Атақлиқ чақчақчи тудахунниң өлүми муһаҗирәттики уйғурларниму қайғуға салди

Уйғур хәлқи бүгүн өзлири дуч кәлгән тәтүр қисмәткә иман вә етиқадиниң күчи билән тақабил туруп келиватқан болса, бу қисмәтниң җараһәтлирини нахша-музика вә күлкә-чақчақлири билән давалап кәлмәктә.
Мухбиримиз шөһрәт һошур
2012-07-31
Елхәт
Пикир
Share
Принт
Атақлиқ чақчақчи тудахун күлдүргән кишиләр йиға билән униң өлүмини узатмақта. 2012-Йили 28-июл, ғулҗа.
Атақлиқ чақчақчи тудахун күлдүргән кишиләр йиға билән униң өлүмини узатмақта. 2012-Йили 28-июл, ғулҗа.
Facebook

Чақчақлиридики қизиқ мәниләр, өткүр тәнқидләр вә күчлүк мәсхириләр билән уйғур җәмийитидә йүксәк һөрмәт тапқан тудахун чақчақчиниң өлүми муһаҗирәттики уйғурларниму қайғуға салди. Нөвәттә муһаҗирәттики уйғурларниң аммиви сорунлирида, иҗтимаий ахбарат васитилиридә тудахунниң уйғур сәнитигә қошқан төһписи вә кишилик пәзиләтлири яд етилмәктә вә униң вапатиға тәзийиләр билдүрүлмәктә.

Мәлум болушичә, хитай һакимийитиниң зулум -зиянкәшликидин, тудахун чақчақчиму чәттә қалмиған. Чәттә қалмиғанла әмәс, бир уйғур болуш сүпити билән дуч кәлгинидин башқа йәнә җисманий җәһәттики аҗизлиқи сәвәбидинму бир нөвәт унтулғусиз зәрбә йегән. У толуқ оттурини пүттүрүп, алий мәктәп имтиһанидин алдинқи қатарда өткән болсиму, хитайниң аталмиш сапа маарипиниң өлчәмлири сәвәблик, алий мәктәпкә қобул қилинмиған. Бу һәқтә талантлиқ язғучи абдурусул сийитниң ғулҗидики чақчақчиларни тонуштуруп язған мақалисидә мундақ дейилгән:
«... Түзүм уни йәкливеди, адәмләр қойниға еливалди. Бешиға елип көтүрди.Түзүмниң ичи тар болғини билән җәмийәтниң, адәмләрниң қойни кәң, бағри иллиқ, шуңа тудахун шундин бери түзүмгә әмәс, адәмләргә муһәббәт бағлиди, муһәббәтлик иҗтимаий топниң күлкиси, хушаллиқи, көңүл арами үчүн кечә-кечиләп сайрап талмайдиған болди.»

Хитай сақчилириниң соал-сорақлири вә аваричиликлиридин тудахун чақчақчиму несивисини алған. юқириқи мақалидә баян қилинишичә, 2003-йили шаңхәйдики уйғур тиҗарәтчиләр, тудахунни шаңхәйгә тәклип қилған. У шаңхәйдә сорун-сорунда юртдашлирини күлдүрүп йүргинидә, хитайниң дөләт бихәтәрлик сақчилири униң арқисиға киривалған. Пуқрачә кийинивалған сақчилар, бир тәрәптин сорунда немә гәпләрниң болунғанлиқини сүрүштә қилса, йәнә бир тәрәптин сорундикиләрниң кимликлирини дәп беришни тәләп қилған. Һалал әмгики билән өз хәлқиниң қолидин ризқини йәватқан тудахун хитай сақчилириниң бу тәлипини кәскин рәт қилған.

Тудахун бир дөләт пуқралириниң президентни тонуйдиғанлиқи, әмма президентниң һәммә пуқрани тонумайдиғанлиқини мисал қилип көрситип, өзи олтурған олтурушлардики кишиләрниң кимликлирини билмәйдиғанлиқини ейтқан.

Тудахун  хәлқ тәрипидин  немә үчүн бу қәдәр көп сөйүлди вә һөрмәтләнди?  у кишиләрни күлдүргәнлики үчүнламу яки у чақчақ арқилиқ ата қилған башқа нәрсиләрму барму? бу соалниң җавабини тудахунниң әйни чағдики сәпдиши вә сәнәт йетәкчиси аблимит турсундин аңлайсиләр. (юқиридики аваз улинишидин аңлиғайсиз)

Аблимит турсун тудахунниң чақчақлиридики ипадиләш өзгичиликләрни ихчамлиқ вә тезликтин ибарәт икки нуқтиға йиғинчақлиди. Аблимитниң билдүрүшичә, тудахунниң чачақлири мәзмун җәһәттин иҗтимаий вә әхлақий мәсилиләргә мәркәзлишиду. Униң сиясий темидики чақчақлирида пикир интайин өткүр, мәсхирә наһайити күчлүк. Аблимит бу темида тудахунниң чақчақлиридин бирни әсләп өтти: 5 ‏-феврал ғулҗа вәқәси йүз берип бирнәччә күндин кейин аблимит турсун тоққузтараға телефон қилип тудахунни ғулҗиға келип тамаша қилип кетишкә дәвәт қилған. Тудахун ғулҗида вәзийәтниң җиддийликини аңлиғанлиқини ейтқан. Аблимит чақчақ қилип «боюң пакар болғандикин уруш болсиму, оқ саңа тәгмәйдиғу» дегән. Тудахун дәрһал җаваб қайтурған: «билмәмсән ака, бундақ чағларда путумдин тутуп көтүрүп беридиған гуйниң балилири бар» тудахунниң хитай ғалчилирини қамчилиған бу чақчиқи вәтән ичи-сиртидики уйғурлар арисида қизғин алқишқа еришкән. Аблимитниң билдүрүшичә тудахун миллий вә сиясий мәсилиләргә интайин сәзгүр болуп, у сәнәт номурлирида вәтән -милләтниң дәрди баян қилинған қилинған чағларда чәксиз шадлиққа чөмгән вә һаяҗанланған.


Аблимит турсун тудахунниң хәлқ тәрипидин қизғин сөйүлүшини униң миллити билән тәң күлүп тәң йиғлаштәк пәзилити вә ғайисигә бағлиқ дәп изаһлиди.
Пикирләр (0)
Share
Толуқ бәт