Béyjingdiki erzdarlar namayish qilip ju yüngkangdin shexsi mülkini ashkarilashni telep qildi

Melum bolushiche, ötken jüme künidin bashlap herqaysi jaylardin béyjinggha toplan'ghan erzdarlar namayish qilip ju yungkang qatarliq xitay emeldarliridin shexsi mülkini ashkarilashni telep qilghan.

20 - Dékabir küni xitayning herqaysi jayliridin béyjinggha yighilghan erzdarlar, ayrim - ayrim halda béyjing uniwérsitéti, chingxu'a uniwérsitéti, béyjing jenubiy poyiz wogzali, xitay döletlik erziyet idarisi qatarliq jaylar aldida qollirida, xitayning yuqiri derijilik emeldarliridin shexsi mülkini ammigha ashkarilashni telep qilghan xetler yézilghan taxtilarni kötürüp namayish qilghan.

Xitayning boshün toridiki xewerdin melum bolushiche, erzdarlarning namayish qilishi, hetta bir yerge toplinishinimu üzlüksiz tosup kéliwatqan béyjing saqchiliri bu qétim, qollirigha “Ju yüngkang qatarliq parixor emeldarlar shexsi mülkini ammigha ashkarilisun” dégen xet bar taxtilarni kötürüwalghan erzdarlarning namayishini tosmighan.

Boshün toridiki namayish heqqidiki süretlik xewerdin melum bolushiche, béyjing jenubiy wogzalida namayish qilghan erzdarlar qoligha kötürüwalghan taxtigha: ju yungkanggha yézilghan xet dégen mawzu qoyulup, “Anglishimizche, junggoda muqimliqni saqlash üchün ajritilghan pul herbiy xirajettin éship kétiptu. Puqralar buningdin heyran boluwatimiz. Siz özingizning pak emeldar ikenlikingizni ispatlap, erzdarlarning hörmitige érishimen désingiz, shexsi mülkingizni hem muqimliqni saqlash üchün ajritilghan xirajetni ashkarilang. Sizdin semimilik bilen ümid kütüwatqan erzdarlardin” dégen jümliler yézilghan.

Boshün tor békitidiki xewerde yene, béyjingda erzdarlarning ju yüngkangning shexsi mülkini ashkarilashni telep qilip namayish qilishigha nispeten béyjing saqchilirining sükütte turushi xitay tor béketliridiki ju yüngkangning parixorluq qilmishliri heqqidiki pakitlarning hökümet da'irilirinimu amalsiz halette qoyuwatqanliqi sewebidin ikenliki ilgiri sürülgen.

Namayish heqqidiki bir inkasta mundaq yézilghan: nöwette tor béketliride pash boluwatqan emeldarlarning parixorluq, chiriklik qilmishigha a'it xewerler xelqni ghezeplendürgen bolsa, hökümet da'irilirini amalsiz halette qaldurmaqta. Ju yüngkang xelq arisida üzlüksiz halda parixorluq we chiriklik bilen eyiblinip kéliwatqan bolsimu, emma u muqimliqni saqlashta xizmet körsetken dep qarilip, hazirghiche yiqilmay kelgen idi. Shi jingping öz hakimiyitini mustehkemlesh üchün “Emeldarlar ichidiki chiriklikke zerbe béridighanliqini élan qildi. Ju yüngkangning yéqini bolghan sichüen ölkisining mu'awin partkom sékritari li chünchéng wezipisidin élip tashlinip, tekshürülüwatidu. Emdi nöwet parixor emeldar ju yüngkanggha keldi.”

Xitayning hökümet axbarati bolghan shinxu'a agéntliqi qatarliqlar 13 - dékabirdiki xewerliride, 18 - qurultaydin kéyin merkizi komitétning kandidat ezasi bolup saylan'ghan sichüen ölkisining mu'awin partkom sékritari li chünchéngning éghir derijidiki intizamsizliq qilmishi seweblik wezipisidin élip tashlinip, tekshürülüwatqanliqi élan qilinip, u, 18 - qurultaydin kéyin tunji qétim wezipisidin élip tashlinip, tekshürüshke buyrulghan ölke derijilik emeldar déyilgen. Boshün torining bügünki bir xewiride parixorluq bilen eyibliniwatqan li chünchéngning ilgiri bo shiley, wang lijün qatarliqlar bilen birlikte xitay merkizi siyasi byurusining 9 ezasining biri bolghan ju yüngkangning yéqin ademliridin biri dep qarilip kéliwatqanliqi ilgiri sürülüp,li chünchéngning ju yüngkang jemetining bayliq toplishidiki yéqin hemkarlashquchisi ikenliki pakitliri bilen otturigha qoyulghan.

Yéngi ira gézitining bügünki xewiridimu béyjingdiki erzdarlarning namayishi hem xitay emeldarlirining chiriklik qilmishi heqqide xewerler bésilghan. Bu xewerlerde nöwette shi jingping qatarliq xitayning yéngi rehberlik guruhining öz hakimiyitini mustehkemlesh üchün xelq arisida chiriklik qilmishliri ashkarilinip ketken li chünchéng qatarliq bir qisim emeldarlarni jazalash arqiliq, xelqning barghanche küchiyiwatqan naraziliqini bésishqa urunsa, yene bir tereptin intérnétke qaritilghan nazaretni téximu kücheytip, emeldarlarning setchilikige a'it xewerlerni kontrol qilishqa urunuwatqanliqi otturigha qoyuldi.

Nöwette xitay puqraliri arisida emeldarlarning chiriklishishi, parixorluq qilmishlirigha qarshi sadalar kücheygen bolup,9 - dékabir xelq'ara parixorluqqa qarshi turush künide, xu jya qatarliq xitay ziyaliyliri, imza toplash pa'aliyiti élip bérip, ministirdin yuqiri derijilik 205 neper xitay emeldarini özi, a'ile tawabi'atliri we uruq - tughqanlirining mal - mülkini ashkarilashqa chaqirghan idi.

Xitayda tesiri küchlük bolghan 100 nechche ziyaliy imza qoyghan ochuq xette, yéqinqi yillardin buyan xitayda barghanche ewj éliwatqan hökümet emeldarliridiki parixorluq, chiriklik qilmishining xitay dölitini weyran bolushqa bashlap baridighanliqi agahlandurulghan. Imzaliq xette, xitay hökümitidiki ministirdin yuqiri derijilik 205 neper xitay emeldaridin 2013 - yili échilidighan xitay xelq qurultiyidin ilgiri shexsi mal - mülkini ammigha ashkarilash telep qilin'ghan bolup, imzaliq xette, xitay merkizi hökümiti teripidin Uyghur élige teyinlen'gen emeldarlardin hazir wezipe ötewatqan Uyghur aptonom rayonluq partkom sékrétari jang chünshyen we Uyghur aptonom rayonining re'isi nurbekri qatarliq ikki emeldarningmu ismi tilgha élin'ghan idi. Imzaliq xette, hökümet emeldarliridin özining, jörisining, perzentlirining hökümet xizmitige teyinlinishtin ilgiriki we wezipe ötewatqan mezgilidiki turaqliq we turaqsiz mal - mülkini ammigha ashkarilash telep qilin'ghan idi.