I x x weqpi bashliqi bülent yildirim bashchiliqidiki hey'et sherqiy türkistan medeniyet we hemkarliq jem'iyitini ziyaret qildi

Türkiyining eng chong ammiwi teshkilatliridin biri bolghan i x x yeni insaniy yardem weqpi bashliqi bülent yildirim bashchiliqidiki hey'etni dunya Uyghur qurultiyi mu'awin re'isi séyit tümtürk bashchiliqidiki teshkilat rehberliri we qeyseridiki Uyghurlar qizghin kütüwaldi.

Aldi bilen séyit tümtürk ependi hey'etke sherqiy türkistan medeniyet we hemkarliq jem'iyitining baghchisidiki asiya xeritisining aldida Uyghurlar heqqide qisqiche melumat bergendin kéyin, Uyghurlargha qandaq yardem qilish heqqide mexsus söhbet élip barghan.

Türkiye insaniy yardem weqpi bashliqi bülent yildirim ependi aldi bilen qeyseridiki Uyghurlarni körgenliki üchün intayin xursen bolghanliqini éytqandin kéyin, türkiyining eng chong ammiwi teshkilati bolush süpiti bilen xitayning Uyghur musulmanlirigha élip bériwatqan bésim siyasitini yéqindin közitiwatqanliqini, Uyghurlar uchrawatqan zulumning pelestin, bosniye we keshmirdiki musulmanlar duchar bolghan zulumdin 10 hesse köp ikenlikini éytti.

U sözide yene 5-iyul ürümchi weqeside xitayni qattiq eyibligenlikini, sherqiy türkistan dawasini dunya jama'etchilikige yene bir qétim anglitish üchün 2010-yili 3-ayning 20-künidin 21-künigiche istanbulda “Erkin sherqiy türkistan” témisida xelq'araliq yighin chaqirghanliqini, buningdin kéyinmu mezlum sherqiy türkistan xelqining erkinlikke érishishi üchün yardem qilishni dawam qilidighanliqini éytti.

Insaniy yardem weqpi bashliqi bülent yildirim ependi bashchiliqidiki 25 kishidin terkib tapqan hey'et Uyghurlargha qandaq yardem qilish heqqide sherqiy türkistan medeniyet we hemkarliq jem'iyiti bashqurush hey'iti ezaliri bilen muzakire élip barghan. Biz bu muzakire heqqide tepsiliy melumat élish üchün d u q mu'awin re'isi séyit tümtürk ependi bilen söhbet élip barduq.