Bombayda miltiq awazi toxtidi, emma ghezep örlimekte

Xewerlerdin melum bolushiche, hindistanning eng chong shehiri, pul - mu'amile merkizi bolghan bombay shehiride, 11 ‏ - ayning 26‏ - küni kech sa'et 11 din 23 minut ötkende tosattin oq étilghan, granat partlighan wehimilik awaz anglinishqa we ot kétip kötürülgen is - tütek körünüshke bashlighan.
Muxbirimiz weli
2008-12-01
Share
Bombay-terror-305.jpg Süret, hindistanning eng chong shehiri, pul - muamile merkizi bolghan bombay shehiride, 11 ‏ - ayning 26‏ - küni kech saet 11 din 23 minut ötkende tosattin étilghan oq bilen bashlanghan térror hujumidin bir körünüsh.
AFP Photo

Taj mehel, obiroy, namliq eng ali derijlik méhmanxanida, nariman xaws namliq yehudiylar mehelliside, poyiz istansisida we yene bir doxturxanida, omumen 7 jayda birla waqitta bigunah ademler hujumgha uchrap öltürülüshke bashlighan.

Eyni waqitta hindistan radi'oliri anglatqan xewerlerge qarighanda, hindistanning bixeterlik organliri inkas qayturup heriketke kélip bolghiche 80 din artuq adem öltürülüp, 100 din artuq adem yarilandurulup bolun'ghan.

Méhmanxanilarda turuwatqan bir qisim chet'ellikler hujumchilar teripidin görüge éliwélin'ghan. Hujum qilghuchilar, eyni waqitta, tutush we öltürüsh üchün amérika, en'giliye pasporti bar kishilerni köprek sürüshte qilghan.

Shuningdin bashlap bügün'ge qeder, bombayda yüz bergen weqening jeryani oxshimighan uchur wastiliri teripidin pütün dunyagha xewer qilinip turdi. Neq meydandin ispat bergüchilerning awazinimu pütün dunya biwaste anglidi. Her qaysi döletler weqening jeryanini öz xelqighe xewer qilip turdi.

Bu weqede étip öltürülgen 9 hujumchining jesitini bombaydiki qebristanliqlar qobul qilmidi

Birleshme agéntliqining bügün bombaydin xewer qilishiche, bombayda tazilash axirlashti. Ötken heptining axirigha qeder hujumchilar teripidin öltürülüp depne qilin'ghan adem sani 172, )buning ichide hindistanning qoralliq qisimliridin ölgini 12. Hujumchilardin étip öltürülgini 9.( Bu weqede yarilandurulghan adem sani 239.

Bügünki xewerde éytilishiche, bu weqede étip öltürülgen 9 hujumchining jesitini bombaydiki qebristanliqlar qobul qilmidi.

Hujumchilar teripidin öltürülgen bigunah kishilerning ichide 19 i chet'ellik

B b s ning bayan qilishiche, hujumchilar teripidin öltürülgen bigunah kishilerning ichide 19 i chet'ellik, buning 6 si amérikiliq. Qalghanliri gérmaniyilik, en'gliyilik, isra'iliyilik, yaponiyilik, italiyilik, awstiraliyilik, kanadaliq, si'in'gaporluq, taylandliq, fransiyilik we méksikiliq.

Gerche hindistan xewerliride, bu qétim bombayda yüz bergen weqede xitay puqrasidin bir kishi öldi, déyilgen bolsimu, emma xitayning bombaydiki elchixanisining bügün jakarlishiche, bombaydiki méhmanxanilarda turghan xitay puqraliri, weqe yüz bergende alliqachan xeterdin özini qutquziwalghan, hazirgha qeder xitay puqraliridin birmu adem ölmigen.

Jorj bush matem qayghusini hindistan'gha biwaste ipadileydighan purset kütmekte

Birleshme agéntliqining washin'gtondin xewer qilishiche, amérika prézidénti jorj bush we amérika tashqi ishlar ministiri kandiliza rays xanim hazir, amérika hökümitining matem qayghusini hindistan'gha biwaste ipadileydighan bir pursetni kütmekte.

Kandiliza rays xanim bügün london'gha seperge chiqish aldida qilghan sözide 'hazir xulase chiqirishqa téxi baldur, emma men weqening jeryani tamamen ochuq bolushini kütimen, buning üchün pakistan hökümiti bu weqening pakitlirini éniqlash üchün tuluq yardemlishishi kérek dep oylaymen' dep jakarlidi.

'Hujumchilarning chet'el arqa körünishi bar'

B b s ning bayan qilishiche, 11 ‏ - ayning 27 ‏ - küni bombayda, hujumchilar bilen hindistan qisimliri tirkishiwatqanda, hindistan bash ministiri manmuhan sinxa 'hujumchilarning chet'el arqa körünishi bar' dep jakarlighan, we hindistanning bezi bixeterlik organlirining emeldarlirini wezipidin istipa bérishke qistighan idi.

Xewerde éytilishiche yene, hindistan qisimliri teripidin tutuwélin'ghan bir hujumchi bügün, özining pakistan herbiy organlirining 'leshkiri ta'ipe' dep atilidighan bir guruppisidin ikenlikini, pakistanda terbiyiligenlikini iqrar qildi.

Bombayda miltiq awazi toxtighandin kéyin, xelq ghezipini ipadileshke bashlidi

Xewerde éytilishiche, bombayda miltiq awazi toxtighandin kéyin, yerlik xelq hazir güldeste kötürüp, sham yéqip, weqe yüz bergen ali méhmanxanilarning aldigha we bashqa jaylargha kélip bigunah öltürülgen kishilerge teziye bildürüshke bashlidi.

Hindistan hökümiti bügün bu weqege da'ir bezi uchurlarni élan qilghandin kéyin, hindistan bilen pakistanning dölet munasiwitide jiddiylik körülüshke bashlidi. Xewerde éytilishiche, pakistanning tashqi ishlar ministiri qureysh bügün, eger hindistan qisimliri heriketlinishke bashlisa, pakistanmu buninggha inkas qayturidighanliqini, hetta afghanistan'gha chégridash jaylardiki islamchilar qoshuninimu seperwer qilidighanliqini jakarlidi.

Hujumchilarning qoralliri hemmisi xitayda ishlen'gen

Merkizi agéntliqining bayan qilinishiche, bombayda méhmanxanilargha kiriwélip hujum qozghighan 20 nechche qoralliq kishi, shu küni kechte qarangghuda qolwaq bilen qirghaqqa chiqqan, hemmisi yéshi 30 din töwen, muntizim herbiy telim körgen, üstige padichi kiyimi yaki mayka kiyip niqablan'ghan kishiler. Ularning hemmisining qolida "ak - 47" belgilik aptomat we herxil qol bombiliri bar. Ularning qoralliri hemmisi xitayda ishlen'gen .

Taj mehel, obiroy namliq méhmanxanilardin bu hujumchilar öltürgen 20 nechche jeset élip chiqildi. Ular hetta méhmanxanilarning karidorlirighimu bomba orunlashturghan. Hindistan qisimliri ularni tutushqa tirishqan bolsimu, emma köp chiqim tartqandin kéyin, ularni étishtin özge amal qilalmighan.

Xewerde éytilishiche, bombay weqesi yüz bergendin kéyin, xitay hökümiti bu weqe heqqidiki xewerlerni qattiq kontrol qilishqa tiriship kelmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet