Язғучи ерик тамниң: 'булутлардин һалқиған тулпар' намлиқ китаби тонуштурулди

Йеқинда канада уйғур җәмийитиниң орунлаштуруши билән, язғучи мухбир ерик тамниң булутлардин һалқиған тулпар намлиқ китабини торонтодики уйғур җамаити билән тонуштуруш мурасими өткүзүлди.
Мухбиримиз гүлшән абдуқадир
2010-10-08
Share
Torontoda-otkuzulgen-Bulutlardin-halqighan-tulpar-namliq-kitapni-tonushturush-305 Сүрәт, 'булутлардин һалқиған тулпар' намлиқ китаб аптори, йазғучи вә мухбир ерик там, китаби, уйғур ели вә хитай тоғрисида сөзлимәктә.
RFA Photo / Gulshen

Тонуштуруш мурасими торонтодики мәлум бир күтүпханида өткүзүлгән болуп, мурасимға торонтода яшайдиған йүзгә йеқин уйғур вә уйғурларниң башқа милләтләрдин болған достлири болуп көп санда киши қатнашти.

Язғучи ерик там бу китабини хитай вә уйғур диярида елип барған бирқанчә йиллиқ тәкшүрүш вә тәтқиқатлириға асасән йезип чиққан болуп, китабта уйғур дияриниң сияси, иқтисади вә иҗтимаи әһвали шундақла хитайниң бу җайда юргүзүватқан ассимилиятсийә қилиш вә динсизлаштуруш сияситиниң қәдиминиң тезлишиватқанлиқи, уйғур дияридики хитайниң һәрбий күчи шундақла хитайниң дуняда йеңи бир мустәмликичилик өрники яритиватқанлиқи қатарлиқларни интайин инчикилик билән муһакимә қилған.

Хитай уйғур диярини әскири күч билән контрол қилиш сүритини бундин 100 йил бурун екиспидитсийәчи мандерһам барған дәвргә селиштурғанда он нәччә һәссә ашурған

Аптор ерик, уйғур дияри һәққидә өзи язған булутлардин һалқиған тулпар намлиқ китабини тонуштуруп, һазир уйғур дияриға йөткиливатқан әскәр саниниң бундин 100 йил бурун екиспидитсийәчи мандерһам барған вақттикигә селиштурғанда нәччә 10 һәссә көпәйгәнликини,хитай нопусиниң омуми нопусниң 45 пирсәнтини тәшкил қилидиғанлиқини, қәшқәр шәһириниң чеқилип униң орниға хитайчә түс алған шәһәрләрниң көпләп бина қилиниватқанлиқини тилға елип, навада силәр өз юртуңларға барсаңлар, уйғурларға аит бир тупраққа әмәс, бәлки хитайниң бир шәһиригә берип қалғандәк туйғуға келисиләр деди. У йәнә уйғур вәтинини хитай әскәрлириниң қаплап кәткәнликигә аит пакитларни екран арқилиқ көрсәтти.

Хитайниң уйғур диярида елип бериватқан шәһәр тәрәққиятини тезлитиш истратегийиси, маңа напалйонниң парижни ишғал қилишини әслитип қойди

Аптор ерик бу китабни тонуштуруш мурасимида,хитай нөвәттә йүргүзүватқан уйғур дияридики нуқтилиқ чоң шәһәрләрниң шәһәр тәрәққиятини тезлитиш истратегийисиниң өзигә напалйонниң әйни чағда парижни ишғал қилғанда қолланған тактикисини әсләткәнликини тилға алған болуп, у напалйонниң парижни ишғал қилишқа қолай болуши, навада бир иш чиқип қалса әскәрләрниң парижға бастуруп киришигә қолай болуши үчүн йолларни интайин кәң ясиғанлиқини тилға елип, хитайниң уйғур диярида йүргүзүватқан шәһәр тәрәққиятини тезлитиш
Bulutlardin-halqighan-tulpar-namliq-kitapning-muqawisi-305
Сүрәт, йазғучи вә мухбир ерик тамниң 'булутлардин һалқиған тулпар' намлиқ китабиниң муқава көрүнүши.
RFA Photo / Gulshen
Истратегийисиниң ниқабини йиртип ташлиған. У йәнә бу тактикини франсийә,алҗирийәни вә тунсни бесивалғанда қолланған болуп, навада хәлқ қозғилип қалса, бу усул билән әскәрләрниң тезликтә шәһәрни қоршишиға қолайлиқ туғулиду дегән.

Биңтүән, хитайдики дөләт ичидики дөләттин ибарәт

Мурасимда язғучи ерик уйғур дияридики биңтүәнниң өз алдиға бир дөләт икәнликини тилға елип,биңтүән хитай яратқан дунядики өзгичә бир мустәмликичилик өрники деди.У йәнә бу һәқтә өзи топлиған биңтүәнгә аит материял вә хәритиләрни көрситип уйғур дияридики биңтүәнниң хитай дөлити ичидики 2 - бир дүләт икәнликини муәййәнләштүрди.

Хитайниң уйғур дияриға көпләп көчмән йөткиши, бу җайда християн дининиң тарқилиши үчүн қолайлиқ яритип бәргән

язғучи ерикниң билдүрүшичә,ичкири өлкиләрдә християн диниға киргән хитайларниң уйғур дияриға көчмән болуп келиши, уйғур диярида християн дининиң тарқилиши вә черкавларниң көпләп селинишини пәйда қилған. Һазир үрүмчи, қумул, кучар, ақсу вә ғулҗиларда черкавлар бар болуп, ғулҗидики чркавни әйни чағда руслар салдурған икән. Ерикниң билдүрүшичә, хитайлар қәшқәрдиму черкав селишни илтимас қилған болсиму, әмма һөкүмәт муқимлуққа тәсир йетишидин әнсирәп рухсәт қилмиған.

Уйғур дияридики хитайларға болған өчмәнлик,хитайниң һәрқандақ мустәмликә өлкисигә қариғанда күчлүк

язғучи ерик мурасимда '5 - июл үрүмчи вәқәси' ниму нәзәрдин сақит қилмиған болуп, у бу һәқтә өзи топлиған рәсим вә башқа материяллар шундақла уйғур диярида өз көзи билән көргәнлиригә асасән, уйғур дияридики хитайға болған өчмәнликниң хитайниң һәрқандақ бир мустәмликә өлкисигә селиштурғанда күчлүк икәнликини тәкитлигән.

Шу күнки мурасимға қатнашқан канада уйғур җәмийитиниң рәиси руқийә турдуш ханим, язғучи ерик язған 'булутлардин һалқиған тулпар' намлиқ бу китабқа юқири баһа берип,китабниң һәр бир уйғур оқушқа вә өз өйидә сақлап қоюшқа тегишлик қиммәтлик материял икәнликини илгири сүрди.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт