide qarar maqullidi. Amérika awazining bayan qilishiche, b d t bixeterlik kéngishige eza 15 döletning 10i qollap awaz berdi. Rusiye, xitay, gérmaniye, braziliye we hindistandin ibaret 5 dölet awaz bérish hoquqidin waz kechti. Emma b d t ning da'imiy ezasi bolghan xitay bilen rusiye bu qétim ret qilish hoquqini ishletmidi.

 B d t bixeterlik kéngishining qararida, liwiye asminida uchushqa bolmaydighan rayon belgilesh - liwiye xelqini kazafiy qisimlirining hujumidin saqlashni meqset qilidu, bu meqset üchün zörür bolghan her qandaq tedbir qollinishqa bolidu؛ liwiye asminida “Uchushqa bolmaydu” dep belgilen'gen da'iride bir qisim ayropilanlarning, bolupmu herbiy ayropilanlarning uchushi cheklinidu, dep körsitildi.

Roytrs agéntliqining béyjingdin bayan qilishiche, b d t bixeterlik kéngishining, liwiye asminida uchushqa bolmaydighan rayon belgilesh heqqidiki qararida, fransiye, en'gliyilerge kazafiy qisimlirigha qarita zörür bolghan her qandaq tedbir qollinishqa hoquq bergenlikige xitay bügün naraziliq bildürdi we bixeterlik kéngishining qararigha qarshi pikrini saqlap qalidighanliqini bildürdi. Xitay tashqi ministirliqining bayanatchisi jang yüning éytishiche, liwiye asminida uchushqa bolmaydighan rayon belgileshni ereb döletliri teshebbus qilghanliqi üchünla, xitay bixeterlik kéngishining qararigha qarita ret qilish hoquqini ishletmigen.

En'gliyide chiqidighan “Télégraf” géziti bügün liwiye weziyitige da'ir yéngi uchurlarni xewer qildi. Melum bolushiche, kazafiy bügün etigen sa'et 6 de, eger gherb küchliri liwiye da'iriside, liwiye tüzümige qarshi herbiy hujumgha ötse, liwiye küchliri ottura déngiz tewesidin ötidighan yoluchi ayropilanlarni öz ichige alghan her qandaq ayropilan'gha hujum qilidu dep jakarlidi.

“Télégraf” gézitining bügün etigen sa'et 9 da xewer qilishiche, liwiyidiki qozghilangchilar b d t bixeterlik kéngishining, liwiye asminida uchushqa bolmaydighan rayon belgilesh qararini daghdughiliq tebriklidi. Bu waqitta, fransiye bayanat élan qilip, kazafiygha qarshi qozghilang kötürgen xelqni qoghdash üchün her waqit teyyar ikenlikini, kazafiy eger xelqqe hujum qilsila, uninggha qarita qollinidighan herbiy heriketni bir sa'et ichide bashlaydighanliqini jakarlidi.

“Télégraf” gézitining bügün etigen sa'et 11 de xewer qilishiche, en'gliye bash ministiri dawit kamirun bayanatida, eger mustebit kazafiyning qisimliri qozghilangchilar rayonigha quruqluqtin hujum qilip xelqni qirsa, en'gliyining bombardimanchi ayropilanliri bir sa'et ichide uninggha qarshi zörür bolghan heriketke ötidighanliqini jakarlidi.

“Wolt strt” gézitining bügün chüsh waqti sa'et 12 de xewer qilishiche, misirning liwiye qozghilangchilirigha ewetken herbiy yardimi chégradin ötti. Misirning bu qétim liwiyige ewetken yardimi, peqet xelq muntizim qisimlarning hujumidin saqlinishta qollinalaydighan yénik hem qulay herbiy qorallardin ibaret.

“Télégraf” gézitining bügün sa'et 12 din 50 minut ötkende xewer qilishiche, liwiye tashqi ishlar ministiri mossa kawsa bayanatida, liwiye b d t ning qararigha bina'en özining hawa térritoriyisini derhal taqaydu, liwiyidiki urushlarni toxtitidu, liwiye xelqini her qandaq chet'el küchliridin saqlaydu dep jakarlidi. Liwiye bayanatchisi musa ibrahimning roytrs agéntliqigha éytishiche, tripoli özining urush toxtatqanliqini közitishke türkiye, malta da'irilirini teklip qilghan.

“Télégraf” gézitining bügün sa'et 12 din 57 minut ötkende xewer qilishiche, kazafiy qisimliri qozghilangchilar idare qiliwatqan misrata shehirige éghir zembirekler bilen hujum qozghidi. Qozghilangchilar sépidiki jengchi sa'adun, bu kazafiychilarning bizge qozghighan eng qattiq hujumi bolup hésablinidu, dep chüshendürdi. Qozghilangchilarning bayanatchisi gémal bolsa, bu qétim kazafiy qisimliri bizning liwiyining gherb teripidiki istihkamlirimiz bar jaylardiki öylernimu, meschitlernimu, omumen yer yüzide kötürülüp turghan hemme nersini bombardiman qilishqa bashlidi, dédi.

Xitayning shinxu'a agéntliqi bügün kech sa'et 20 de, liwiye tashqi ishlar ministiri mossa kawsa bügün bayanat élan qilip, b d t ning liwiyide uchushqa bolmaydighan rayon belgilesh qararini qobul qilip, urush toxtatqanliqini we bashqa her qandaq herbiy heriketlerni toxtatqanliqini jakarlidi, dep xewer élan qildi.