Chapchaldiki yer tewresh apet rayoni heqqide uchurlar

Ghuljining chapchal nahiyisi chongbughra yézisida 25 - yanwar yer tewresh apiti yüz bérip besh minggha yéqin amma apetke uchridi.
Muxbirimiz gülchéhre
2009-01-28
Share
Uyghur-yer-tewresh-305.jpg Uyghur élidiki ilgiriki yer tewreshlerdin bir körünüsh.
AFP Photo

Yerlik da'iriler tarqatqan xewerliride mezkur yer tewreshning tesirining anche éghir bolmighanliqini, ölüm‏ - yétim ehwali körülmigenlikini qeyt qilghan bolsimu , emma apettiki xelqning hazirqi hayat ehwalliri heqqide tepsiliy melumat bermidi , judun'gha toghra kelgen bu yer tewresh apitining xelqning hayatigha qanchilik tesir peyda qiliwatqanliqi , apettiki xelqning némilerge muhtaj ikenliki heqqide yenimu toluqraq melumat élish üchün chapchal nahiyisidin uchurlar igiliduq.

Besh minggha yéqin amma biwaste tesirge uchridi

Uyghur élining ili oblastigha qarashliq chapchal nahiyisi teweside 25 - yanwar etigen sa'et 7din 47 minut ötkende 5 bal etrapida yer tewrigen bolup, xewer torliri hemde ili oblastining hökümet uchur toridin ashkarilinishiche, bu qétimliq yertewreshte apetke uchrighan adem 4549 gha yetken.

Chapchal nahiyisini merkez qilghan bu qétimliq yer tewreshte chapchal nahiyisidin 76 kilométir yiraqtiki ghulja sheher ichi hemde 25 kilométir yiraqtiki qorghas nahiyiliridimu silkinishning éniq tesiri körülgen. Da'irilerning deslepki toluq bolmighan statistikisida körsitishiche, chapchal hemde qorghas nahiyilirini hemde besh taghliq kent ‏ - yézilarni öz ichige alghan yer tewresh merkizi rayonlirida 11 öy örülgen . 133A'ililikning 416 éghiz öyige dez ketken . 2950 Kupmétir etrapida qotanlar buzulghan ,besh minggha yéqin apetke uchrighan ammining ichide éghir apetke uchrighan adem 588 neperge yetken , öyliri örülgen we dez ketken 305 kishi chidirlargha köchürülgen.

Chapchal nahiyilik hökümet apettin qutquzush ishxanisining ili hökümet uchur torida élan qilishigha qarighanda , hazirgha qeder adem yaki mal ‏ - charwilarning ölüsh yaki yarilinish ehwalliri melum qilinmighan.

Apettiki xelq yéqilghu hem ashliqqa muhtaj

Chapchal nahiye baziridin téléfon ziyaritimizni qobul qilghan bir Uyghur ayal , yer tewreshning nahiye ichidiki ammigha anche chong tesir körsetmigenlikini ,emma ittipaq kentidiki xelqning biwaste tesirge uchrighanliqini éytti.

Biz yer tewresh apiti éghirraq bolghan chapchal nahiyisi chong bughra yézisining apet ehwali heqqide tepsiliy melumat élish üchün , yéziliq hökümet ishxanisigha téléfon qilduq, ismini ashkarilashni xalimighan bir yéziliq hökümet xadimi apetning tesirige uchrap öyliri örülgen we chak ketken bir qisim déhqanlarning chidirlargha köchüp kiriwatqanliqini, apet ehwalini tekshürüsh xizmitining dawamlishiwatqanliqini , nöwette apettin qutquzush xizmitide ammining yéqilghu hemde ashliqqa muhtaj boliwatqanliqini bildürdi.

Apette qalghan bir qisim amma yenila xeterlik öylerde olturushqa mejbur bolmaqta

Ili oblastliq hökümet uchur torida gerche chapchaldiki yer tewresh apiti heqqide bezi xewerler bérilgen bolsimu, mezkur xewerlerde peqet , oblast hem nahiye rehberlirining chaghanliq dem élishini qurban qilip yer tewresh apitige uchrighan xelqqe bekmu köngül bölüwatqanliqini , hökümetning apettin qutquzush teyyarliqini jiddiy élip bériwatqanliqini , apettiki xelqqe 50 chédir ewetilgenlikini teshwiq qilghan .

Epsus apettiki xelqning qandaq qiyinchiliqlargha uchrawatqanliqi hem qandaq yardemlerge muhtaj ikenliki heqqide héchqandaq uchur bermigen.
 
Bu qétimliq yer tewreshte chapchal nahiyisining chongbughra yézisi ittipaq kentining apetke uchrash ehwali bir qeder éghir bolup , biz bu kenttiki apetke uchrighan amma bilen alaqilishishqa tirishtuq ,téléfonimiz ittipaq kentige nahayiti teste ulandi. Ziyaritimizni qobul qilghan bir déhqan ayal yer tewresh apiti yüz berginige ikki kün bolghan bolsimu , hökümetning yardemlirining hetta chidirningmu téxi bu yézidiki apette qalghan xelqqe yétip kelmigenlikini, öyige chak ketken qoshnisiningmu hazirghiche xeterlik öyde olturuwatqanliqini bildürdi.

Chapchalda yüz bergen yer tewresh apiti ili oblastida qishning judun künlirige toghra keldi, hawarayi uchuridin melum bolushiche , ghulja tewesining bügünki hawa témpératurisi nöldin töwen 10 giradus etrapida bolup , bir nechche kün ichide qar yéghip qélishi mumkin.


Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet