Буш түркийә рәис җумһури абдуллаһ гүлгә телефон қилип сәбир тилиди

Америкиниң истанбул консолослиқиға һуҗум қилип 3 сақчи шеһит қилинғандин кейин америка президенти буш, түркийә дөләт рәиси абдуллаһ гүлгә телефон қилип абдуллаһ гүлдин вә абдуллаһ гүл арқилиқ түрк сақчилириниң аилилиридин сәвирә тилиди.
Мухбиримиз әркин тарим хәвири
2008-07-11
Елхәт
Пикир
Share
Принт
7 - Айниң 9 - күни америкиниң истанбул консолослиқида йүз бәргән һуҗумда өлгән 3 сақчи шеһитлириниң дәпинә мурасимидин көрүнүш.
7 - Айниң 9 - күни америкиниң истанбул консолослиқида йүз бәргән һуҗумда өлгән 3 сақчи шеһитлириниң дәпинә мурасимидин көрүнүш.
AFP Photo

 Бушниң тәзийиси

Түркийә рәис җумһурлиқи сарийи ахбарат мәркизи елан қилған бу һәқтики баянатта мундақ дейилгән: "рәис җумһури абдуллаһ гүл өзигә телефон қилип издигән буш билән сөзләшти. Буш түрк һөкүмитиниң истанбулдики америка консолослиқини қоғдаш үчүн қилған хизмәтлиридин миннәтдар икәнликини, консолослиқни қоғдаймән дәп шеһит болған 3 сақчиниң аилә тавабиатлириға, түркийә хәлқиғә америка хәлқи намидин рәхмәт ейтиш үчүн телефон қилғанлиқини ейтқандин кейин, абдуллаһ гүлниң бу тәзийәни түрк хәлқиғә вә шеһитләрниң аилә тавабиатлириға йәткүзүп қоюшини илтимас қилған. Рәис җумһуримиз абдуллаһ гүлму бушқа рәхмәт ейтқандин кейин, бушниң тәзийәсини шеһит аилилиригә йәткүзүп қойидиғанлиқини ейтти. Кейин абдулла гүл бушқа, террорға қарши күрәштә түркийиниң америка билән елип бериватқан һәмкарлиқниң қанчилик муһим икәнликиниму тәкитлигән. Шундақла район характерлиқ мәсилиләр һәққидиму музакириләр елип берилған."

4 Гумандарниң һәммиси қолға чүшүрүлди

7 - Айниң 9 - күни америкиниң консолослиқиға елип берилған һуҗумда, террористлар билән сақчилар оттурисидики тоқунушта һуҗум қилған кишиләрдин үчи нәх мәйданда өлтүрүлгәндин кейин, бири кәлгән машиниси һәйдәп қечип кәткән иди. Үч күн издәш нәтиҗисидә бүгүн бу гумандарму истанбулда қолға чүшүрүлди.

Җәбрайил қошан аслан исимлиқ бу гумандар мән қилмидим дәп тенивалған. Һазирғичә йәнә 10 гумандар түрк сақчилири тәрипидин қолға елинған болуп, бу кишиләрниң қайси террор тәшкилатиға әза икәнликини ениқлашқа тиришиватиду. Террор мутәхәссислириниң бәзилири түрк мәтбуатлириға бәргән баянатида, буларниң әл қаидә террор тәшкилати билән алақиси барлиқини илгири сүрсә, йәнә бәзилири түркийидики бәзи тәшкилатлар билән мунасивити барлиқини илгири сүрүшмәктә.

3 Сақчи шеһит өз юртлирида дәпинә қилинди

Қураллиқ етишиш җәрянида шеһит болған мәһмәт сачмалиоғлу, әрдал өзташ вә нәдим чалиқлар үчүн истанбул хәвпсизлик идарисида дәпинә мурасими өткүзүлди.

Бу мурасимға министирләр, парламент әзалири истанбул валиси вә америкиниң истанбул консолоси вә консолослиқта ишләйдиған америкилиқлар болуп көп санда киши қатнашти.

Америка әлчиси вилсон мухбирларға баянат берип америка һөкүмитигә вакалитән қәһриман түрк сақчилириға рәхмәт ейтти. Кейин бу шеһитләрниң җиназилири туғулған юртлириға әвәтилип он миңларчә киши қатнашқан җиназа мурасимлири билән дәпнә қилинди.

Консолослуқтики америкилиқлар түркләргә ярдәм қилдиму?

4 Террорист түркийиниң истанбул шәһридики америка консолослиқиға һуҗум қилған вақитта, виза елиш үчүн өчирәттә сақлаватқан көп санда киши бар икән. Дәл бу мәзгилдә террористләр америка консолослиқиға қаритип оқ чиқирип консолослуққа киришкә тәмшәлгәндә консолослиқни қоғдаватқан сақчилар билән йолдики қатнаш сақчилири террористларға қарши оқ чиқирип етишип өлгән, бәзилири яриланған. Бу вәқәни нәх мәйданда көргән бәзи кишиләр америкилиқларниң ишикини етивелип сиртқа чиқмиғанлиқини илгири сүргән иди. Бу тоғрилиқ түрк мәтбуатлирида кәң көләмдә муназирә елип берилди.

Бу һәқтә истанбул валиси муһаммәр гүләр билән америка консулханиси мухбирларға баянат бәрди. Вали гүләр әпәнди яриланған сақчиларға немә үчүн америкилиқлар ярдәм қилмиди? дегән соалға мундақ җаваб бәрди:"консолослиқ ичидә америкилиқ қоғдиғучилар бар. Синалғу каситлиридин виза үчүн сақлаватқан түркләрни америкилиқларниң консолослиқ ичигә киргүзивалғанлиқини көрдуқ. Әмма америка консолослуқиниң ишиклири террорлуқ һуҗум кәлгәнлики сигнали кәлгән һаман аптоматик етилип қалидикән. Консолослиқ бинаси террор һуҗумиға қарши алаһидә лаһийиләп 11 - сентәбир вәқәсидин кейин селинған бир бина икән."

Америка консолосиниң ейтишичә америкилиқлар түрк сақчилириға қолидин келишичә ярдәм қилған: "    түрк сақчилириниң наһайити чиң қаидилири бар. Биз түрк сақчилирини қоғдашқа тириштуқ. Биз уларға қолимиздин келишичә ярдәм қилдуқ. Түрк сақчиси һуҗумға учриғанда консолос хадимлиримиздин бир қанчә киши сиртқа чиқип яриланған сақчиларни қутқузушқа тиришти. Түрк сақчилири бизни қоғдаш үчүн җанлирини пида қилди. Биз уларға рәхмәт ейтимиз."
 
Хәлқара қанун бойичә, америкилиқлар консолослиқниң сиртиға чиққанда түрк земиниға аяқ басқан болидикән. Шуңа бу хил әһвалларда америкилиқ қоғдиғучиларниң қолиға қорал елип террористлар билән етишиши қанунға хилап икән.

Түркийидики пүтүн сиясий партийиләр, аммиви тәшкилатлар бу һуҗумни қаттиқ әйиблиди.
 
Пикирләр (0)
Share
Толуқ бәт