Bo shiley délosigha yene bir siyasiy byuro da'imiy ezasi chétilidighanliqi ashkarilandi

Bo shiley délosigha yene bir siyasiy byuro da'imiy ezasi chétilidighanliqi ashkarilandi. Bu, xitayning yuqiri qatlimidiki hoquq urushini dawamliq jiddiyleshtürmekte.
Muxbirimiz weli
2012-04-30
Share
bo-shiley-beyjing-2003-305.jpg Bö shileyning lyawning ölkisige ölke bashliqi waqtida béyjingdiki qurultaygha qatnashqan körünüshi. 2003-Yili 6-dékabir, béyjing.
Imaginechina

"Boshün" tor gézitining bayan qilishiche, bo shiley délosigha hazir yene bir siyasiy byuro da'imiy ezasi chétilidighanliqi ashkarilandi. Xewerde éytilishiche, bo shiley délosigha chétilghanliqi üchün qolgha élin'ghan dalyen shehiridiki "Jéngyu'en" öy qurulushi hessidarliq shirkitining bash paychiki fu yenbin, özining "Jéngyu'en" öy qurulushi hessidarliq shirkitining yer-zémin tijaritige xitay kommunist partiye merkizi komitét siyasiy byurosining da'imiy ezasi li changchün yol échip bergen dep iqrar qilghan.

Bo shiley dalyen shehirining bashliqi bolup turuwatqanda, xongkongda chiqidighan "Wénxuy" gézitining dalyende turushluq muxbiri bolghan jyang wéypingning ispatlishiche, "Jéngyu'en" öy qurulushi hessidarliq shirkitining yerni erzan élip qimmet sétip téz béyishi üchün, xitay merkizi komitét siyasiy byurosining da'imiy ezasi li changchün 10 yilghiche biwasite yol échip bérip turghan.

Kanadada chiqidighan "Weten xewerliri" tor gézitining ashkarilishiche, hazir xitayda yüz milyon yüenlik bay hésablinidighan fu yenbin, aldi bilen bo shiley a'ilisi bilen béyjing uniwérsitétidiki mektepdashliq munasiwitini izhar qilish arqiliq tonushuwalghan. Shuningdin kéyin u, "Jéngyu'en" öy qurulushi hessidarliq shirkitini qurghan. Eyni waqittiki dalyen sheherlik qurulush komitétining bashliqi li changji -merkizi komitétta idé'ologiyige mes'ul eng chong emeldari li changchünning akisi, bu shirketning mu'awin bash paychiki bolghan. Shuningdin kéyin bu shirket bo shiley a'ilisidin ibaret "Chong derex" ning himayisi astida tijaret qilishqa bashlighan.

Eyni waqitta dalyende chiqidighan "Yéngiche tijaret" géziti bu shirketni soda, ilim we kungzichiliqni teng yolgha qoyidighan pen-ilim shirkiti dep maxtap kökke kötürgen. Bu shirket bir milyon besh yüz ming kwadrat métirliq turalghu, soda we herxil kesipni bir gewde qilghan we töt milyon yüenlik ma'arip fondisi bar zamaniwi mehelle qurushni pilanlighanda, siyasiy byuro da'imiy ezasi li changchün, bu shirketke 10 yilghiche yerni erzan sétip bérish heqqide buyruq chüshürgen. Netijide bu shirket yerni erzan élip qimmet sétip, nahayiti téz béyip, bo shiley a'ilisining "Pul xaltisi"gha aylan'ghan.

Xewerde éytilishiche, yuqirida nami tilgha élin'ghan li changchün, del "Boshün" tor géziti 2010-yili 10-ayda bayan qilip ötkendek, sichüende "Qizil naxsha éytish, qara guruhlargha zerbe bérish" herikitini qozghighan bo shileyni, xitayda yéngi tereqqiyat modéli ijad qildi dep maxtap, merkizi komitét siyasiy byurosining da'imiy ezaliqigha tewsiye qilghan ju yungkang, wu banggodin bashqa, xitay merkizi komitét siyasiy byurosining yene bir da'imiy ezasi idi. Hazir li changchünning bo shiley délosigha alliqachan chétilghanliqi téximu éniq boldi.

Amérikidiki uchur shirketlirining ortaq zhurnili bolghan "Forbés" zhurnilida, dunyawi iqtisadi mesililerni tetqiq qilidighan pa'ul rodérik grigori ependi 4-ayning 29-küni élan qilghan obzorida, hazir xitayni özgertiwatqan töt chong weqening biri - bo shiley délosi we bu déloning tepsilati hazir barghanséri éniq boluwatqanliqi dep körsetken idi.

Pa'ul rodérik grigori ependi bu obzorda, bultur 12-ayda xitayning gu'angdung ölkisidiki wuken mehelliside, yerlik xelq kommunist partiyining chirikleshken xiyanetchi emeldarlirini qoghlap chiqarghan, xitay saqchiliri aldida meghlup bolmighan ammiwi heriketning ülgilik rolinimu؛ bu yil 2-ayda dunya bankisi bilen xitay dölet kabinéti birlikte teyyarlighan tetqiqat doklatida, eger xitay buningdin kéyin yekke igilikni qoyuwétish arqiliq iqtisadi jehette dawamliq yuqiri örleshni dawamlashturmisa, kommunist partiyining hakimiyiti ornini saqlap qalalmaydu, dep otturigha qoyghan ilmiy meslihetnimu؛ xitayda mushu birnechche kün ichide yüz bergen ema adwokat chén gu'angchéng weqesinimu, xitayning yuqiri qatlimidiki hoquq urushi partlashqa sewebchi bolghan bo shiley weqesige oxshash xitayni özgertiwatqan weqeler dep körsetken idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet